យោងតាមការសិក្សាថ្មីមួយបានបង្ហាញថា អ្នកចូលចិត្តផឹកកាហ្វេ និងតែអាចជួយកាត់បន្ថយឱកាសកើតជំងឺដុះសាច់នៅក្នុងខួរក្បាលបាន ជាពិសេសចំពោះមនុស្សពេញវ័យ ។ ការរកឃើញដែលបានមកពីការសិក្សាលើមនុស្សពេញវ័យនៅទ្វីបអឺរ៉ុបជាង៥០០.០០០នាក់ បានបន្ថែមទម្ងន់ភស្តុតាងទៅលើលទ្ធផលនៃការសិក្សារបស់សហរដ្ឋអាមេរិក កាលពីពេលមុនមួយដែលបានរកឃើញថា ការផឹកកាហ្វេ និងតែក្នុងកម្រិតខ្ពស់ ជួយកាត់បន្ថយឱកាសកើតជំងឺ Gliomas ។ Gliomas គឺជាក្រុមប្រភេទជំងឺដុះសាច់នៅក្នុងខួរក្បាលដែលបានធ្វើឱ្យមនុស្សពេញវ័យប្រហែលជា៨០%កើតមហារីកខួួរក្បាល ។
ទោះបីជាយ៉ាងនេះក៏ដោយ វាមិនមែនបង្ហាញថា ភេសជ្ជៈទាំងពីរនេះពិតជាអាចការពារមិនឱ្យកើតជំងឺខាងលើបាន១០០%ឡើយ ។ លោកស្រីដូមីនិច មីសូត ប្រធានដឹកនាំការស្រាវជ្រាវរបស់សាកលវិទ្យាល័យ Brown University នៅរដ្ឋរ៉ូដអាយឡិន និងសាកលវិទ្យាល័យ Imperial College London បានថ្លែងថា អ្វីៗទាំងអស់នេះគឺជាលទ្ធផលដំបូង ។ លទ្ធផលនៃការសិក្សានេះមិនគួរជាមូលហេតុ ដែលតម្រូវឱ្យអ្នកណាម្នាក់ផ្លាស់ប្តូរបរិមាណប្រើប្រាស់តែនិងកាហ្វេរបស់ពួកគេនោះទេ ។
បើទោះបីជាកាហ្វេ និងតែមានឥទ្ធិពលលើជំងឺដុះសាច់ក្នុងខួរក្បាលយ៉ាងណាក៏ដោយ តែកម្លាំងប្រឆាំងរបស់វាតិចតួចខ្លាំងណាស់ ។ ជំងឺដុះសាច់ក្នុងខួរក្បាលជាទូទៅមិនមែនធម្មតានោះទេ ជាឧទាហរណ៍នៅទ្វីបអឺរ៉ុបអត្រាកើតជំងឺនេះក្នុងចំណោមស្ត្រី១០០.០០០នាក់ គឺមានរវាងពី៤ទៅ៦ករណី ខណៈដែលបុរសមាន៦ទៅ៨ករណី ។ ជាទូទៅ ក្នុងមនុស្សម្នាក់មានអត្រាប្រឈមកើតជំងឺនេះតិចជាង១% ។ លោកស្រីដូមីនិចមីសូត បានលើកឡើងថា ប្រសិនបើការប្រើប្រាស់តែ និងកាហ្វេច្រើនពិតជាអាចការពារមនុស្សម្នាក់ឱ្យគេចផុតពីជំងឺ Gliomas នោះ វានឹងផ្តល់ឱ្យបណ្តាអ្នកស្រាវជ្រាវយល់កាន់តែច្បាស់នូវមូលហេតុនៃការកើតជំងឺដុះសាច់ ។ លោកស្រីបានកត់សម្គាល់ថា ក្នុងពេលឥឡូវនេះ យើងមិនបានដឹងច្រើនថា អ្វីដែលបង្កឱ្យមានជំងឺមហារីកខួរក្បាលនោះទេ ។
ការរកឃើញដែលបានចុះផ្សាយនៅក្នុងព្រឹត្តិបត្រ American Journal of Clinical Nutritionបានកើតចេញពីការសិក្សានៅក្នុងប្រទេសអឺរ៉ុបចំនួន១០ ដោយស្រាវជ្រាវបានធ្វើលើផ្នែកដែលងាយនឹងកើតជំងឺមហារីកបំផុត ។ ដើមដំបូង បុរសនិងស្ត្រីចំនួន៥២១.៤៨៨នាក់ អាយុចន្លោះពី២៥ឆ្នាំទៅ៧០ឆ្នាំ បានឆ្លើយសំណួរពីរបបអាហារ ការហូបចុកប្រចាំថ្ងៃ ការហាត់ប្រាណ ការជក់បារី និងផ្នែកពាក់ព័ន្ធក្នុងការរស់នៅដទៃទៀតរបស់ពួកគេ ។ បន្ទាប់មក គេបានវិភាគដោយផ្តោតលើអ្នកចូលរួមជាង៤១ម៉ឺននាក់ ។ សូមបញ្ជាក់ថា ការសិក្សានេះបានចំណាយពេលអស់ជាង៨ឆ្នាំ តែទោះជាយ៉ាងនេះក្តី បណ្តាអ្នកស្រាវជ្រាវពុំបានបញ្ជាក់ឱ្យដឹងថា តើហេតុអ្វីបានជាតែនិងកាហ្វេអាចទប់ស្កាត់ជំងឺខាងលើបាននោះទេ ។
ប៉ុន្តែការសិក្សាតាមរយៈមន្ទីរពិសោធន៍មួយក្នុងពេលថ្មីៗនេះបានរកឃើញថា សារធាតុកាហ្វេអុីនដែលមានក្នុងកាហ្វេអាចជួយពន្យឺតការលូតលាស់ប្រភេទជំងឺ Gliomas ដែលគេហៅថា Glioblastoma ។ បន្ថែមពីលើនេះទៀត ទាំងក្នុងតែនិងកាហ្វេ គឺមានផ្ទុកសារធាតុប្រឆាំងនឹងអុកស៊ីដកម្ម(antioxidants)ដែលអាចជួយការពារកោសិការាងកាយពីការបំផ្លាញ ។លោកស្រីដូមីនិចមីសូត បានបញ្ជាក់ថា ការស្រាវជ្រាវបន្ថែមទៀតចាំបាច់ត្រូវធ្វើជាបន្តលើភេសជ្ជៈទាំងពីរដើម្បីបញ្ជាក់ថា មានការជាប់ពាក់ព័ន្ធគ្នារវាងការប្រើប្រាស់កាហ្វេនិងតែព្រមទាំងជំងឺ Gliomas ៕
ចែករំលែកព័តមាននេះ