ខេត្តកណ្ដាល ៖ ទីបំផុតអ្នកដុតសំរាមបង្កជាអគ្គីភ័យឆាបឆេះរោងសិប្បកម្មរបស់ផ្ទះសំណាក់«អរុណរសួស្ដីAS88» ត្រូវបាននគរបាលព្រហ្មទណ្ឌស្រុកអង្គស្នួលចាប់ខ្លួនចាត់ការតាមច្បាប់ហើយ ក្រោយពេលកើតហេតុភ្លាមៗ ជនសង្ស័យត្រូវបាននគរបាលកំណត់ថាជាអ្នកបង្កដែរ ប៉ុន្តែពេលសួរនាំ ជននេះបានបដិសេធ
ថាខ្លួនមិនបានដឹងអ្វីទេ និងគួបផ្សំគ្មានភស្តុតាងដើម្បីដាក់បន្ទុកថែមទៀតនោះ ទើបពេលនោះមិនត្រូវបានចាប់ខ្លួនសង្ស័យឡើយ ។ ប៉ុន្តែ៣ថ្ងៃក្រោយមក តាមរយៈកាមេរ៉ាសុវត្ថិភាពបានបង្ហាញនូវការធ្វេសប្រហែសរបស់ជនសង្ស័យដែលបានដុតសំរាមនៅទីនោះ ហើយអត់នៅមើល បែរជាទៅដេកបាត់ទុករហូតមានការឆាបឆេះឡើងតែម្ដង។
ការចាប់ខ្លួនជនសង្ស័យម្នាក់ខាងលើនោះបានធ្វើឡើងកាលពីវេលាម៉ោង៣និង១៥នាទីរសៀលថ្ងៃទី១០ ខែមិនា ឆ្នាំ២០១៩ នៅក្នុងផ្ទះសំណាក់ «អរុណរសួស្ដីAS88» ដែលមានទីតាំងស្ថិតនៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល។
ជនសង្ស័យម្នាក់ខាងលើដែលត្រូវនគរបាលចាប់ខ្លួនឈ្មោះឌិន សុផា ហៅ អំុ ភារី ភេទប្រុស អាយុ៣៥ឆ្នាំ មុខរបរកម្មករអនាម័យរបស់ផ្ទះសំណាក់ខាងលើ ។ ដោយឡែកម្ចាស់ផ្ទះសំណាក់ឈ្មោះឃួន បូរ៉ា ភេទប្រុស អាយុ៤៧ឆ្នាំ ហើយគាត់បានចាត់ឲ្យតំណាងរបស់គាត់ម្នាក់ឈ្មោះអិច ចាន់នី ភេទប្រុស អាយុ២៦ឆ្នាំជាប្រធានរដ្ឋបាលនៃផ្ទះសំណាក់ ជាអ្នកចេញមុខដាក់ពាក្យបណ្ដឹង។
សូមរំលឹកថា កាលពីវេលាម៉ោង១២និង៣០នាទីថ្ងៃត្រង់ថ្ងៃទី៧ ខែមីនា ឆ្នាំ២០១៩ រោងសិប្បកម្មកែច្នៃតុ ទូ គ្រែ និងជាចំណតរថយន្តនិងម៉ូតូរបស់ផ្ទះសំណាក់ខាងលើត្រូវបានអគ្គីភ័យឆាបឆេះឡើងយ៉ាងសន្ធោសន្ធៅ ទោះបីជាមានការអន្តរាគមន៍ពីសំណាក់រថយន្តពន្លត់អគ្គីភ័យជាច្រើនគ្រឿងក្ដី ក៏មិនអាចគ្រប់គ្រងស្ថានការណ៍បានដែរ ទីបំផុតរោងសិប្បកម្មទាំងមូលរួមជាមួយឈើជាច្រើនម៉ែត្រគូប ព្រមទាំងក្ដារកុងប្លាកេ ស្មាតបត និងម៉ូតូ២គ្រឿងផងត្រូវបានភ្លើងឆេះអស់ទាំងស្រុង ។
រោងសិប្បកម្មមួយនេះសាងសង់ពីដែកប្រក់ស័ង្កសី លាយស្មាតបត ដែលមានទំហំទទឹងប្រវែងប្រមាណ២០ម៉ែត្រ និងបណ្ដោយប្រវែងប្រហែលជិត១០០ម៉ែត្រ ដោយម្ចាស់ផ្ទះសំណាក់ខាងលើបានទិញឈើជាច្រើនម៉ែត្រគូប រួមនិងក្ដារកុងប្លាកេ ព្រមទាំស្មាតបតជាច្រើនដាក់ស្តុកនៅក្នុងរោងនោះ ដើម្បីកែច្នៃធ្វើគ្រឿងសង្ហារឹមដាក់តាមបន្ទប់ផ្ទះសំណាក់របស់គាត់ ដោយគាត់មិនបានទិញគ្រឿងសង្ហារឹមពីខាងក្រៅយកទៅបំពាក់ឡើយ។
ប្រភពដដែលបានបន្តទៀតថា បន្ទាប់ពីមានហេតុការណ៍អគ្គិភ័យកើតឡើង គឺមូលហេតុត្រូវបានដឹងភ្លាមៗថាបណ្ដាលមកពីការដុតសំរាមដែលបង្កឡើងដោយកម្មករអនាម័យឈ្មោះឌិន សុផា ហៅ អំុ ភារី ប៉ុន្តែជននេះមិនត្រូវបានចាប់ខ្លួនភ្លាមៗនោះឡើយ ព្រោះជនសង្ស័យបានដិសេធថាខ្លួនមិនបានធ្វើ និងមិនបានដឹងអ្វីទេ ម្យ៉ាងដោយគ្មានភស្តុតាងផង ទើបនគរបាលព្រហ្មទណ្ឌស្រុកអង្គស្នួលបានធ្វើការស្រាវជ្រាវ ។
