ខេត្តកំពង់ធំ ៖ សម្ដេចព្រះពុទ្ធជ័យមុនី ឃឹម សន បានមានពុទ្ធដីកាបញ្ជាក់ថា មនុស្សយើងគ្រប់ៗរូបការមានទ្រព្យសម្បត្តិតែមួយមុខមិនគ្រប់គ្រាន់ទេ គប្បីត្រូវមានចំណេះវិជ្ជា និងធម៌សប្បុរសទៀតទើប ទទួលបានសេចក្ដីសុខទាំងផ្លូវលោក…
ខេត្តកំពង់ធំ ៖ សម្ដេចព្រះពុទ្ធជ័យមុនី ឃឹម សន បានមានពុទ្ធដីកាបញ្ជាក់ថា មនុស្សយើងគ្រប់ៗរូបការមានទ្រព្យសម្បត្តិតែមួយមុខមិនគ្រប់គ្រាន់ទេ គប្បីត្រូវមានចំណេះវិជ្ជា និងធម៌សប្បុរសទៀតទើប ទទួលបានសេចក្ដីសុខទាំងផ្លូវលោក និងផ្លូវធម៌។
នេះគឺជាការបញ្ជាក់របស់សម្ដេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណសង្ឃនាយកនៃព្រះរាជាណាចក្រកម្ពុជានិងព្រះមេគណរាជធានីភ្នំពេញដែលមានពុទ្ធដិកានៅថ្ងៃទី១១មីនា ឆ្នាំ ២០១៩ នេះក្នុងពិធីបុណ្យឆ្លងពុទ្ធង្កូរចេតិយ នៅវត្តបទុម ស្ថិតនៅភូមិបទុមលិច ឃុំរុងរឿង ស្រុកស្ទោង ខេត្តកំពង់ធំ។
សម្ដេចព្រះពុទ្ធជ័យមុនី ឃឹម សន មានពុទ្ធដីកាដែរថា ការមានចំណេះវិជ្ជា ធម៌សប្បុរស និងមានធម៌សាមគ្គីវាមិនត្រឹមតែនាំឲ្យយើងគ្រប់រូបៗរស់នៅដោយសេចក្ដីស្ងប់នោះទេ វាក៏ផ្ដល់ប្រយោជន៍ឲ្យប្រទេសជាតិទាំងមូលមានសន្តិភាពនិងប្រជាជាតិបានសុខសប្បាយសម្បូររុងរឿងផងដែរ ។
នៅក្នុងឱកាសនោះជាមួយនឹងការកោតសរសើរចំពោះសុទ្ធាជ្រះថ្លាររបស់ប្រជាពលរដ្ឋក្នុងការថែរក្សាការពារនិងការលើកតម្កើនវិស័យព្រះពុទ្ធសាសនារបស់ប្រជាពលរដ្ឋទាំអស់នៅទីនោះ លោកជំទាវខៀវ ស៊ីណា ជា ចាន់តូ បានអំពាវនាវឲ្យបន្តការរួបរួមសាមគ្គីគ្នាចូលរួមរក្សាសុខសន្តិភាពដែលមានសព្វថ្ងៃឲ្យស្ថិតស្ថេរផងដែរដើម្បីការលើកកម្ពស់ជីវភាពរស់នៅឲ្យកាន់តែប្រសើរថែមទៀត ព្រោះសុខសន្តិភាពបានផ្ដល់ឲ្យយើងរស់នៅបានសេចក្ដីសុខនិងមានឱកាសគ្រប់គ្រាន់ក្នុងការប្រកបកិច្ចការរកទទួលទានបានដោយសេរី។ ជាមួយនេះដែរក៏ដើម្បីអនាគតកូនចៅជំនាន់ក្រោយយើងរស់នៅក្នុងសេចក្ដីសុខ និងសម្បូររុងរឿង ដូចនេះត្រូវបន្តគាំទ្រដល់គោលនយោបាយរបស់រាជរដ្ឋាភិបាលកម្ពុជានាំដឹកនាំដោយសម្ដេចតេជោ ហ៊ុន សែន ជាបន្តទៀត។
នៅឱកាសនោះដែរ លោក ជំទាវ ខៀវស៊ី ណា ជា ចាន់តូ ក៏បានប្រកាសថានឹងចូលរួមជាប្រជាពុទ្ធបរស័ទនិងប្រជាពលរដ្ឋយើងនៅទីនោះជួយជ្រំជ្រែងនិងឧបត្ថម្ភក្នុងការកសាងព្រះវិហារវត្តបទុម ផងដែរដើម្បើឲ្យទីអារាមមួយនេះសក្តិសមជាទីគោរពប្រតិបត្តិរបស់ប្រជាជនគ្រប់ៗរូប។
សូមបញ្ជាក់ថា តាមការបញ្ជាក់ពីលោក ណែត សារី អភិបាលស្រុកស្ទោង បានឲ្យដឹងថា ពុទ្ធង្កូរចេតិយ នៅវត្តបទុមដែលប្រារព្វពិធីបុណ្យឆ្លងនេះគឺផ្ដួចផ្ដើមកសាងក្នុងឆ្នាំ២០១៦ដោយព្រះពិក្ខុ ឡាវ វណ្ណសាត ព្រះគ្រូចៅអធិការស្តីទីបន្តពីព្រះគ្រូទុំ ឌីនិងសុទ្ធាជ្រះថ្លារបស់ពុទ្ធបរិស័ទជិតឆ្ងាយអស់ទឹកប្រាក់សរុបចំនួន ជាង២៣១លានរៀលសម្រាប់តម្កល់ព្រះសារីរឹកធាតុ។
នៅក្នុងឱកាសនោះសម្ដេចព្រះពុទ្ធជ័យមុនី ឃឹម សនបានចូលរួមចាប់កុសលបច្ច័យចំនួន២លានរៀល និងព្រះមេគណខេត្តចំនួន២០០ដុល្លារ ។
ដោយឡែកលោក ជំទាវ ខៀវ ស៊ីណា ជា ចាន់តូ បានប្រគេនច្ច័យចំនួន១០លានរៀលដល់វត្តបទុម និងបានប្រគេនបច្ច័យដល់វត្តចំនួន៧ផ្សេងទៀត ក្នុងមួយវត្តៗចំនួន២លានរៀល និងបានឧបត្ថម្ភដល់កម្មវិធីបុណ្យចំនួន៥លាន៦សែន៥ម៉ឺនរៀល ក្នុងនោះក៏បានផ្ដល់អំណោយមានថវិកា ក្រណាត់ស សារុង សៀវភៅ ប៉ិច និង ខ្មៅដៃចែកជូនលោកតាយលោកតា លោកគ្រូ អ្នកគ្រូ និង សិស្សានុសិស្សដែលបានចូលរួមផងដែរ៕
ចែករំលែកព័តមាននេះ