សហរដ្ឋអាមេរិក-កូរ៉េខាងជើង ះ ទីប្រឹក្សាសន្តិសុខជាតិអាមេរិក លោកJOHN BOLTONថ្លែងកាលពីថ្ងៃទី១០មីនាថា ប្រធានាធិបតីលោកដូណាល់ត្រាំបើកចំហចំពោះការជួបគ្នាកំពូលលើកទី៣ ជាមួយមេដឹកនាំកូរ៉េខាងជើងលោកគីមជុងអ៊ុន។
ក្នុងបទសម្ភាសន៍មួយកាលពីថ្ងៃទី១០មីនា ជាមួយទូរទស្សន៍ABCលោកJOHN BOLTONលាតត្រដាងថា លោកត្រាំបានចំណាយពេលអស់ច្រើនមកហើយ ដើម្បីប៉ុនប៉ងភ្ជាប់ទំនាក់ទំនងផ្ទាល់ខ្លួនជាមួយលោកគីម ហើយលោកមានទំនុកចិត្ត លើទំនាក់ទំនងនោះ។ លោកប្រធានាធិបតីនិយាយថា បើកចំហសម្រាប់ការជួបគ្នាកំពូលលើកទី៣ ប៉ុន្តែពុំទាន់រៀបចំកម្មវិធីនៅឡើយ ។ ពេលសួរពីព័ត៌មាននានាទាន់ទិនដល់ការវិភាគបណ្ដារូបភាពផ្កាយរណប បង្ហាញសកម្មភាពទាំងឡាយនៅទីតាំងបាញ់មីសីុលរបស់កូរ៉េខាងជើង លោកBOLTONគូសបញ្ជាក់ថា លោកមិនបំផ្លោងបណ្ដាពាក្យចចាមអារ៉ាមលើរូបភាពផ្កាយរណបពាណិជ្ចកម្មទាំងនោះឡើយ។ លោកក៏គូសបញ្ជាក់ដែរថា ក្រុងវ៉ាសិុនតោនពុំបានស្នើដល់ក្រុងព្យុងយ៉ាង ឲ្យផ្ដល់បណ្ដារូបភាពនៃទីតាំងបាញ់មីសីុល ដោយលោកគ្រាន់តែប្រាប់ថាលោកនិយាយរឿងនោះ ជាមួយសមភាគីកូរ៉េខាងត្បូងនាថ្ងៃទី១១មីនា។
សារព័ត៌មានអាមេរិកមួយចំនួនមុននេះរាយការណ៍ថា កូរ៉េខាងជើងហាក់ដូចជាចាប់ផ្ដើមកសាងឡើងវិញដោយរហ័សបំផុតទីតាំងបាញ់មីសីុលរយៈឆ្ងាយ មានមូលដ្ឋាននៅTONGCHANG-RI ដោយដកស្រង់ការវិភាគលើបណ្ដារូបភាពផ្កាយរណប របស់មជ្ឈមណ្ឌលសិក្សាយុទ្ធសាស្ត្រនិងអន្តរជាតិ មានមូលដ្ឋាននៅក្រុងវ៉ាសិុនតោន។ ចំណែកតំណាងពិសេសសហរដ្ឋអាមេរិកសម្រាប់កូរ៉េខាងជើង លោកSTEPHEN BIEGUN ថ្លែងកាលពីថ្ងៃទី១១មីនាថា សហរដ្ឋអាមេរិកពុំចង់បានការរំសាយនុយក្លេអ៊ែរបន្តិចម្ដងៗ របស់កូរ៉េខាងជើងឡើយ ហើយអះអាងថា ក្រុងវ៉ាសិុនតោនទាមទារឲ្យមានការរំសាយទាំងស្រុងនិងដោយឆាប់រហ័ស ជាថ្នូរនឹងការការលុបចោលទណ្ឌកម្ម។ លោកថាពុំទាន់មានកាលបរិច្ឆេទណាមួយ តែលោកBIEGUN អះអាងជាថ្មីថា រដ្ឋការលោកត្រាំចង់ឲ្យសម្រេចបានការរំសាយនុយក្លេអ៊ែរជាស្ថាពរនិងអាចត្រួតពិនិត្យបានទាំងស្រុង យ៉ាងយូរនាដំណាច់អាណត្តិទីមួយរបស់ប្រធានាធិបតីនាខែមករាឆ្នាំ២០២១៕
ចែករំលែកព័តមាននេះ