ខេត្តកំពង់ធំ៖ ថ្លែងនៅក្នុងកិច្ចប្រជុំនៅសាលាខេត្តកំពង់ឆ្នាំង លោក ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មការរៀបចំពិធីបុណ្យទន្លេនៅខេត្តកំពង់ឆ្នាំង បានថ្លែងឲ្យដឹងថា សព្វថ្ងៃនេះមានប្រជាពលរដ្ឋកម្ពុជាប្រមាណ១០លាននាក់ទទួលបានអត្ថប្រយោជន៍ពីទន្លេមេគង្គ ។ ដូច្នេះហើយការរៀបចំបុណ្យទន្លេរបស់យើងមានអត្ថន័យមិនត្រឹមតែសម្រាប់វិស័យទេសចរណ៍នោះទេ ប៉ុន្តែផ្តល់ប្រយោជន៍យ៉ាងច្រើនដល់ជីវភាពប្រជាពលរដ្ឋ ។
លោក ថោង ខុន បានបញ្ជាក់ថា ប្រជាពលរដ្ឋខ្មែរប្រមាណ៥លាននាក់កំពុងរស់នៅតាម ដងទន្លេមេគង្គដែលហូរកាត់ប្រទេសកម្ពុជាប្រមាណ៥០០គីឡូម៉ែត្រ ហើយប្រមាណ៥លាននាក់ទៀតរស់នៅតាមដងទន្លេសាប រួមទាំងដងទន្លេផ្សេងៗ ទៀតដែលមានប្រភពពីទន្លេមេគង្គ ។ លោកថា ប្រជាពលរដ្ឋទាំងនោះមិនគ្រាន់តែរស់នៅតាមធម្មតានោះទេ ប៉ុន្តែពួកគាត់ទទួលបានអត្ថប្រយោជន៍ពីទន្លេមេគង្គថែមទៀត ដូចជា អត្ថប្រយោជន៍ពីវិស័យកសិកម្ម រួមទាំងវិស័យ ទេសចរណ៍ជាដើម ។
លោករដ្ឋមន្ត្រីអះអាងថា ពិធីបុណ្យទន្លេដែលយើងបានរៀបចំជាបន្តបន្ទាប់មកនេះហើយ ឆ្នាំនេះយើងរៀបចំនៅខេត្តកំពង់ឆ្នាំងគឺមានអត្ថន័យនិងផ្តល់អត្ថប្រយោជន៍ច្រើនណាស់ដល់ប្រជាពលរដ្ឋរួមទាំងប្រទេសជាតិ ។ លោកថា បុណ្យទន្លេវាមិនគ្រាន់តែបង្ហាញនូវវប្បធម៌ ប្រពៃណីឬក៏អត្ថប្រយោជន៍សម្រាប់តែវិស័យទេសចរណ៍នោះទេ ប៉ុន្តែអ្វីដែលសំខាន់នោះគឺការ យល់ដឹងនិងការចូលរួម របស់ប្រជាពលរដ្ឋរួមទាំងការលើកកម្ពស់ជីវភាពរស់នៅរបស់ ប្រជាពល រដ្ឋដែលកំពុងរស់នៅតាមដងទន្លេផងដែរ ។
ទាក់ទងបុណ្យទន្លេនាពេលខាងមុខនេះ លោក ថោង ខុន បានឲ្យដឹងថា គណៈកម្មការរួម ទាំងអាជ្ញាធរបានរៀបចំរួចរាល់អស់ហើយ ពុំមានអ្វីសេសសល់ ឬជួបបញ្ហាប្រឈមនោះឡើយ ។ លោកថា ព្រឹត្តិការណ៍បុណ្យទន្លេឆ្នាំនេះ យើងមានការរៀបចំល្អនិងស្រស់ស្អាត ហើយប្លែកជាង ជាងឆ្នាំមុនៗ ទាំងការលម្អរសោភ័ណភាពតាមដងផ្លូវ រួមទាំងទីតាំងពិព័រណ កីឡាសិល្បះផ្សេងៗ ដែលនឹងត្រូវតាំងបង្ហាញឬសម្តែងនៅក្នុងពិធីបុណ្យទន្លេ ។
លោកបានអំពាវនាវជាថ្មីម្តងទៀតដល់ទេសចរណ៍ជាតិ អន្តរជាតិចូលរួមកម្សាន្តសប្បាយ ឲ្យបានច្រើនកុះករក្នុងពិធីបុណ្យទន្លេដែលនឹងត្រូវរៀបចំរយះពេល៣ថ្ងៃ គឺថ្ងៃទី១៤-១៥-១៦ ខែមីនា ឆ្នាំ២០១៩ ក្រោមអធិបតីភាពសម្តេច អគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត នៅទីរួមខេត្តកំពង់ឆ្នាំង ដែលស្ថិតនៅជិតនឹងរាជធានីភ្នំពេញ ហើយមានផ្លូវគមនាគមន៍ល្អថែមទៀត ។ យ៉ាងណាក៏ដោយ លោករដ្ឋមន្ត្រីបានបង្ហាញនូវក្តីរំពឹងថា បុណ្យទន្លេឆ្នាំនេះនឹងមានអ្នកចូលរួមច្រើនជាងពិធីបុណ្យទន្លេលើកមុនៗ ៕
ចែករំលែកព័តមាននេះ