រាជធានីភ្នំពេញ ៖ ក្រសួងពាណិជ្ជកម្មបានផ្ទេរសិទ្ធិអំណាចដល់មន្ទីរពាណិជ្ជកម្មតាមខេត្តចំនួន ៤ នៃតំបន់ត្រីកោណអភិវឌ្ឍន៍ អាចចេញវិញ្ញាបនបត្របញ្ជាក់ប្រភពដើមទំនិញ CO ទម្រង់ D ដើម្បីសម្រួលដល់ពាណិជ្ជករ…
រាជធានីភ្នំពេញ ៖ ក្រសួងពាណិជ្ជកម្មបានផ្ទេរសិទ្ធិអំណាចដល់មន្ទីរពាណិជ្ជកម្មតាមខេត្តចំនួន ៤ នៃតំបន់ត្រីកោណអភិវឌ្ឍន៍ អាចចេញវិញ្ញាបនបត្របញ្ជាក់ប្រភពដើមទំនិញ CO ទម្រង់ D ដើម្បីសម្រួលដល់ពាណិជ្ជករ និងកសិករ នៅតាមព្រំដែនក្នុងការនាំចេញផលិតផលនិងកសិផល ។ ខេត្តចំនួន៤ដែលក្រសួងបានធ្វើប្រតិភូកម្មជូននេះ មានខេត្តត្បូងឃ្មុំ ក្រចេះស្ទឹងត្រែង និងខេត្តមណ្ឌលគីរី ដែលខេត្តជាប់ព្រំដែនកម្ពុជា-ឡាវ-វៀតណាម ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានប្រកាសឲ្យដឹងកាលពីថ្ងៃសៅរ៍ នូវការផ្ទេរសិទ្ធិអំណាចនេះដល់មន្ទីរពាណិជ្ជកម្មខេត្តចំនួន ៤ បន្ថែមទៀតនេះ ហើយលោកបញ្ជាក់ថា វាគឺជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអនុវត្តក្របខណ្ឌយុទ្ធសាស្ត្រកំណែទម្រង់វិមជ្ឈការ និងវិសហមជ្ឈការ ដើម្បីលើកកម្ពស់កិច្ចសហប្រតិបត្តិការរវាងថ្នាក់ជាតិ និងថ្នាក់ក្រោមជាតិ សំដៅធានាឱ្យមានការអភិវឌ្ឍសង្គមសេដ្ឋកិច្ចដ៏ទូលំទូលាយ និងប្រកបដោយនិរន្តរភាព អាចឆ្លើយតបតម្រូវការអទិភាពរបស់ប្រជាពលរដ្ឋ និងគោលការណ៍អភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណ ។ លោករដ្ឋមន្ត្រីក្រសួងពាណិជ្ជកម្ម បន្តថា កន្លងមកក្រសួងពាណិជ្ជកម្ម បានផ្ដល់សិទ្ធិអំណាចនេះទៅកាន់មន្ទីរពាណិជ្ជកម្មនៅក្នុងខេត្តចំនួន ៥ រួចមកហើយ ដូចជា ប៉ៃលិន បាត់ដំបង បន្ទាយមានជ័យ ឧត្តរមានជ័យ និងរតនគិរី រួមទាំងតំបន់សេដ្ឋកិច្ចពិសេសចំនួន ២ នៅក្នុងខេត្តស្វាយរៀងគឺ Manhattan តាយសេង និងសានដុង-សាន់សែល ដើម្បីសម្រួលដល់ការធ្វើពាណិជ្ជកម្ម ជាពិសេសការនាំចេញកសិផលរបស់ប្រជាកសិករខ្មែរ។
លោក ប៉ាន សូរស័ក្តិ មានប្រសាសន៍បន្ថែមថា ការដាក់ឱ្យដំណើរការសេវា CO ទម្រង់ D នៅក្នុងខេត្តត្បូងឃ្មុំ ក្រចេះ ស្ទឹងត្រែង និងខេត្តមណ្ឌលគិរី នាពេលនេះ គឺដោយសារតែជាខេត្តអាទិភាព ដែលស្ថិតនៅក្នុងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ដែលប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បាននឹងកំពុងយកចិត្តទុកដាក់ខ្លាំង លើការកាត់បន្ថយគម្លាតនៃការអភិវឌ្ឍសេដ្ឋកិច្ច ក៏ដូចជាការកាត់បន្ថយភាពក្រីក្ររបស់ប្រជាជន នៅក្នុងខេត្តទាំងបួននេះ។ លោក ប៉ាន សូរស័ក្តិ បញ្ជាក់ថា «ការធ្វើប្រតិភូកម្មនេះ គឺមិនត្រឹមតែជាការផ្ទេរភាព ជាម្ចាស់នៃមុខងារទេ ថែមទាំងជាការទទួលខុសត្រូវក្នុងការគ្រប់គ្រង និងការអនុវត្តឱ្យកាន់តែមានប្រសិទ្ធភាព និងតម្លាភាព ជាពិសេសការចេញ CO ទម្រង់ D ឱ្យបានកាន់តែឆាប់រហ័សជូនអ្នកនាំចេញ ដើម្បីសម្រួលដល់ការនាំចេញកសិផល ជៀសវាងបាននូវភាពអសកម្មនានា និងការកកស្ទះដោយប្រការណាមួយ» ។
