ខេត្តកោះកុង ៖ សម្តេចតេជោ ហ៊ុន សែន នាយករដ្ឋមន្ត្រីបានឲ្យដឹងថា ខេត្តត្រាតរបស់ប្រទេសថៃបានសម្រេចផ្តត់ផ្គង់ទឹកដូនប្រជាពលរដ្ឋនៅខេត្តកោះកុងប្រើប្រាស់ ។ ខណៈដែលខេត្តនេះបានប្រឈមខ្វះទឹកប្រើប្រាស់ ។
សម្តេចតេជោ ហ៊ុន សែន នាយករដ្ឋមន្ត្រីបានលើកឡើងក្នុងពិធីសំណេះសំណាលជាមួយកម្មករនៅខេត្តកោះកុង នៅព្រឹកថ្ងៃទី១៣ ខែមីនា នេះថា «យប់មិញខ្ញុំបានទទួលសារជាសឡេង និងរូបភាពពីលោកទេសរដ្ឋមន្ត្រីចម ប្រសិទ្ធ រដ្ឋមន្ត្រីក្រសួងសិប្បកម្ម និងឧស្សាហកម្មបានផ្ញើឲ្យខ្ញុំថា កង្វល់នៅកោះកុង បច្ចុប្បន្ននេះកំពុងខ្វះទឹកផឹក ហើយនេះជាបញ្ហាអីញ្ចឹងសុទ្ធតែចំណុចអ្នកទាំងអស់គ្នាបានដឹង ហើយថា យើងកំពុងសាងសង់ ហើយឲ្យឧកញ៉ា លី យ៉ុង ផាត់ ដើម្បីទទួលការសាងសង់សម្រាប់រយៈពេលវែង ប៉ុន្តែត្រូវការពេលវេលា» ។ សម្តេចក៏បានលើកឡើងថា ពេលនេះទឹកនៅក្នុងខេត្តកោះកុងអាចផ្គត់ផ្គង់ស្ថិតក្នុងកម្រិតណាមួយ ឬអាចក្នុងរយៈពេល១ខែ ប៉ុន្តែឥឡូវនេះខ្ញុំបានទទួលដំណឹងថា ខេត្តត្រាតរបស់ប្រទេសថៃបានជួយផ្គត់ផ្គង់ទឹកមកខេត្តកោះកុង ។
សម្តេចក៏បានស្នើឲ្យមានការរៀបចំលក្ខខណ្ឌសម្បត្តិ ដើម្បីតទឹកពីខេត្តត្រាតមកផ្តត់ផ្គង់ឲ្យអ្នករស់នៅខេត្តកោះកុងកុំអត់មានទឹកប្រើប្រាស់ ។ សម្តេចថា ទឹកសម្បូរហើយសម្បូរ ហើយនៅកោះកុងតែជាទឹកប្រៃ ដូច្នេះត្រូវរកវិធីតបញ្ជូនទឹកចេញពីប្រទេសថៃយកចូលមកប្រទេស យើងតាមរយៈការទុយោ ឬធម្យោបាយណាក៏ដោយ ដើម្បីយកមកផ្តត់ផ្គង់ប្រជាពលរដ្ឋសម្រាប់ប្រើប្រាស់រហូតដល់មានភ្លៀងធ្លាក់» ។ សម្តេចក៏បានលើកឡើងថា តាមតំបន់មាត់សមុទ្រត្រូវមានភ្លៀងធ្លាក់លឿនជាងតំបន់ដ៏ទៃ ក៏ប៉ុន្តែដោយសារតែការប្រែប្រួលអាកាសធាតុឆ្នាំនេះ គឺលំបាក ។
សម្តេចក៏បានថ្លែងអំណរគុណដល់ខេត្តត្រាតប្រទេសថៃដែលបានផ្តល់ទឹកជូនមកខេត្តកោះកុង ដើម្បីផ្គត់ផ្គង់ផងដែរ ៕
ចែករំលែកព័តមាននេះ