ខេត្តមណ្ឌលគិរី ៖ ព្រៃដែលលាតសន្ធឹងប្រមាណ៧០%លើទឹកដីខេត្តមណ្ឌលគិរី គឺជាប្រភពចំណូលសេដ្ឋកិច្ចគ្រួសាររបស់ជនជាតិភាគតិច តាមរយៈការប្រមូលផលអនុផលព្រៃឈើ ។ របរដែលជនជាតិភាគតិច អាចរកកម្រៃមកផ្គត់ផ្គង់គ្រួសារ គឺមានដូចជា បោចផ្តៅ…
ខេត្តមណ្ឌលគិរី ៖ ព្រៃដែលលាតសន្ធឹងប្រមាណ៧០%លើទឹកដីខេត្តមណ្ឌលគិរី គឺជាប្រភពចំណូលសេដ្ឋកិច្ចគ្រួសាររបស់ជនជាតិភាគតិច តាមរយៈការប្រមូលផលអនុផលព្រៃឈើ ។ របរដែលជនជាតិភាគតិច អាចរកកម្រៃមកផ្គត់ផ្គង់គ្រួសារ គឺមានដូចជា បោចផ្តៅ បោចវល្លិ៍ បរបាញ់សត្វ បេះផ្លែឈើព្រៃ និងដងជ័រទឹក និងរើសជ័រនៅក្នុងព្រៃ យកទៅលក់ជាដើម ។ បើគ្រួសារណាមានដីច្រើនគេអាចដាំស្រូវ ដាំដំណាំផ្សេងៗ និងចិញ្ចឹមសត្វ សម្រាប់គ្រួសារហូបបានគ្រប់គ្រាន់ ពុំសូវខ្វាយខ្វល់ទេ ។ ចំពោះជនជាតិភាគតិចមួយចំនួន ដែលមានកូនច្រើន តែមិនមានដីធ្លីច្រើនដូចគេ តែងតែឆ្លៀតពេលទំនេរពីការងារស្រែចម្ការចូលទៅក្នុងព្រៃ ដើម្បីរកចំណូលបន្ថែមផងដែរ ។
ជួបជាមួយ លោក រជើម ផ្ចាល ជាជនជាតិដើមភាគតិច និងជាប្រធានសហគមន៍ភូមិពូត្រុំ បានឱ្យដឹងថា របរដងជ័រទឹក គឺពួកគាត់ធ្វើតៗគ្នាតាំងពីជំនាន់ចាស់បុរាណមកម្ល៉េះ ។ របរនេះ អាចជួយឱ្យជីវភាពគ្រួសាររបស់ពួកគាត់ បានធូរស្រាលមួយកម្រិត ព្រោះបើពឹងទៅលើរបរធ្វើស្រែចម្ការមួយមុខ មិនអាចហូបគ្រប់ទេ មានតែស៊ូទ្រាំចូលព្រៃ ដែលសម្បូរសត្វទាក ហើយត្រូវវាខាំស្ទើរសុសសាច់ និងពេលខ្លះត្រូវកើតជំងឺគ្រុនចាញ់ ដោយសារមូសខាំច្រើនពេក ។ ក្រៅពីរបរនៅក្នុងព្រៃទាំងនេះ ពួកគាត់ពុំដឹងទៅរកស៊ីអ្វីផ្សេងឡើយ ព្រោះពួកគាត់ខ្វះខាតដើមទុន និងរៀនសូត្រ ក៏ពុំបានជ្រៅជ្រះ ។ ដូច្នេះ របរដងជ័រទឹកជួយឱ្យពួកគាត់អាចមានលទ្ធភាពចិញ្ចឹមគ្រួសារបានដូចគេឯង ។
ជនជាតិភាគតិចផ្សេងទៀត បានរៀបរាប់ឱ្យដឹងទៀតថា មិនថារដូវប្រាំង ឬរដូវវស្សាឡើយ ពួកគាត់តែងតែនាំគ្នាចូលព្រៃ ដើម្បីរកដងជ័រទឹកយកទៅលក់ឱ្យឈ្មួញដើម្បីបានប្រាក់ផ្គត់ផ្គង់គ្រួសារ ។ ការចូលទៅរកដងជ័រទឹកនេះមិនទៀងទាត់ទេ ជួនកាលរយៈពេល១០ថ្ងៃ ឬ១៥ថ្ងៃក៏មាន ។ ក្នុងម្នាក់ប្រើពេលពី២ទៅ៣ថ្ងៃ ទើបអាចដងជ័រទឹកបានមួយប៊ីដុង៣០លីត្រ ។ នៅពេលពួកគាត់ប្រមូលជ័រទឹកបានច្រើនហើយ ក៏នាំគ្នាស្ពាយប៊ីដុងជ័រទឹកចេញមកពីក្នុងព្រៃដាក់តម្រៀបគ្នាតាមផ្លូវជាតិរង់ចាំឈ្មួញទៅទិញ ។ ចំពោះតម្លៃរបស់ជ័រទឹកវាអាស្រ័យតាមជ័រល្អ ឬមិនល្អដោយមានចូលទឹកច្រើន គឺតម្លៃចាប់ពី៣០០០រៀលឡើងទៅក្នុង១គីឡូក្រាម ។
ជនជាតិភាគតិច សម្តែងការព្រួយបារម្ភយ៉ាងខ្លាំង ចំពោះការហិនហោចរបស់ដើមជ័រទឹក ព្រោះសព្វថ្ងៃកំពុងរងការកាប់បំផ្លាញយ៉ាងរង្គាលពីជនខិលខូចមួយចំនួន នៅក្នុងតំបន់ផ្សេងៗរហូតដល់ព្រៃការពារសហគមន៍ លោក ចាន់ ឌី អាជីវករទទួលទិញជ័រពីអ្នកភូមិបានប្រាប់ថា ក្នុងមួយថ្ងៃលោកអាចទិញជ័រទឹកពីអ្នកភូមិបានប្រមាណ១០ទៅ២០កាន ។ តែនៅរដូវវស្សា លោកទិញបានត្រឹម៥កាន ទៅជិត១០កាន ប៉ុណ្ណោះ ក្នុងមួយថ្ងៃ ។ ចំពោះតម្លៃ បើគេដឹកឲ្យគាត់ដល់កន្លែងគាត់ ទិញក្នុងមួយកានតម្លៃ១០ម៉ឺនរៀល តែបើគាត់ទិញតាមផ្ទះត្រឹម៨ម៉ឺនរៀល ទៅតាមទីជិតឬឆ្ងាយ។
លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានឲ្យដឹងថា សព្វថ្ងៃដើមជ័រទឹកបានផ្តល់ផលជាច្រើនសម្រាប់ទ្រទ្រង់ជីវភាពបងប្អូនជណជាតិដើមភាគតិច ដែលតែងអាស្រ័យផលលើធនធានធម្មជាតិ។ម្យ៉ាងវិញទៀត ការទទួលផលពីដើមឈើសម្រាប់យកជ័រមិនបានប៉ះពាល់ដល់ការបាត់បង់ព្រៃឈើឡើយ ពោលគឺថែមទាំងបានការពារដោយប្រយោលពីការប្រកបរបរនេះថែមទៀតផង។
ចែករំលែកព័តមាននេះ