ខេត្តត្បូងឃ្មុំ ៖ ស្នូរផ្ទុះក្បាលគ្រាប់បានផ្ទុះលាន់យ៉ាងកក្រើកនៅផ្ទះជាងដំដែកមួយកន្លែង បណ្តាលឲ្យជាងដំដែកម្នាក់ត្រូវបានស្លាប់ដោយដាច់មួយកំណាត់ត្រឹមចង្កេះចុះក្រោម និងចៅប្រុសម្នាក់រងរបួសត្រង់ក្បាល បង្កឲ្យមានការភ្ញាក់ផ្អើលពេញភូមិនៅម៉ោង៩និង៣០នាទីព្រឹក ថ្ងៃទី១៦ មីនា ២០១៩ ស្ថិតនៅក្នុងភូមិ៦៧ ឃុំថ្មពេជ្រ ស្រុកត្បូងឃ្មុំ ។
ជនរងគ្រោះខាងលើឈ្មោះ ភាព ផល អាយុ៥៩ឆ្នាំ ស្នាក់នៅផ្ទះកើតហេតុ ក្នុងភូមិ៦៧ ឃុំថ្មពេជ្រ ស្រុកត្បូងឃ្មុំ បានស្លាប់ និងចៅប្រុសម្នាក់ឈ្មោះ ឆន ឆេងហ័រ អាយុ៤ឆ្នាំ ស្ថិតនៅក្នុងផ្ទះបានរបួសក្បាល។
លោកទឹម នាង នាយប៉ុស្តិ៍រដ្ឋបាលថ្មពេជ្រ ប្រាប់ឲ្យដឹងថា ស្របពេលដែលជាងដែកខាងលើ កំពុងតែ
ដំដែកធ្វើពន្លៀកជៀរជ័រកៅស៊ូ មិនទាន់នឹងបានប៉ុន្មានផង ស្រាប់តែសម្លេងក្បាលគ្រាប់ប្រភេទ១២៥
មីលីម៉ែត្របានផ្ទុះឡើងយ៉ាងកក្រើកដី បណ្តាលឲ្យជាងដាច់មួយកំណាត់ខ្លួន ហើយអំបែងគ្រាប់បានខ្ទាតត្រូវបែកទូរទស្សន៍ក្នុងផ្ទះឡើងខ្ទេច និងចៅប្រុសដែលនៅក្នុងផ្ទះក៏ត្រូវចំក្បាល ប៉ុន្តែសំណាងដែលរបួសស្រាល ។
លោកនាយប៉ុស្តិ៍រដ្ឋបាលថ្មពេជ្រ បានរំលឹកថា ក្បាលគ្រាប់នោះត្រូវជាងដែកទិញពីអេតចាយមកសម្រាប់ដាក់កំណល់ដំដែក ដោយដំតាំងពីដំបូងរហូតមកដល់ពេលនេះទើបផ្ទុះមានរយៈពេលប្រមាណ១០ឆ្នាំមកហើយ ។ ក្នុងពេលទិញដំបូងៗអ្នកភូមិប្រាប់ថា កុំទិញមកអី ប្រយ័ត្នផ្ទុះ តែបុរសរងគ្រោះតបទៅវិញថា មិនអីនោះទេ ស្រាប់តែដល់ថ្ងៃកើតហេតុ ពេលកំពុងតែដំ សង្ស័យតែក្តៅពេក ទើបបណ្តាលឲ្យក្បាលគ្រាប់នោះផ្ទុះឡើងកក្រើកតែម្តង ដោយជាងត្រូវដាច់មួយកំណាត់ខ្លួនយ៉ាងតក់ស្លុតបំផុត តែមិនទាន់ស្លាប់ភ្លាមៗនោះទេ ដោយនូវនិយាយបាន មួយសន្ទុះក៏ផ្តាំផ្ញើគេឯងថា កុំឲ្យយកក្បាលគ្រាប់នេះមកធ្វើដូចគាត់ រួចក៏បានស្លាប់តែម្តង។
រាល់ថ្ងៃមានមនុស្សជាច្រើនតែងតែនៅអង្គុយជុំគ្នាច្រើននាក់ និងតឿនជាងដែកឲ្យដំពន្លៀកសម្រាប់ជៀរជ័រកៅស៊ូ តែនៅព្រឹកថ្ងៃខាងលើសំណាង មិនមានអ្នកណាមកអង្គុយនោះទេ ប្រសិនបើមានមនុស្សច្រើនមិនដឹងស្លាប់ប៉ុន្មាន របួសប៉ុន្មានឡើយ ។ លុះនៅព្រឹកថ្ងៃទី១៧ ខែមីនានេះ ក្រុមមន្ត្រីស៊ីម៉ាកបានចុះមកពិនិត្យនៅត្រង់កន្លែងផ្ទុះផងដែរ ។
សូមបញ្ជាក់ថា នាពេលកន្លងទៅ ត្រង់មាត់ទន្លេមេគង្គភូមិព្រែកតូច ឃុំជីរោទ៏ទី១ ស្រុកត្បូងឃ្មុំ មានខ្មែរ
អ៊ិស្លាមបានស្ងោរសំណចាក់ចូលក្បាលគ្រាប់១២៥មីលីម៉ែត្រ សម្រាប់ដាក់ជើងមាញ់ បានតែបន្តិចក៏បណ្តាលឲ្យផ្ទុះយ៉ាងកក្រើកដីស្លាប់បុរសម្នាក់ ដែលនៅឆ្ងាយពីកន្លែងផ្ទុះប្រមាណ៥០ម៉ែត្រ និងមនុស្សរងរបួស៩នាក់ផងដែរ៕
ចែករំលែកព័តមាននេះ