រាជធានីភ្នំពេញ ៖ ជាថ្មីម្តងទៀតសម្តេចតេជោ ហ៊ុន សែន នាយករដ្ឋមន្ត្រីបានអំពាវនាវដល់អាជ្ញាធរទាំងអស់ត្រូវខិតខំដោះស្រាយទឹកជូនប្រជាជនបានឲ្យបានទាន់ពេលចំពោះតំបន់ណាដែលខ្វះខាតទឹកប្រើប្រាស់ ។ ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកថ្ងៃទី១១ ខែមីនានេះ សម្តេចតេជោក៏បានអំពាវនាវដល់ប្រជាពលរដ្ឋកុំធ្វើស្រូវប្រាំងផងដែរ ហើយអាជ្ញាធរត្រូវដោះស្រាយដោយដឹកទឹកជូនប្រជាជន និងធ្វើការជីកអណ្តូងទឹកជូនប្រជាជន ។
ជាមួយគ្នានោះដែរសម្តេចតេជោក៏បានអំពាវនាវដល់វិស័យឯកជនក៏អាចចូលរួមជួយជីកអណ្តូងជូនប្រជាពលរដ្ឋ ដើម្បីប្រើប្រាស់ផងដែរ ។ សម្តេចបញ្ជាក់ថា«អីញ្ចឹងឆ្នាំនេះគ្រប់ទីកន្លែងទាំងអស់ សូមឲ្យអាជ្ញាធរយកចិត្តទុកដាក់ខិតខំជីកអណ្តូងប្រើជាងដឹកទឹកពីចម្ងាយ បើទោះបីជាវាជ្រៅបន្តិច តែកាប្រើប្រាស់ជីកអណ្តូង គឺជាមធ្យោបាយដ៏ល្អ ។ ទោះបីជាឆ្នាំនឹងមានទឹក ឆ្នាំក្រោយខ្វះទឹកក៏នៅមានអណ្តូងប្រើប្រាស់ អីញ្ចឹងត្រូវបន្តការជីងអណ្តូង» ។
សម្តេចបានបន្តថា លើកលែងកន្លែងមួយចំនួនដែលជីកអណ្តូងមិនចេញទឹកត្រូវបង្ខំចិត្តដឹកទឹកទៅផ្តត់ផ្គង់ឲ្យប្រជាជនប្រើប្រាស់ ប៉ុន្តែបើកន្លែងដែលមានដង្ហើមទឹកត្រូវតែជីកអណ្តូង ៕
ចែករំលែកព័តមាននេះ