រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានហៅការបង្ក្រាបផលិតផលក្លែងក្លាយប្រៀបដូចជា ការបក់ផ្សែងតែប៉ុណ្ណោះខណៈសម្តេចចង់ឲ្យការបង្ក្រាបដូចជាការពន្លត់ភ្លើង និងចង់ឃើញចាប់ខ្លួនអ្នកពាក់ព័ន្ធត្រូវបានយកដាក់ទោសតាមច្បាប់ ។
ថ្លែងក្នុងពិធីកម្ទេចចោលនូវផលិតផលក្លែងក្លាយជាង៧០តោន នៅថ្ងៃទី១២ ខែមីនា ឆ្នាំ២០១៩ សម្ដេច ស ខេង បានលើកឡើងថា ផលិតផលដែលរឹបអូសបានប្រមាណជាង៧០តោននេះ គឺរបស់ដែលស្តុបក្នុងឃ្លាំង ហើយក៏មានរបស់ក្លែងក្លាយផ្សេងទៀតត្រូវបានចែកចាយ ហើយក៏មិនដឹងថា ផលិតផលប៉ុន្មានទៀតនឹងនាំយកមកចូលនោះ ។ សម្តេចស ខេង បានលើកឡើងថា ក្នុងនាមរាជរដ្ឋាភិបាលសុំកោតសរសើចំពោះសមត្ថកិច្ចដែលបានខិតខំបង្ក្រាបផលលិតផលក្លែងក្លាយ ពិសេសនោះគណៈកម្មាធិកាប្រយុទ្ធប្រឆាំងផលិតផលក្លែងក្លាយ ។ និងមានការចូលរួមពីសមាជិកក្រសួងស្ថាប័នពាក់ព័ន្ធជាច្រើន ។
សម្តេចក៏បានលើកឡើងបញ្ជាក់ថា«មានចំណុចមួយដែលខ្ញុំដាក់សំណួរថា តើចុះបើយើងនាំគ្នាប្រមូលមកហើយ នាំគ្នាកិនកម្ទេចចោល មិនដឹងថា កិនប៉ុន្មានលើកទៀតបានអស់ ហើយការចាប់បានទាំង៤លើកនេះ យើងមិនទាន់បានចាប់អ្នកទទួលខុសត្រូវមកទទួលទោសច្បាប់ផ្លូវច្បាប់នេះជាបញ្ហា ! ។ យើងគ្រាន់តែនាំគ្នាបក់ផ្សែង ប៉ុន្តែមិននាំគ្នាពន្លត់ទេនេះជាបញ្ហា ដែលខ្ញុំគិតថា គណៈកម្មាធិការនេះត្រូវតែធ្វើការឲ្យបានម៉ត់ចត់ថែមទៀត ទន្ទឹមនឹងស្នាដៃដែលខ្លួនធ្វើបាន» ។
សម្តេចបានបន្តថា ជោគជ័យជាមូលដ្ឋានរបស់យើង គឺការលុបបំបាត់ការចរាចរណ៍ ឬលក់ដូរ ផលិតផលក្លែងក្លាយដោយត្រូវស្វែងរកឬសគល់វាដោយកុំធ្វើដូចត្រឹមតែបានបក់ផ្សែង ហើយភ្លើងមិនបានពន្លត់ ហើយផ្សែងនៅតែហ៊ុយ ហើយនាំគ្នាចេះតែបក់នោះ ។ សម្តេចបានបញ្ជាក់ដោយស្នើដល់គណៈកម្មាធិការប្រយុទ្ធប្រឆាំងផលិតផលក្លែងក្លាយត្រូវខិតខំធ្វើការបង្ក្រាបការនាំចូលផលិតផលក្លែងក្លាយឲ្យបានម៉ឺងម៉ាត់បន្ថែមទៀត ។ សម្តេចក៏បានលើកសំណួរ ពីឥទ្ធិពលនៃផលិតផលក្លែងក្លាយនោះយ៉ាងដូចម្តេចបានជាយើងនាំគ្នាធ្វើ ។
សម្តេចក៏បានលើកឡើងថា នៅសម័យមានសង្គ្រាមបានធ្វើឲ្យមនុស្សស្លាប់ ប៉ុន្តែសម័យនេះធ្វើយ៉ាងណាកុំឲ្យផលិតផលក្លែងក្លាយសម្លាប់យើង ។ សម្តេចបញ្ជាក់ថា «ខ្ញុំមិននិយាយសម្លាប់ដោយផលិតផលក្លែងក្លាយនោះទេ ប៉ុន្តែប្រយ័ត្នវាចូលក្នុងខ្លួន ។ នេះជាបញ្ហាយើងហូបទៅអាឡូវមិនអីទេ តែមួយឆ្នាំ ឬពីឆ្នាំក្រោយវាចាប់ផ្តើមធ្វើទុកដែលពិបាកសង្គ្រោះ ។ នេះហើយដែលយើងត្រូវគិតទៅអនាគតពីសុខភាពពីប្រទេសជាតិ និងអនាគតរបស់ប្រជាពលរដ្ឋយើង» ។
សម្តេច សខេង ក៏បានលើកឡើងទៀតថា នៅកម្ពុជាក៏មានការនាំចូលផលិតផលក្លែងក្លាយ និងរបស់អន់គុណភាព ឬហួសការកំណត់ដែលករណីនេះនឹងធ្វើឲ្យប៉ះពាល់ដល់សុខភាពនៅពេលណាដែលប្រើប្រាស់ ឬទទួលទានរហូតដល់អាយុជីវិត និងមុខមាត់ប្រទេសជាតិផងដែរ ។ សម្តេចក៏បានលើកឡើងថា គេអាចវាយតម្លៃប្រទេសកម្ពុជាមានច្បាប់ ប៉ុន្តែតែការគ្រប់គ្រងវាធូររលង់ ហើយបើកឲ្យការចែកចាយផលិតផលនៅក្នុងប្រទេសនោះ ជាងនេះក៏បានប៉ះពាល់អ្នកវិនិយោគ និងអ្នកទេសចរណ៍ផងដែរ ។
ចំណែកលោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានអះអាងថា ការឹតបន្តឹងច្បាប់ដាក់ទោសអ្នកនាំចូលផលិតផលក្លែងក្លាយនៅស្រាល ទើបផលិតផលក្លែងក្លាយចេះតែចរាចរណ៍នៅលើទីផ្សារប្រទេសកម្ពុជាឥតឈប់ឈរ ។ លោកបានបន្តថា បច្ចុប្បន្ននេះទោះជាមានការខិតខំទប់ស្កាត់ពីបណ្ដាលសមត្ថកិច្ចអ្នកអនុវត្តច្បាប់យ៉ាងណាក៏ដោយក៏ជនល្មើសនៅព្យាយាមប្រព្រឹត្តនៅបទល្មើសផលិតផលក្លែងក្លាយនេះ ។ លោកបន្តថា «ព្រោះថា ការចរាចរណ៍ចែកចាយផលិតផលក្លែងក្លាយដែលមានហានីភ័យខ្ពស់ជាងគេនឹងទទួលបានប្រាក់ចំណេញប្រាក់កម្រៃច្រើនទោសទាន់ទៀតសោតនៅមានកម្រិតស្រាល គួបផ្សំការយល់ដឹងរបស់សមត្ថកិច្ចជំនាញនៅលើវិស័យនេះនៅមានកម្រិតនៅឡើយ ៕
ចែករំលែកព័តមាននេះ