ខេត្តកណ្ដាល ៖ បុរសម្នាក់ត្រូវជនមិនស្គាល់អត្តសញ្ញាណ២នាក់កាប់ប្រហារ បណ្តាលឲ្យស្លាប់ភ្លាមនៅនឹងកន្លែងកើតហេតុ កាលពីរសៀលថ្ងៃទី១២ មីនា ត្រង់ចំណុចមុខផ្ទះតែម្តង ស្ថិតក្នុងភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្តាល ដែលនេះសមត្ថកិច្ចបានអះអាងថា ជាអំពើឃាតកម្ម ។
ជនរងគ្រោះត្រូវគេកាប់ប្រហារនេះឈ្មោះ ក្រង ចំរើន អាយុ៣៨ឆ្នាំ មុខរបរលក់ដូរ នៅភូមិឃុំខាងលើ ។ តាមសាក្សីនៅកន្លែងកើតហេតុបានរៀបរាប់ប្រាប់សមត្ថកិច្ចកន្លងមកជនរងគ្រោះធ្លាប់ប្រើប្រាស់គ្រឿងញៀន និងបានប្រើអំពើហិង្សាក្នុងគ្រួសារជាញឹកជាប់ ជាពិសេសដើរបង្ករឿងជាមួយអ្នកជិតខាង និងអ្នកលក់ដូរដូចគ្នា ។ នៅថ្ងៃកើតហេតុមានជនសង្ស័យ២នាក់ ដែលអ្នកស្រុកភូមិមិនស្គាល់អត្តសញ្ញាណបានជិះម៉ូតូ១គ្រឿងម៉ាកវ៉េវ ពណ៌ខ្មៅមិនចាំស្លាកលេខបានមកហូបមីហិលជាប់ផ្ទះជនរងគ្រោះនៅពេលកំពុងហូបស្រាប់តែជនរងគ្រោះមានសភាពស្រវឹងទ្រេតទ្រោតទៅរករឿង និងវាយជនសង្ស័យ ។
ពេលនោះជនសង្ស័យក៏ខឹងតែមិនបានតបតទេ ហើយក៏នាំគ្នាឡើងជិះម៉ូតូចេញទៅបាត់បានប្រហែលដប់ប្រាំនាទីក្រោយមក ស្រាប់តែជនសង្ស័យបាននាំបក្ខពួកប្រហែលប្រាំនាក់ មធ្យោបាយ៣ម៉ូតូ ប្រដាប់ដោយអាវុធ មានដាវ ដំបង និងដែកបំពង់ទីប មកព្រួតវាយជនរង គ្រោះ បណ្ដាលឲ្យរងរបួសជាទម្ងន់ និងរហូតដល់ស្លាប់បាត់បង់ជីវិតនៅកន្លែងតែម្តង ។ បន្ទាប់ពីធ្វើសកម្មភាពកាប់ប្រហារលើជនរងគ្រោះស្លាប់ហើយ ជនសង្ស័យបាននាំគ្នាឡើងជិះម៉ូតូគេចខ្លួនបាត់អស់នេះហើយគេហៅថា «ធ្លាប់ប៉ះអ្នកខ្សោយបានសេចក្តីសុខ ដល់ជួបជើងខ្លាំងដេក» ។
ករណីខាងលើនេះកម្លាំងសមត្ថកិច្ចនគរបាលជំនាញព្រហ្មទណ្ឌកម្រិតធ្ងន់ខេត្តបានសហការជាមួយនគរបាលស្រុក និងកម្លាំងប៉ុស្តិ៍បាន និងកំពុងធ្វើការស្រាវជ្រាវរកជនដៃដល់ ដើម្បីមកផ្តន្ទាទោសតាមច្បាប់ ៕
ចែករំលែកព័តមាននេះ