ប្រទេសវេណេស៊ុយអេឡា ះ រដ្ឋាភិបាលវេណេស៊ុយអេឡាប្រកាស ពីការវិលមករកសកម្មភាពធម្មតាវិញហើយ ទាំងផ្នែកឯកជនទាំងផ្នែករដ្ឋចាប់ពីថ្ងៃទី១៤មីនាទៅ ក្រោយការជាប់គាំងអស់មួយសប្ដាហ៍ មកពីការដាច់ភ្លើងអគ្គិសនីដ៏ធំ ដែលប្រជាជននិងសេដ្ឋកិច្ចជាតិបន្តខាតបង់យ៉ាងច្រើនថែមទៀត មកពីផលវិបាកនៃការដាច់ភ្លើង នាំឲ្យមានការភ័យខ្លាចវិបត្តិធ្លាក់កាន់តែជ្រៅថែមទៀត។
រដ្ឋមន្ត្រីព័ត៌មានវេណេស៊ុយអេឡា លោកJORGE RODRIGUEZអះអាងកាលពីយប់ថ្ងៃទី១៣មីនាថា ជាផ្លូវការភ្លើងអគ្គិសនីត្រូវបានស្ដារឡើងវិញ១០០% ប៉ុន្តែនៅមានការដាច់ភ្លើងរអាក់រអួលក្នុងរដ្ឋជាច្រើន និងមានការខ្វះភ្លើងនៅភាគខាងលិចប្រទេស។ រដ្ឋមន្ត្រីរូបនោះប្រកាសផ្ទាល់តាមទូរទស្សន៍ថា ប្រធានាធិបតីលោកនីកូឡាស់ម៉ាឌូរ៉ូបានសម្រេចថា រាល់សកម្មភាពទាំងផ្នែកឯកជន ទាំងផ្នែករដ្ឋ បណ្ដារោងចក្រ សាលារៀន សេវាកម្មនានានឹងអាចដំណើរការឡើងវិញចាប់ពីថ្ងៃទី១៤មីនាទៅ។ សកម្មភាពទាំងនោះត្រូវផ្អាក តាមបទបញ្ជារបស់ប្រធានាធិបតី ក្រោយការដាច់ភ្លើងពីថៃ្ងទី៧មីនា វេលាម៉ោង១៦និង៥០នាទីម៉ោងក្នុងស្រុកមក។
ទោះជាភ្លើងអគ្គិសនីត្រូវបានស្ដារឡើងវិញជាបន្តបន្ទាប់ តែវេណេស៊ុយអេឡាបន្តសកម្មភាពឡើងវិញ ដោយរអាក់រអួលនិងយឺតៗ ក្នុងនោះរួមទាំងនៅក្នុងរដ្ឋធានី ដែលធនាគារនិងទីតាំងពាណិជ្ជកម្មនានានៅតែបិទទ្ធារ ហើយការដឹកជញ្ជូនសាធារណៈ ដែលរអាក់រអួលស្រាប់ ក្នុងពេលធម្មតានៅតែផ្អាក។ ពលរដ្ឋប្រទេសនេះភាគច្រើន ហាក់លែងខ្វល់ពីរឿងរកសីុ តែការបារម្ភ្ខ្លាំងរបស់ពួកគេ នៅតែផ្ដោតលើការរកទឹក។ មនុស្សម្នាបន្តកន្ទុយគ្នាគ្រប់ទីកន្លែងតាមទីក្រុង នៅមុខបណ្ដារថយន្តសីុទែនដឹកទឹក ដែលអាជ្ញាធរបានជួលដឹកទឹកចែកចាយ។ បណ្ដាញទឹកស្អាតនៅពុំទាន់អាចស្ដារឡើងវិញឡើយ ទោះបីជានៅក្នុងរដ្ឋធានីការ៉ាកាស់៕
ចែករំលែកព័តមាននេះ