រាជធានីភ្នំពេញ ៖ លោកឆោម ឆារី អតីតកីឡាករប្រដាល់សាកលដ៏ល្បីឈ្មោះនាទស្សវត្សទី៦០ ហើយក៏ធ្លាប់ធ្វើជាគ្រូបង្វឹកកីឡាករប្រដាល់សាកលជម្រើសជាតិដឹកនាំទៅចូលរួមប្រកួតនៅក្រៅប្រទេស ដណ្ដើមបានមេដាយជាច្រើនគ្រឿងអំឡុងឆ្នាំ២០០៩ ទៀតផងនោះ បច្ចុប្បន្នបានធ្លាក់ខ្លួនឈឺធ្ងន់ថែមទាំងមានជីវភាពខ្វះខាត កំពុងតែត្រូវការអ្នកជួយឧបត្ថម្ភ…
រាជធានីភ្នំពេញ ៖ លោកឆោម ឆារី អតីតកីឡាករប្រដាល់សាកលដ៏ល្បីឈ្មោះនាទស្សវត្សទី៦០ ហើយក៏ធ្លាប់ធ្វើជាគ្រូបង្វឹកកីឡាករប្រដាល់សាកលជម្រើសជាតិដឹកនាំទៅចូលរួមប្រកួតនៅក្រៅប្រទេស ដណ្ដើមបានមេដាយជាច្រើនគ្រឿងអំឡុងឆ្នាំ២០០៩ ទៀតផងនោះ បច្ចុប្បន្នបានធ្លាក់ខ្លួនឈឺធ្ងន់ថែមទាំងមានជីវភាពខ្វះខាត កំពុងតែត្រូវការអ្នកជួយឧបត្ថម្ភ ។
លោកឆោម ឆារី គឺជាអតីតកីឡាករប្រដាល់សាកលល្បីឈ្មោះមួយរូប នៅក្នុងឆ្នាំ១៩៦៩ រហូតដល់ឆ្នាំ១៩៨៥ ។ ហើយបានក្លាយជាគ្រូបង្វឹកកីឡាករប្រដាល់សាកលជម្រើសជាតិតាំងពីឆ្នាំ១៩៨៦ រហូតដល់ឆ្នាំ២០១០ ។ ហើយបច្ចុប្បន្នលោកកំពុងតែធ្លាក់ខ្លួនឈឺខ្លាំង ថែមទាំងមានជីវភាពខ្វះខាត ។ មិនតែប៉ុណ្ណោះភរិយារបស់លោកដែលមានវ័យជរាដូចគ្នានោះក៏កំពុងតែមានជម្ងឺប្រចាំកាយផងដែរនោះពុំមានអ្នកណាជួយអ្នកណាបានឡើយ ។
តាមការឱ្យដឹងពីលោកម៉ា ស៊ីថេត ដែលបានធ្វើដំណើរយកអំណោយផ្ទាល់ខ្លួន ដែលមានអង្ករ៣ការ៉ុង មីពីរកេះ រួមជាមួយសម្ភារៈហូបចុកប្រចាំថ្ងៃជាច្រើនព្រមទាំងទឹកប្រាក់១លានរៀល ទៅជូនលោកដោយផ្ទាល់នៅផ្ទះរបស់លោកនៅខេត្តសៀមរាប កាលពីប៉ុន្មានថ្ងៃមុននេះបានឱ្យដឹងថា លោកឆោម ឆារី ពិតជាជួបការលំបាកខ្លាំងណាស់ពុំមានកូននៅមើលថែ ដោយរស់នៅជាមួយគ្រួសាររបស់លោកក្នុងខ្ទមដ៏តូចមួយ ហើយថែមទាំងមានជម្ងឺប្រចាំកាយទាំងពីរនាក់ទៀតផង ។ ក្នុងឱកាសជួបនិយាយលេងជាមួយលោក ម៉ា ស៊ីថេត លោក ឆោម ឆារីបានមានប្រសាសន៍ថា«ខ្ញុំហូបបាន គ្រាន់តែអត់អីហូប ព្រោះគ្មានបច្ច័យទិញអីហូប»គ្រាន់តែឭសម្ដីបែបនេះភ្លាមលោក ម៉ា ស៊ីថេតប្រាប់ថា ខ្ញុំពិតជាមានការតក់ស្លុតខ្លាំងណាស់ អួលដើមកនិយាយមិនចង់ចេញនោះទេ ។
លោកព្រឹទ្ធាចារ្យឆោម ឆារី បានមានប្រសាសន៍ឱ្យដឹងទៀតថា ខ្ញុំលះបង់កម្លាំងកាយចិត្តបម្រើ និងលើកស្ទួយវិស័យកីឡាប្រដាល់សាកលអស់រយៈពេលជាច្រើនឆ្នាំមកហើយរហូតដណ្ដើមបានមេដាយជាច្រើនគ្រឿងមកជូនជាតិទៀតផង ប៉ុន្តែទីបំផុតនៅពេលដែលលោកធ្លាក់ខ្លួនបែបនេះបែរជាសហព័ន្ធមិនយកចិត្តទុកដាក់បន្តិចណាសោះ ។ ហើយអ្នកដែលមកមើលលោកមុនគេ ជាលោកម៉ា ស៊ីថេតទៅវិញ ។
លោកព្រឹទ្ធាចារ្យប្រដាល់សាកលដែលមានវ័យ៦៩ឆ្នាំ រូបនេះបានមានប្រសាសន៍ឱ្យបានដឹងទៀតថា ពេលនេះជីវិតរបស់លោកគ្មានអ្វីទៀតទេ គ្មានកូចៅនៅក្បែរ មិនអាចធ្វីអ្វីបានក្រៅតែពីសម្ងំរស់នៅក្នុងកូនខ្ទមដ៏តូចមួយជាមួយយាយតាពីរនាក់ប៉ុណ្ណោះ ។ ជួនកាលបានអ្នកជិតខាងផ្ដល់បាយ និងម្ហូបគ្រាន់ចំអែតក្រពះបន្តិចបន្តួចប៉ុណ្ណោះ ។ ហើយលោកក៏មិនភ្លេចគុណដល់លោក ម៉ា ស៊ីថេត ដែលបានចំណាយពេលវេលាកម្លាំងកាយចិត្តមកពីឆ្ងាយមកសួរសុខទុកលោកផ្ទាល់បែបនេះ ៕
ចែករំលែកព័តមាននេះ