ក្រុងប៉ោយប៉ែត ៖ គ្រោះថ្នាក់មួយបានកើតឡើងកាលពីវេលាម៉ោង១១និង២០នាទីព្រឹក ថ្ងៃទី២០ មីនា នៅខាងកើតមន្ទីរគណបក្សប្រជាជនកម្ពុជាប្រមាណ១០០ម៉ែត្រលើដងផ្លូវជាតិលេខ៥ ដោយរថយន្តម៉ាកឡង់គ្រីស្ស័រ ពណ៌ស្លែ ចង្កូតស្តាំមួយគ្រឿងពាក់ស្លាកលេខភ្នំពេញ 2D 9781 បានធ្លាក់ផ្លូវក្រឡាប់ផ្ងារជើងឡើងលើទ្រមេឃ ។
តាមលោកសារឿន ជាមន្ត្រីយោធា និងជាអ្នករួមដំណើរក្នុងរថយន្តដែលជួបគ្រោះថ្នាក់នេះបានឱ្យដឹងថា រថយន្តម៉ាកឡង់គ្រីស្ស័រខាងលើ ធ្វើដំណើរពីទិសប៉ោយប៉ែតឆ្ពោះទៅខេត្តបន្ទាយមានជ័យ ហើយអ្នកជិះនៅក្នុងរថយន្តនោះមានគ្នាចំនួន៣នាក់ (ប្រុស២នាក់ និងស្ត្រី១នាក់) បើកបរដោយលោកវរសេនីយ៍ទោម៉ឹង មុន្នី ជាមន្ត្រីយោធាទំនាក់ទំនងព្រំដែនកម្ពុជា-សៀម ប្រចាំក្រុងប៉ោយប៉ែត។ លុះមកដល់ចំណុចខាងលើស្ថិតក្នុងភូមិគីឡូម៉ែត្រលេខ៤ សង្កាត់ប៉ោយប៉ែត រថយន្តបានបើកវ៉ារថយន្តមួយគ្រឿងទៀត ហើយក៏វាក់នឹងរថយន្តនៅពីខាងមុខ ទើបលោកវរសេនីយ៍ទោជាអ្នកបើកបរបួងចង្កូតធ្លាក់ផ្លូវតែម្តង តែចំពោះអ្នករួមដំណើរនៅក្នុងរថយន្តពុំមាននរណាម្នាក់មានគ្រោះថ្នាក់ដល់អាយុជីវិតទេ គឺគ្រាន់តែរងរបួសស្រាលប៉ុណ្ណោះ។
ចំណែកលោកវរសេនីយ៍ទោម៉ឹង មុន្នី បានឱ្យដឹងថា រថយន្តដែលជួបគ្រោះថ្នាក់ខាងលើ គឺពិតជារបស់លោកពិតមែន ហើយខ្លួនលោកផ្ទាល់ជាអ្នកបើកបរដោយខ្លួនឯង។ នៅពេលមកដល់ចំណុចខាងលើដោយសារវាក់នឹងរថយន្តនៅខាងមុខ ទើបលោកបួងចង្កូតទម្លាក់ផ្លូវតែម្តងកុំឱ្យមានគ្រោះថ្នាក់ដល់រថយន្តគេមួយគ្រឿងទៀត ។ សំណាងល្អដែលអ្នកជិះនៅក្នុងរថយន្តគ្មានអ្នកមានគ្រោះថ្នាក់ដល់អាយុជីវិត គឺគ្រាន់តែរងរបួសស្រាលប៉ុណ្ណោះ៕
ចែករំលែកព័តមាននេះ