ពេលវេលាដែលយើងកំពុងរស់នៅនេះជាឱកាសល្អសម្រាប់ទាំងអស់គ្នាបំពេញកងការកុសលតាមកម្លាំងសទ្ធារៀងៗខ្លួន។ ការធ្វើទានរក្សាសីលគឺជាការឧទ្ទិសមគ្គផលដល់ញាតិមិត្តសាច់សាលោហិតដែលបានចែកឋានទៅផង ហើយបុណ្យកុសលនេះក៏នឹងទ្រទ្រង់យើងឱ្យបានសុខចម្រើនផងដែរ ។
ព្រោះហេតុនោះសូមសប្បុរសកុំធ្វេសប្រហែស កុំប្រមាទឱ្យសោះ គួរខិតខំបំពេញបុណ្យកុសល ខំសន្សំតែអំពើល្អ ធ្វើបុណ្យដាក់បាត្រឱ្យបានច្រើន ព្រោះមនុស្សយើង មានជីវិតប្រមាណខ្លីណាស់ តិចតួចស្តួចស្តើង ឆាប់សឹករេចរឹល ឆាប់ធ្លុះធ្លាយពុកផុយណាស់ គឺមិនជាប់មាំទាំយូរអង្វែងទេ ។ ដូច្នេះការធ្វើទានហ្នឹងហើយជាស្បៀងជូនដំណើរយើងបានទៅដល់ទិសដៅគឺសុគតិភព ។
យើងឃើញស្រាប់ហើយ បុគ្គលដែលស្លាប់បាត់បង់ជីវិតទៅកាន់បរលោកនាយនោះពុំមែនសុទ្ធតែជាអ្នកក្រ ស្លាប់ដោយអត់បាយ អត់ទឹកនោះទេ អ្នកមានខ្លះក៏ស្លាប់នៅលើគំនរទ្រព្យសម្បត្តិដែរ គឺស្លាប់ទាំងអស់គ្នា។ ដូច្នេះជីវិតនេះត្រូវសេចក្តីទុក្ខចោមរោមគ្របសង្កត់ជិះជាន់គ្រប់ពេលវេលា ឥតមានទំនេរស្រាកស្រាន្តសោះឡើយ ។
មានតែបុណ្យកុសលហ្នឹងហើយដែលអាចជួយចម្លងសង្ខារយើងឱ្យរួចពីការញាំញីដោយសេចក្តីទុក្ខ ទៅដាក់ដល់ទីសុខា ។
ចែករំលែកព័តមាននេះ