សហរដ្ឋអាមេរិក ះ ក្រោយបដិសេធមិនព្រមផ្អាកការហោះហើររបស់បណ្ដាយន្តហោះធុនប៊ូអីុង737MAX ដូចប្រទេសនិងក្រុមហ៊ុនអាកាសចរណ៍ជាច្រើន ទីបំផុតអាមេរិកត្រូវបង្ខំចិត្តប្រកាសផ្អាកការហោះហើរ បណ្ដោះអាសន្នបណ្ដាយន្តហោះប្រភេទនោះដែរ។
ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៣មីនាឲ្យដឹងថា យន្តហោះធុនប៊ូអីុង737MAX8 និង737MAX9ទាំងអស់ត្រូវផ្អាកការហោះហើរ។ ការប្រកាសនោះកើតមាន៣ថ្ងៃក្រោយការធ្លាក់យន្តហោះ ធុននោះមួយគ្រឿងរបស់ក្រុមហ៊ុនអាកាសចរណ៍អេត្យូពីបណ្ដាលឲ្យមនុស្សជិះក្នុងនោះទាំង១៥៧នាក់ស្លាប់ទាំងអស់មក។
លោកដូណាល់ត្រាំថ្លែងនៅសេតវិមានថា យើងនឹងចេញការហាមឃាត់ជាបន្ទាន់ រាល់ការហោះហើររបស់បណ្ដាយន្តហោះ ប៊ូអីុង737MAX8 និង737MAX9។ សន្តិសុខរបស់ពលរដ្ឋអាមេរិកនិងរបស់អ្នកដំណើរទាំងអស់ជាអាទិភាពដាច់ខាតរបស់យើង។
ចំណែកអាជ្ញាធរអាកាសចរណ៍សហព័ន្ធអាមេរិកFAA ក៏ប្រកាសនាថ្ងៃទី១៣មីនាដែរថា ការផ្អាកការហោះហើររបស់យន្តហោះទាំងនោះ នឹងមានជាធរមាន ក្នុងអំឡុងពេលសើុបអង្កេត ដែលនឹងផ្ដោត លើបណ្ដាព័ត៌មានក្នុងប្រអប់ខ្មៅទាំង២ របស់យន្តហោះអេត្យូពីដែលធ្លាក់។ ប្រអប់ខ្មៅទាំង២នោះត្រូវបញ្ជូនទៅធ្វើការវិភាគនៅប្រទេសបារាំង។ FAAបានពិនិត្យទិន្នន័យមួយចំនួនដែលបង្ហាញលក្ខណៈប្រហាក់ប្រហែលគ្នា រវាងគ្រោះមហន្តរាយនៃយន្តហោះរបស់ក្រុមហ៊ុន ETHIOPIAN AIRLINESនិងគ្រោះមហន្តរាយនៃយន្តហោះ របស់ក្រុមហ៊ុនឥណ្ឌូណេសីុLION AIR ដែលកើតមានកាលពីខែតុលាឆ្នាំ២០១៨។
ភាគហ៊ុនរបស់ក្រុមហ៊ុនប៊ូអីុងបានធ្លាក់ចុះយ៉ាងខ្លាំង ពេលប្រធានាធិបតីប្រកាសមុននេះបន្តិច ពីការផ្អាកការហោះហើររបស់បណ្ដាយន្តហោះ 737MAX8 និង737MAX9។
គ្រោះមហន្តរាយនៃយន្តហោះប៊ូអីុង737MAXទី២ក្នុងរយៈពេលត្រឹម៥ខែ មុនសហរដ្ឋអាមេរិក ប្រទេសជាច្រើនព្រមទាំងបណ្ដាក្រុមហ៊ុនអាកាសចរណ៍ពិសេសនៅអឺរ៉ុប បានផ្អាកការហោះហើររបស់យន្តហោះធុននោះទាំងអស់ ឬហាមឃាត់មិនឲ្យហោះកាត់ដែនអាកាសពួកគេ៕
ចែករំលែកព័តមាននេះ