ខេត្តប៉ៃលិន ៖ បណ្តោយឱ្យក្មេងមិនទាន់គ្រប់អាយុបើកបរម៉ូតូ បណ្តាលអោយជ្រុលទៅបុកម៉ូតូ ១គ្រឿងទៀតដែលធ្វើដំណើរច្រាសទិសគ្នារងរបួសចំនួន០៥នាក់ ក្នុងនោះស្រាលម្នាក់ ធ្ងន់ចំនួន០៤នាក់ ហើយខូចខាតម៉ូតូចំនួន០២គ្រឿង ។ ហេតុការណ៍ម៉ូតូបុកម៉ូតូនេះបានកើតឡើងកាលពីវេលាម៉ោង៥និង៥០នាទីល្ងាច ថ្ងៃទី១០ ខែមីនា ឆ្នាំ២០១៩ នៅចំណុចមុខស្ថានីយទឹកស្អាត ស្ថិតក្នុងភូមិបរហ៊ុយជើងសង្កាត់ បរយ៉ាខា ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះបង្កទី១-ឈ្មោះ ជា សុខេន ភេទប្រុស អាយុ១៧ឆ្នាំ រងរបួសធ្ងន់ ដោយបើកបរម៉ូតូម៉ាក ហុងដាឌ្រីមសេ១២៥ (Honda Dream C125) ពណ៌ខ្មៅស៊េរីឆ្នាំ២០១៧ ពាក់ស្លាកលេខប៉ៃលិន 1C-2351 បើកបរក្នុងទិសដៅពីត្បូងទៅជើង ទី២- ឈ្មោះ រឹម រិទ្ធ ភេទប្រុស អាយុ២០ឆ្នាំ រងរបួសស្រាល ជាអ្នករួមដំណើរទាំងពីរនាក់ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ចំណែកទី៣- ភាគីរងគ្រោះមានឈ្មោះ រស់ សេរីវឌ្ឌ្យ ភេទប្រុស អាយុ៣០ឆ្នាំ មុខរបរជាពេទ្យទាហាន រងរបួសធ្ងន់ ដោយបើកបរម៉ូតូម៉ាកហុងដាស្កូពី ( Honda Scoopy) ពណ៌ខ្មៅ ពាក់ស្លាកលេខ ភ្នំពេញ 1BC-6006 បើកបរក្នុងទិសដៅពីជើងទៅត្បូង ។ ទី៤- អ្នករួមដំណើរឈ្មោះ ធី ភេទស្រី អាយុ២៥ឆ្នាំ មុខរបរមេផ្ទះ រងរបួសធ្ងន់ ទី៥ -អ្នករួមដំណើរឈ្មោះ គន្ធា ភេទស្រី អាយុ១៤ឆ្នាំ មុខរបរសិស្ស រងរបួសធ្ងន់ ទាំងបីនាក់ មានទីលំនៅបច្ចុប្បន្ន ក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពបន្តបញ្ជាក់ទៀតថា មូលហេតុដែលបណ្តាលឱ្យមានករណីគ្រោះថ្នាក់ចរាចរណ៍នេះកើតឡើងមកពីកត្តាមនុស្សបើកបរដោយខ្វះការប្រុងប្រយ័ត្នមិនប្រកាន់ស្តាំ ពោល គឺជនបង្កជ្រុលចង្កូតទៅខាងឆ្វេងដៃបណ្តាលឱ្យបុកប៉ះនឹងម៉ូតូ១គ្រឿងទៀតបណ្តាលឱ្យដួលប្រាវរងរបួសទាំងពីរនាក់តែម្តង ។ ពាក់ព័ន្ធនឹងករណីខាងលើនេះកម្លាំងជំនាញចរាចរណ៍នៃអធិការដ្ឋាននគរបាលក្រុងប៉ៃលិន បានធ្វើការវាស់វែង និងយកម៉ូតូទាំងពីរគ្រឿងខាងលើទៅរក្សាទុកជាបណ្តោះអាសន្ននៅអធិការដ្ឋាននគរបាលក្រុង ដើម្បីរង់ចាំធ្វើការដោះស្រាយ ។ ចំណែកជនរងគ្រោះទាំងអស់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យបង្អែកខេត្តប៉ៃលិន ៕
ចែករំលែកព័តមាននេះ