មេត្តាជាកំពូលធម៌ក្នុងលោក ស្រុកទេសមានសុខសន្តិភាពក៏អាស្រ័យលើមនុស្សមានចិត្តមេត្តាជាធំ តែបើបុគ្គលណាអត់ធម៌មេត្តាក្នុងសន្តាន បុគ្គលនោះរមែងជាមនុស្សចិត្តក្តៅហួតហួងមិនមានអ្នកណាហ៊ាននៅជិត ឬនៅជាមួយបានឡើយ ព្រោះយើងជាមនុស្ស មុខភ្លើងពេញពោរទៅដោយកំហឹង នេះជាផលនៃបុគ្គលឥតធម៌មេត្តា ។
ឯអ្នកមានមេត្តាចិត្ត គឺជាអ្នកមានសេចក្ដីសុខគ្រប់យ៉ាង, អ្នកមានមេត្តាដូចស្រុកដែលមិនខ្វះទឹកប្រើ, អ្នកមានមេត្តារមែងត្រជាក់ដូចកូននៅជិតម្ដាយ, អ្នកមានមេត្តា រមែងដូចត្រីដែលនៅក្នុងទឹកដ៏ត្រជាក់, អ្នកមានមេត្តារមែងក្រអូបដូចក្លិនផ្កាឈូក, អ្នកមានមេត្តា រមែងប្រសើរជាងមាសប្រាក់ទ្រព្យសម្បត្តិ ។
អ្នកមានមេត្តាដូចព្រះរាជាទ្រង់គ្រឿងដ៏អស្ចារ្យ, អ្នកមានមេត្តា ដូចនាវាដ៏ធំសម្រាប់ចម្លងសត្វ, អ្នកមានមេត្តា ដូចស្រុកគ្មានចោរ ឬគ្មានសត្រូវបៀតបៀន, អ្នកមានមេត្តា អាចគេចរួចពីគ្រោះថ្នាក់ផ្សេងៗ, អ្នកមានមេត្តា ជាអ្នកមានសីលមានបញ្ញា, អ្នកមានមេត្តា រមែងជាអ្នកនៅជិតឋានទេវលោក ។
កាលបើចិត្តយើងប្រកបដោយធម៌មេត្តា ប្រៀបបាននឹងទឹកដ៏ត្រជាក់សម្រាប់ស្រោចស្រពលើខ្លួនឯង និងអ្នកដទៃឲ្យបានសេចក្ដីសុខ ឲ្យបាននូវប្រយោជន៍គ្រប់យ៉ាង ។
ចែករំលែកព័តមាននេះ