ខេត្តបាត់ដំបង៖ បើតាមសេចក្តីរាយការណ៍បានឱ្យដឹងថា គិតត្រឹមម៉ោង២និង១៤នាទីរសៀល ថ្ងៃទី១៧ ខែមីនា ឆ្នាំ២០១៩នេះ សមត្ថកិច្ចនាំជនសង្ស័យ២នាក់ប្ដីប្រពន្ធយកទៅធ្វើត្រាប់ពីសកម្មសម្លាប់ជនរងគ្រោះឡើងវិញ ជុំវិញករណីសពបុរសម្នាក់ត្រូវគេប្រទះឃើញស្លាប់ក្បែរមាត់ទឹកក្នុងរណ្ដៅដីមួយកន្លែងនៅស្រុកកំរៀង ដោយសមត្ថកិច្ចអះអាងថា ការស្លាប់របស់បុរសរងគ្រោះគឺជា«អំពើឃាតកម្ម» ដែលផ្ដើមចេញពីស្នេហាត្រីកោណ ហើយបានឃាត់ខ្លួនជនសង្ស័យ២នាក់ខាងលើកាលពីយប់ថ្ងៃទី១៦ មីនាម្ល៉េះ ជាប់ពាក់ព័ន្ធនឹងការរួមដៃគ្នាសម្លាប់ជនរងគ្រោះ រួចសែងយកទៅបោះចោលក្នុងទឹក។
មន្ត្រីការិយាល័យព្រហ្មទណ្ឌកំរិតធ្ងន់នៃស្នងការខេត្តបានឲ្យដឹងថា ជនសង្ស័យ២នាក់ប្ដីប្រពន្ធ នោះឈ្មោះភេន ភាព អាយុ៥១ឆ្នាំ និងប្រពន្ធឈ្មោះសែត ភាព អាយុ៥០ឆ្នាំ រស់នៅភូមិថ្មី ឃុំបឹងរាំង ស្រុកកំរៀង ចំណែកជនរងគ្រោះ ឈ្មោះ សំ ម៉ៅ អាយុ៤៩ឆ្នាំ រស់នៅភូមិថ្មី ឃុំត្រាង ស្រុកកំរៀង។
មន្ត្រីដដែលប្រាប់ថា ពេលនាំខ្លួនមកសាកសួរដំបូងជនសង្ស័យ២នាក់ប្ដីប្រពន្ធនេះព្យាយាមបដិសេធ ថែមទាំងផ្ដល់ព័ត៌មានមិនពិតមានចេតនាចង់បង្វែរកំហុសនេះទៅលើក្រុមគ្រួសារជនរងគ្រោះវិញថា ជាអ្នកប្រព្រឹត្តិទៀតផង។ ប៉ុន្តែបន្ទាប់ពីបង្ហាញភស្ដុតាង និងមានការដាក់បន្ទុកពីសាក្សីមួយចំនួនផង ទើបជនសង្ស័យនេះព្រមសារភាពនូវទង្វើដ៏ឃោរឃៅរបស់ខ្លួនដែលផ្ដើមចេញពីការ «ប្រច័ណ្ឌប្រពន្ធទៅនឹងជនរងគ្រោះ» នោះ។
បើតាមជនសង្ស័យជាប្តីសារភាពថា ខ្លួនជាអ្នកវាយសម្លាប់ជនរងគ្រោះ រីឯប្រពន្ធជួយសែងយកទៅទម្លាក់ចោលនៅមាត់ទឹកក្នុងរណ្ដៅដីខាងក្រោយភូមិ។ ខ្លួនបានយកគល់ឬស្សីវាយសម្លាប់ជនរងគ្រោះ ដោយសារតែកន្លងមកជនរងគ្រោះលួចទំនាក់ទំនងស្នេហាជាមួយប្រពន្ធខ្លួន។ ហេតុការណ៍នេះកើតឡើងនៅម៉ោង១រំលងអធ្រាត្រឈានចូលថ្ងៃទី១៥ មីនា នៅនឹងផ្ទះរបស់ខ្លួនតែម្ដង។ ជនរងគ្រោះនិងគ្រួសារខ្លួនជាមនុស្សស្គាល់គ្នា ហើយជនរងគ្រោះតែងមកដេកលេងនៅផ្ទះខ្លួនជាញឹកញាប់ផងដែរ។
ដោយឡែកស្ត្រីជាប្រពន្ធវិញហាក់មិនបាននិយាយច្រើនអំពីរឿងខ្លួនមានសហាយស្មន់ជាមួយជនរងគ្រោះតាមការចោទប្រកាន់ប្ដីទេ ប៉ុន្តែស្ត្រីរូបនេះសារភាពដាក់បន្ទុកលើប្ដីខ្លួនថា ប្ដីរបស់ខ្លួនពិតជាវាយសម្លាប់ជនរងគ្រោះមែន រីឯខ្លួនគ្រាន់តែចូលរួមសែងជនរងគ្រោះយកទៅទម្លាក់ទឹកតែប៉ុណ្ណោះ។
សូមរំលឹកថា ជនរងគ្រោះឈ្មោះសំ ម៉ៅ អាយុ៤៩ឆ្នាំ មានមុខរបរលក់សាច់ពិសេស(សាច់ឆ្កែ) រស់នៅភូមិថ្មី ឃុំត្រាង ស្រុកកំរៀង ត្រូវអ្នកភូមិប្រទះឃើញដេកស្លាប់ក្បែរមាត់ទឹកក្នុងរណ្ដៅដីមួយកន្លែង កាលពីវេលាថ្ងៃត្រង់ថ្ងៃទី១៥ មីនា ក្នុងភូមិស្វាយធំ ឃុំបឹងរាំង ស្រុកកំរៀង ដែលមានខ្សែរឹតជាប់.ក និងមានស្នាមរបួសជាច្រើនកន្លែងនៅលើត្របកភ្នែក និងត្រចៀកផង។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព
ចែករំលែកព័តមាននេះ