ខេត្តសៀមរាប ៖ ភាពល្បីល្បាញនៃរមណីយដ្ឋានអង្គរមិនត្រឹមតែទាក់ទាញអ្នកស្រាវជ្រាវ និងភ្ញៀវទេសចរទូទៅប៉ុណ្ណោះទេ បុគ្គលល្បីៗក្នុងលោក និងអ្នកមានលំដាប់ពិភពលោកជាច្រើននាក់ក៏ទាក់ចិត្តមិនខកខាន ក្នុងដំណើរមកទស្សនាអង្គរដែរ ។
ជាក់ស្តែងកាលពីថ្ងៃទី១២ ខែមីនា ឆ្នាំ២០១៩ ចាត់ទុកជាថ្ងៃពិសេសមួយទៀត ដែលឃើញមានវត្តមានមហាសេដ្ឋីចិន និងជាប្រធានក្រុមហ៊ុន Alibaba គឺ លោកចេក ម៉ា (Jack Ma) បានមកបំពេញទស្សនកិច្ចពេញមួយថ្ងៃនៅប្រាសាទនានាក្នុងតំបន់អង្គរ ។
នាឱកាសនោះលោកសុខ សង្វារ អគ្គនាយករងនៃអាជ្ញាធរជាតិអប្សរាបានជូនដំណើរលោកចេក ម៉ា ដើរទស្សនាប្រាសាទអង្គរវត្ត ។ លោកសុខ សង្វារ ឲ្យដឹងថា លោកចេក ម៉ា ជាមនុស្សសុភាពរាបសាគួរឲ្យគោរព ។
ថ្វីដ្បិតលោកជាមហាសេដ្ឋីពិតមែន តែឥរិយាបថរបស់លោកបានបង្ហាញនូវការគោរព ផ្តល់តម្លៃយ៉ាងខ្លាំងចំពោះប្រាសាទខ្មែរ ។ លោកបានសួរសំណួរនានាដែលពាក់ព័ន្ធនឹងការគ្រប់គ្រងប្រាសាទ ក្នុងភាពជាអ្នកចង់ចេះដឹងពិតប្រាកដ និងផ្តល់ការគោរពយ៉ាងជ្រាលជ្រៅចំពោះអង្គរ ។
លោក សុខ សង្វារ បន្តថា តាមការបញ្ជាក់របស់លោកចេក ម៉ា លោកពិតជាស្ងើចសរសើរនូវភាពអស្ចារ្យនៃប្រាសាទខ្មែរនិងកោតសរសើរនូវការគ្រប់គ្រងរមណីយដ្ឋានអង្គរប្រកបដោយការទទួលខុសត្រូវខ្ពស់ ។ មហាសេដ្ឋីរូបនេះនឹងមកកាន់រមណីយដ្ឋានអង្គរនាឱកាសក្រោយទៀត ដោយការធ្វើដំណើររបស់លោកនាពេលនេះ គ្រាន់តែជាលើកដំបូងប៉ុណ្ណោះ តែច្បាស់ណាស់នឹងមានលើកទី២ ឬទី៣បន្តទៀត ។
លោកសុខ សង្វារ ជឿជាក់ថា តាមរយៈវត្តមានរបស់លោកចេក ម៉ា ក៏ដូចជា បុគ្គល ល្បីៗផ្សេងទៀតក្នុងពិភពលោកក្នុងការមកទស្សនារមណីយដ្ឋានអង្គរ ពិតជាធ្វើឲ្យភ្ញៀវទេសចរគ្រប់ជាតិសាសន៍ កាន់តែចាប់អារម្មណ៍មកទស្សនារមណីយដ្ឋានអង្គរកាន់តែច្រើនឡើងៗជារៀងរាល់ឆ្នាំបន្ថែមទៀត ៕
ចែករំលែកព័តមាននេះ