លោក ស៊ាង ថៃ អ្នកនាំពាក្យក្រសួងពាណិជ្ជ កម្មកម្ពុជាបានមានប្រសសន៍ថា ការធ្វើប្រតិភូកម្មសេវា ចេញវិញ្ញាបនបត្របញ្ជាក់ប្រភពដើម CO ទម្រង់D នៅតាមបណ្ដាខេត្តនេះ គឺ ដើម្បីផ្ដល់ប្រយោជន៍ ដល់អ្នកនាំចេញ និងកសិករនៅតាមព្រំដែនទាំងនោះ ពោលគឺពួកគាត់មិនចាំបាច់ធ្វើដំណើរមកកាន់ក្រសួងពាណិជ្ជកម្ម ដែលត្រូវចំណាយលុយធ្វើដំណើរផង និងថ្លៃហូបចុកស្នាក់នៅផង ។ លោក បន្ថែមថា « អ្នកនាំចេញ និងកសិករដែលមានបំណងនាំចេញទំនិញទៅកាន់ទីផ្សារប្រទេសជិតខាង អាចដាក់ពាក្យស្នើសុំវិញ្ញាបនបត្រនេះ នៅទីណាក៏បានដែលមានសេវា ហើយនៅពេលទទួលបានហើយ ពួកគាត់អាចនាំចេញហើយ និងមិនមានភាពស្មុគ្រស្មាញច្រើនដូចមុនឡើយ »។
អ្នកនាំពាក្យក្រសួងពាណិជ្ជកម្មដដែល បន្តថា ចំពោះទម្រង់នេះគឺទាមទារតែលើមុខទំនិញមួយចំនួនប៉ុណ្ណោះ និងទំនិញដែលត្រូវនាំចេញទៅកាន់បណ្ដាប្រទេសអាស៊ាន ហើយសម្រាប់ការនាំចេញទៅកាន់បណ្ដាប្រទេសផ្សេងៗក្រៅពីអាស៊ាន គឺត្រូវមានទម្រង់ផ្សេងៗគ្នា ។ លោក ស៊ាង ថៃ បញ្ជាក់ថា ៖« ទម្រង់នេះ វាមានប្រយោជន៍មួយទៀត ដែលអាចបញ្ជាក់ពីប្រភពទំនិញហើយវិញ្ញាបនបត្របញ្ជាក់ប្រភពដើមទំនិញ វាមានច្រើនទម្រង់ មិនមែនតែមួយទម្រង់ D នោះទេ » ។ សូមបញ្ជាក់ថាពិធីប្រកាស និងដាក់ឱ្យប្រើប្រាស់ជាផ្លូវការនូវសេវា CO ទម្រង់ D នេះ ត្រូវបានរៀបចំឡើងនៅសណ្ឋាគារលីជិ ខេត្តក្រចេះ ក្រោមអធិបតីភាព ឯកឧត្តម ប៉ាន សូរស័ក្តិ រដ្ឋមន្ត្រី ក្រសួងពាណិជ្ជកម្ម និងមានការចូលរួមពីថ្នាក់ដឹកនាំ និងអាជ្ញាធរនៃខេត្តទាំងបួនខាងលើ មន្ត្រីរាជការមកពីស្ថាប័នពាក់ព័ន្ធ និងតំណាងវិស័យឯកជនប្រមាណ ៣០០នាក់។
សូមជម្រាបថា កាលពីឆ្នាំ២០១៨ កម្ពុជាបាននាំចេញទំនិញនៅក្រោមប្រព័ន្ធអនុគ្រោះពាណិជ្ជកម្ម ទៅកាន់ទីផ្សារបរទេសក្នុងទឹកប្រាក់ ១២,៨៩៥លានដុល្លារអាមេរិក បានកើនឡើង ១៣.៧០% បើប្រៀបធៀបឆ្នាំ២០១៧ ដែលមានទឹកប្រាក់ត្រឹមតែ ១១,៣៤១លានដុល្លារអាមេរិក។ ដោយឡែកការនាំចេញកសិផល តាមរយៈ CO ទម្រង់ D ទៅកាន់ទីផ្សារតំបន់អាស៊ាន ក៏មានកំណើនគួរឱ្យកត់សម្គាល់ផងដែរ គឺបានកើនពីទឹកប្រាក់ ៧២៨លានដុល្លារអាមេរិកក ក្នុងឆ្នាំ២០១៦ ដល់ទឹកប្រាក់ ១,៤០៦លានដុល្លារអាមេរិក នៅក្នុងឆ្នាំ២០១៨៕
ចែករំលែកព័តមាននេះ