រាជធានីភ្នំពេញ ៖ ក្រុមអ្នកបើកបរម៉ូតូកង់បីឥណ្ឌាចំនួន៣នាក់បានឈ្លោះប្រកែកគ្នាតាមផ្លូវ ដោយភាគីខាងអ្នកបើកបរម៉ូតូកង់បីឥណ្ឌាម្នាក់ បានយកច្រវាក់វាយទៅលើភាគីអ្នកបើកបរម៉ូតូកង់បីឥណ្ឌា២នាក់បងប្អូន បណ្តាលឱ្យរងរបួសម្នាក់បែកក្បាលហូរឈាម បង្កឱ្យមានការផ្អើលពលរដ្ឋដែលជាអ្នកដំណើរតាមផ្លូវ និងសមត្ថកិច្ចចុះទៅឃាត់ក្រុមអ្នកបើកបរម៉ូតូកង់បីឥណ្ឌាទាំង៣នាក់ រួមទាំងម៉ូតូកង់បីទាំង៣គ្រឿងនាំទៅអធិការដ្ឋានខណ្ឌសែនសុខ កាលពីវេលាម៉ោង៧និង៣០នាទីយប់ថ្ងៃទី១៦ ខែមីនា ឆ្នាំ២០១៩ នៅតាមផ្លូវលេខ៩២ ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ ។
តាមប្រភពពីប្រជាពលរដ្ឋដែលបានឃើញហេតុការណ៍បាននិយាយថា ឃើញក្រុមអ្នករត់ម៉ូតូកង់បីឥណ្ឌាឈ្លោះគ្នាគឺកាចៗណាស់ បើកចរឹកដូចពួកគាត់អុីចឹង លែងហ៊ានជិះម៉ូតូកង់បីឥណ្ឌាហើយ ព្រោះខ្វះការយោគយល់ អធ្យាស្រ័យគ្នាទៅវិញទៅមក ។ ឈ្លោះគ្នាដូចភ្លៀងបាក់មេឃ ហេតុតែចង់ចាញ់ឈ្នះសម្តីគ្នា រហូតឈានដល់អ្នកបើកបរម៉ូតូកង់បីឥណ្ឌាម្នាក់ទាញច្រវាក់ដែលខ្លួនបំរុងទុកជាស្រេចយកមកវាយទៅលើអ្នកបើកបរម៉ូតូកង់បីឥណ្ឌា២នាក់បងប្អូន បណ្តាលឱ្យអ្នកបើកបរម៉ូតូកង់បីឥណ្ឌាម្នាក់រងរបួសបែកក្បាលហូរឈាម ។
បើតាមប្រភពមួយផ្សេងទៀតបានឲ្យដឹងថា មុនពេលកើតហេតុ គេឃើញអ្នកបើកបរម៉ូតូកង់បីឥណ្ឌាទាំង៣នាក់បានបើកបរតាមផ្លូវ ហើយគេឃើញភាគីខាងអ្នកបើកបរម៉ូតូកង់បីឥណ្ឌាម្នាក់បើកបរដូចជាក្មេងពាល បើកឆាប និងរេពេញផ្លូវ ហើយត្រូវភាគីអ្នកបើកបរម៉ូតូកង់បីឥណ្ឌាម្ខាងទៀតដែលមានគ្នា២នាក់បងប្អូនស្រែកថាស្តីឱ្យ ទើបទាស់ពាក្យសម្តីគ្នា រួចក៏ឈប់ម៉ូតូកង់បីឥណ្ឌាឈ្លោះគ្នាប្រ៉ាវតែម្តង ហើយភាគីខាងអ្នកបើកបរម៉ូតូកង់បីឥណ្ឌាដែលត្រូវគេស្តីឱ្យបានទាញច្រវាក់ចេញពីក្នុងឃ្លប់មកវាយទៅលើភាគីម្ខាងទៀតដែលមានគ្នា២នាក់ បណ្តាលឲ្យម្នាក់រងរបួសបែកក្បាលហូរឈាមស្រោចខ្លួន ពេលនោះកម្លាំងសមត្ថកិច្ចបានមកទាន់ចាប់ឃាត់អ្នកបើកបរម៉ូតូកង់បីឥណ្ឌាទាំង៣នាក់នាំទៅសាកសួរនៅអធិការដ្ឋានខណ្ឌសែនសុខ ។
ពាក់ព័ន្ធនឹងករណីខាងលើពលរដ្ឋបានលើកឡើងថា ក្នុងទីក្រុងភ្នំពេញ អ្នកប្រកបរបរបើកម៉ូតូកង់បីឥណ្ឌាដឹកម៉ូយមួយចំនួនចរឹកឫកពារថ្លៃថ្នូរ បើកបរលើដងផ្លូវដឹងខុសដឹងត្រូវគួរឲ្យគោរព តែក៏មានអ្នកបើកបរម៉ូតូកង់បីឥណ្ឌាមួយចំនួន ពេលខ្លះបើកមួយផ្លូវទន្ទឹមគ្នា៣គ្រឿង និងប្រដេញគ្នាលើដងផ្លូវ ធ្វើដូចផ្លូវគាត់ទិញផ្តាច់មុខ បង្កភាពរញ៉េរញ៉ៃតាមដងផ្លូវសាធារណៈ ៕
ចែករំលែកព័តមាននេះ