វៀតណាមស្ថិតក្នុងចំណោមទីផ្សារដឹកជញ្ជូនដែលលូតលាស់លឿនជាងគេ
ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃទី១១ មីនា កន្លងមកថា ប្រទេសវៀតណាមត្រូវបានចាត់ចូលក្នុងចំណោមទីផ្សារដឹកជញ្ជូនថ្មីសំខាន់ៗទាំង១០…
ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃទី១១ មីនា កន្លងមកថា ប្រទេសវៀតណាមត្រូវបានចាត់ចូលក្នុងចំណោមទីផ្សារដឹកជញ្ជូនថ្មីសំខាន់ៗទាំង១០ ។
យោងទៅតាមក្រុមហ៊ុនដឹកជញ្ជូន Agility បានឲ្យដឹងថា ប្រទេសវៀតណាមបានដណ្តើមយកចំណាត់ថ្នាក់លេខ១០របស់ប្រទេសថៃក្នុងសន្ទស្សន៍ទីផ្សារដឹកជញ្ជូនថ្មីៗរបស់ Agility ដែលមានពិន្ទុសរុបស្មើ ៥.៤៨ ។
សន្ទស្សន៍នេះមើលលើឱកាសដឹកជញ្ជូនក្នុងប្រទេស ឱកាសដឹកជញ្ជូនអន្តរជាតិ និងមូលដ្ឋានអាជីវកម្មដើម្បីវាស់វែងការអភិវឌ្ឍន៍ទីផ្សារដឹកជញ្ជូនរបស់ទីផ្សារថ្មីៗចំនួន ៥០ ។
យោងទៅតាម Agility បានឲ្យដឹងទៀតថា ទីផ្សារដឹកជញ្ជូនអន្តរជាតិវៀតណាមគឺជាកត្តាជំរុញសំខាន់ជាងគេក្នុងសន្ទស្សន៍ឆ្នាំ ២០១៩នេះ។
Aglility បាននិយាយក្នុងរបាយការណ៍ខ្លួនថា “សមត្ថភាពរបស់ប្រទេសវៀតណាមក្នុងការចរចានិងសម្រេចកិច្ចព្រមព្រៀងទ្វេភាគី និងពហុភាគីថ្មីៗបានជំរុញដល់សមត្ថភាពរបស់ប្រទេសនេះក្នុងការចូលក្នុងទីផ្សារថ្មី ហើយអាចនឹងបន្តមើលឃើញការលូតលាស់ក្នុងរយៈពេលវែងផងដែរ។”
សម្រាប់ក្នុងស្រុកវិញ Agility បាននិយាយថា វៀតណាមមានឱកាសច្រើនប៉ុន្តែមិនខ្លាំងទេ និងបានបន្ថែមថាការដឹកជញ្ជូនបែបកិច្ចសន្យា និងទីផ្សារដឹកជញ្ជូនល្បឿនលឿនក្នុងស្រុកមានតម្លៃប្រមាណ៧៥០លានដុល្លារក្នុងមួយឆ្នាំ ដោយមានអត្រាលូតលាស់ប្រចាំឆ្នាំខ្ពស់ល្អផងដែរ។
ប៉ុន្តែប្រទេសវៀតណាមជាប់ចំណាត់ថ្នាក់លេខ២០ក្នុងផ្នែកមូលដ្ឋានអាជីវកម្មដែលវាស់វែងបរិស្ថានច្បាប់ ឥណទាន និងបំណុល ការអនុវត្តកិច្ចសន្យា ស្ថេរភាពតម្លៃ ការចូលក្នុងទីផ្សារ និងស្ថេរភាពក្នុងស្រុក។ Agility ផ្តល់យោបល់មកថាប្រទេសវៀតណាមត្រូវតែដោះស្រាយបញ្ហាផ្នែកច្បាប់ដែលកំពុងដាក់សម្ពាធលើវិស័យដឹកជញ្ជូនក្នុងស្រុកនេះ។
របាយការណ៍ខាងលើបានឲ្យដឹងថា “ការស្ថាបនាមូលដ្ឋានអាជីវកម្មល្អតាមរយៈបរិស្ថានច្បាប់ដែលបង្កើតជំនឿចិត្តវិនិយោគិនគឺជាយុទ្ធសាស្ត្រដ៏សំខាន់សម្រាប់ការជំរុញដល់ដំណើរការនិងសក្តានុពលនៃទីផ្សារដឹកជញ្ជូន។”
គួរបញ្ជាក់ទៀតថា ប្រទេសចិនជាប់ចំណាត់ថ្នាក់លេខមួយក្នុងសន្ទស្សន៍របស់ Agility ប្រចាំឆ្នាំ ២០១៩ ដែលទទួលបានពិន្ទុ ៨.៨៩ ខណៈដែលប្រទេសឥណ្ឌាជាប់ចំណាត់ថ្នាក់លេខពីរដែលបានពិន្ទុ ៧.៣៩ ។ អេមីរ៉ាតអារ៉ាប់រួម ឥណ្ឌូនេស៊ី ម៉ាឡេស៊ី អារ៉ាប៊ីសាអូឌីត ម៉ិកស៊ិក កាតា និងតួកគីក៏ជាប់ក្នុងចំណាត់ថ្នាក់នេះដែរ ៕
ចែករំលែកព័តមាននេះ