ក្រោយមកបានដឹងតាមរយៈកាមេរ៉ាសុវត្ថិភាពរបស់ផ្ទះសំណាក់ដែលបានបង្ហាញពីសកម្មភាពដែលបុរសនេះដុតសំរាមរួចដើរចោល ទុករហូតមានការឆេះរាលដាលបង្កជាអគ្គីភ័យខាងលើ ទើកម្លាំងនគរបាលចុះទៅចាប់ខ្លួនជននេះនាំទៅសាកសួរនៅផ្នែកព្រហ្មទណ្ឌនគរបាលស្រុកអង្គស្នួលដើម្បីសួរនាំនិងកសាងសំណុំរឿងចាត់ការតាមច្បាប់។
នគរបាលបានឲ្យដឹងថា បុគ្គលិកដែលបម្រើការងារនៅក្នុងផ្ទះសំណាក់នោះត្រូវបានបែងចែកចេញជា៦ក្រុមផ្សេងៗពីគ្នា ក្នុងនោះក្រុមអនាម័យមានការចាត់តាំងត្រឹមត្រូវ ដោយចែកចេញជា២ផ្នែកទៀត គឺអ្នកប្រមូលសំរាម និងអ្នកដុតសម្រាមចោល ។
អ្នកប្រមូលសំរាមមានសិទ្ធិត្រឹមតែយកសំរាមទៅចោលនៅមាត់ច្រកចូលទីតាំងដុតសំរាមតែប៉ុណ្ណោះ មិនមានសិទ្ធិយកសំរាមចូលទៅក្នុងទីតាំង ឬដុតឡើយ ។ រីឯអ្នកដុតទើបមានសិទ្ធិជញ្ជូនសំរាមយកចូលទៅក្នុងកន្លែងដុតសំរាមរួចដុត ប៉ុន្តែមុននិងដុតបានត្រៀមសម្ភារៈបង្ការគ្រោះអគ្គីភ័យទុកជាស្រេចមានដូចជាបំពង់ពន្លត់អគ្គីភ័យ និងបញ្ឆេះម៉ាសុីនសម្រាប់បាញ់ទឹកពន្លត់នៅពេលមានគ្រោះអគ្គីភ័យកើតឡើងជាយថាហេតុណាមួយក្នុងពេលដុតសំរាមនោះ ហើយដុតឆេះទាល់តែអស់ទើបហ៊ានដើរចេញ។
ដោយឡែកជនសង្ស័យមិនមានសិទ្ធិដុតឡើយ ប៉ុន្តែបានរពឹសដៃទៅដុតហើយដើរចេញទៅដេកបាត់បង្កឲ្យមានការឆាបឆេះបែបនេះតែម្ដង។ ក្រោយពេលសាកសួរដោយមិនអាចប្រកែកបាន និងមានភស្តុតាងសកម្មភាពក្នុងកាមេរ៉ាសុវត្ថិភាព ជនសង្ស័យបានសារភាពថាខ្លួនពិតជាអ្នកបង្កឲ្យមានអគ្គីភ័យនោះកើតឡើងមែន។
ប្រភពដដែលបានបន្តថា ក្នុងករណីអគ្គិភ័យឆាបឆេះរោងសិប្បកម្មខាងលើក៏មានរថយន្តពន្លត់អគ្គីភ័យជាច្រើនគ្រឿងទៅបាញ់ពន្លត់ ក្នុងនោះរួមមានរថយន្តពន្លត់អគ្គីភ័យរបស់យោធាអង្គភាព K៨៦ចំនួន១គ្រឿង រថយន្តពន្លត់អគ្គិភ័យរបស់ការិយាល័យអគ្គីភ័យនៃស្នងការដ្ឋាននគរបាលខេត្តកំពង់ស្ពឺចំនួន៤គ្រឿង រថយន្តពន្លត់អគ្គិភ័យរបស់អង្គភាព៧១១ កងពលតូចលេខ៧០ចំនួន២គ្រឿង រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន២គ្រឿង រថយន្តអង្គភាពទ័ពពិសេសតឆ័ត្រយោង៩១១ ចំនួន២គ្រឿង ។
គិតរហូតដល់វេលាយប់ថ្ងៃដដែលប្រើប្រាស់ទឹកអស់៣៨សុីទែន រួមជាមួយគ្រឿងចក្រទៅកាយរំលើងកម្ទេចកម្ទីនៅខាងក្រោមៗចេញទើបរលត់ទាំងស្រុង ប៉ុន្តែម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ និងម៉ូតូមួយគ្រឿងទៀតម៉ាកហុងដា SLព្រមទាំងឆេះបន្ទប់រដ្ឋបាល១បន្ទប់ ត្រូវបានភ្លើងឆេះអស់ទាំងស្រុងផងដែរ៕
ចែករំលែកព័តមាននេះ