ប្រទេសវៀតណាម ៖ វៀតណាមអាចនឹងមើលឃើញមានការវិនិយោគផ្ទាល់ពីបរទេសច្រើនក្នុងឆ្នាំ ២០១៩នេះព្រោះវិនិយោគិនបរទេសកាន់តែច្រើនដែលរួមមានក្រុមហ៊ុនធំៗផងដែរក្នុងវិស័យផលិតកម្មបច្ចេកវិទ្យាខ្ពស់ និងសេវាកម្មកំពុងតែជ្រើសយកវៀតណាមជាទីតាំងសម្រាប់ការវិនិយោគ។ ទិន្នន័យដែលបានពីភ្នាក់ងារវិនិយោគបរទេសក្រោមក្រសួងផែនការនិងការវិនិយោគបានបង្ហាញមកថា វិនិយោគិនបរទេសបានវិនិយោគប្រមាណ ៨.៤៧ប៊ីលានដុល្លារក្នុងវៀតណាមទៅហើយក្នុងរយៈពេល២ខែកន្លងមកនេះ ដែលច្រើនជាងរយៈពេលតែមួយកាលពីឆ្នាំមុន។
អ្វីដែលកត់សម្គាល់ពីការវិនិយោគផ្នែកវិទ្យាសាស្ត្រនិងបច្ចេកវិទ្យាបានកើនឡើងយ៉ាងខ្លាំង ដែលធ្វើឲ្យវិស័យនេះក្លាយជាវិស័យដែលមានប្រជាប្រិយភាពជាងគេលេខបីក្នុងប្រទេសវៀតណាមទាក់ទិននឹងការវិនិយោគពីបរទេស។ និន្នាការនេះក៏កំពុងតែបន្តកើតមានឡើងក្នុងខែនេះដែរដោយមានខេត្តនិងទីក្រុងជាច្រើនប្រកាសពីការអនុញ្ញាតគម្រោងគុណភាពខ្ពស់ៗជាបន្តបន្ទាប់។ កាលពីដើមខែមិនា ទីក្រុង Da Nag បាននិយាយថាពួកគេបានអនុញ្ញាតគម្រោងពីររបស់ក្រុមហ៊ុនអាមេរិក American Universal Alloy Corporation និង Alton International Enterprise ដើម្បីបង្កើតមូលដ្ឋានផលិតកម្មរបស់ពួកគេក្នុងតំបន់បច្ចេកវិទ្យាខណៈដែលក្រុមហ៊ុនដទៃទៀតមកពីអាមេរិកដូចជា Key Tronic EMS ក៏កំពុងតែស្នើគម្រោងក្នុងតំបន់នេះដែរ។
ក្នុងប៉ែកខាងជើងនៃខេត្ត Bac Giang វិញក្រុមហ៊ុន Lenovo Group មកពីប្រទេសចិនក៏បង្ហាញពីចំណាប់អារម្មណ៍ចង់បង្កើតរោងចក្រផលិតគ្រឿងកុំព្យូទ័រផងដែរ។ ក្រុមហ៊ុននេះបាននិយាយថាពួកគេនឹងត្រូវការដីប្រមាណពី២០ទៅ៣០ហិចតាដើម្បីការសាងសង់រោងចក្រ ហើយផលិតផលរបស់ពួកគេនឹងត្រូវបាននាំចេញទៅកាន់សហរដ្ឋអាមេរិក។ ជាមួយគ្នានេះផងដែរ លោក Nguyen Duc Chung ដែលជាប្រធានគណៈកម្មាធុការប្រជាជនប្រចាំទីក្រុងហាណូយបានឲ្យដឹងថា ទីក្រុងហាណូយវិញក៏នឹងទទួលបានការវិនិយោគពីក្រុមហ៊ុន Ikea ប្រមាណ ៤៥០លានដុល្លារផងដែរដើម្បីសាងសង់ផ្សារទំនើប និងប្រព័ន្ធឃ្លាំងស្តុកទំនិញក្នុងរដ្ឋធានីនេះ៕
ចែករំលែកព័តមាននេះ