សក់ស្កូវ ធ្មេញបាក់ជាដើមនោះមិនមែនជាតួខ្លួនយើងទេ វាជាផលដែលកើតពីអំណាចនៃជរា តែមនុស្សទាំងឡាយដែលបានឃើញថ្ពាល់ខូង សក់ស្កូវ ធ្មេញបាក់ ភ្នែករូងជាដើមនោះ បែរជាសម្គាល់ថា អ្នកនេះដល់វ័យជរាហើយទៅវិញ តាមពិតជរាតែងស្ថិតនៅលើមនុស្សគ្រប់វ័យ ។
ថ្ពាល់ខូង ធ្មេញបាក់ សក់ស្កូវជាដើមនោះ មិនមែនកើតមានតែមនុស្សដែលមានអាយុច្រើននោះទេ ធម្មតាជរារមែងមានដល់សត្វទាំងឡាយទូទៅ មិនថាជាមនុស្សចាស់ ក្មេង ឬកំលោះក្រមុំក៏កើតមានដូចគ្នា គឺជរានេះមានតួនាទីធ្វើឲ្យរូបធម៌ ចូលដល់សភាពចាស់ដូចគ្នាទាំងអស់ ។
សូមទាញយកឧទាហរណ៍មកបញ្ជាក់ដូចតទៅ ក្មេងតូចៗដែលទើបធំរហូតដល់កំលោះក្រមុំនោះ ក៏ដោយអំណាចនៃជរា មនុស្សកំលោះក្រមុំ ដែលចម្រើនវ័យរហូតដល់ចាស់គ្រាំគ្រានោះ ក៏ដោយអំណាចនៃជរាទាញទៅដូចគ្នា ។
ដូចនេះសត្វលោកទាំងអស់មិនថា ចាស់ឬក្មេងតែងមានជរាគ្រប់គ្នា ជរាមានឥទ្ធិពលធ្វើឱ្យអ្វីៗនៅក្នុងលោកនេះវិវឌ្ឍបន្តិចម្តងៗទៅរកចាស់ទ្រុឌទ្រោមរហូតបាត់រូបរាងពីភពផែនដី ។
ចែករំលែកព័តមាននេះ