រាជធានីភ្នំពេញ ៖ ប្រធានគណបក្សយុវជនកម្ពុជាលោកពេជ្រ ស្រស់ បានចេញមុខថា មិនចង់ឲ្យមានច្បាប់ប្រហាជីវិតចំពោះឪពុករំលោភកូន និងជីតារំលោភចៅខ្លួន ដោយបែររកវិធីអប់រំផ្សព្វផ្សាយពីសិទ្ធិ និងវិធានការផ្សេងៗ ។ ការបដិសេធន៍មិនចង់ឲ្យមានច្បាប់ប្រហារជីវិតរបស់មេបក្សយុវជនរូបនេះ បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៅព្រឹកថ្ងៃទី១០ ខែមីនា ថា ចង់ឲ្យមានច្បាប់ប្រហារជីវិតចំពោះឪពុករំលោភកូន ជីតារំលោភចៅបង្កើតដោយធ្វើវិសោធនកម្មច្បាប់រដ្ឋធម្មនុញ្ញតាមរយៈធ្វើប្រជាមតិនៅទូទាំងប្រទេស ។
លោកពេជ្រ ស្រស់ សមាជិកឧត្តមក្រុមប្រឹក្សាពិគ្រោះ និងផ្តល់យោបបានលើកឡើងលើបណ្តាញសង្គមយ៉ាងដូច្នេះថា ករណីនេះសម្រាប់ប្រទេសកម្ពុជាបច្ចុប្បន្ន គឺមិនគួរមានទោសប្រហារជីវិតនោះឡើយ ដោយផ្អែកលើពលរដ្ឋខ្មែរមួយចំនួន គឺចំណេះដឹងរបស់ពួកគាត់នៅមានកម្រិត ហើយកម្ពុជាទើបតែបានឆ្លងកាត់រួចផុតពីការសម្លាប់ក្រៅច្បាប់យ៉ាងច្រើនសន្ធឹកនៅក្នុងអំឡុងពេលសម័យប៉ុលពតកាន់អំណាច និងម្យ៉ាងវិញទៀត គឺពលរដ្ឋខ្មែរមួយចំនួនមិនទាន់ទទួលបានការអប់រំបានល្អនៅឡើយទេ ។ លោកបានបន្តថា ក្នុងករណីនេះរដ្ឋាភិបាល គួរតែរឹតបន្តឹងនូវច្បាប់ឲ្យតឹងរឹង និងអប់រំអំពីសីលធម៌ ព្រមទាំងសិទ្ធិកុមារឲ្យបានជ្រួតជ្រាបដល់ពលរដ្ឋឲ្យយល់ដឹងបន្ថែមទៀត និងបិទនូវ website មួយចំនួនដែលចាក់ផ្សាយរឿងសិច ជាពិសេស គឺបង្កើតច្បាប់ដាក់គុកមួយជីវិតជំនួសច្បាប់ប្រហារជីវិតដល់បុគ្គល ប្រព្រឹត្តបទល្មើសលើកុមារីវិញល្អជាង ។
លោកបញ្ជាក់ថា «ក្នុងន័យនេះ ខ្ញុំពេជ្រ ស្រស់ មិនគាំទ្រការបង្កើតនូវច្បាប់ប្រហារជីវិតក្នុងប្រទេសកម្ពុជាជាដាច់ខាត ដោយយើងយកយន្តការអប់រំ និងរឹតបន្តឹងច្បាប់វិញទើបប្រសើរជាង ។ ទិដ្ឋភាពជាក់ស្តែង គឺកើតចេញពីការសេពនូវគ្រឿងស្រវឹង ការមើលនូវវីឌីអូសិច ការ ឃើញភាពសិចស៊ីរបស់ស្ត្រី ឬតារាស្រីៗមួយចំនួន ហើយក៏បណ្តាលមកពីសតិមិនល្អរបស់បុ គ្គលមួយចំនួនផងដែរ ។ លោកបន្ថែមថា ដូច្នេះក្នុងនាមរដ្ឋាភិបាលគួតែកម្ចាត់ចោលនូវហេតុ ដែលនាំឲ្យកើតឡើងនូវការចាប់រំលោភនេះឲ្យអស់ពីសមត្ថភាពជាមុនសិន ចាំបង្កើតច្បាប់ប្រហារជីវិតនេះក៏មិនទាន់យឺតពេលដែរ ប៉ុន្តែយើងនាំគ្នាក្រឡេកមើលទៅក្រោយវិញ តើការលក់ និងការផ្សព្វផ្សាយនូវគ្រឿងស្រវឹងបានរឹតបន្តឹង និងលុបបំបាត់ ហើយឬនៅ ? ការបោសសម្អាតនូវគ្រឿងញៀនគ្រប់ប្រភេទបានហើយឬនៅ ? ការអប់រំដល់ស្ត្រី និងតារាស្រីៗកុំឲ្យស្លៀកពាក់សិចស៊ីហួសហេតុពេកបានហើយឬនៅ ? ការបិទ website ដែលចាក់ផ្សាយរឿងសិចបានហើយឬនៅ ? ។
លោកបានបន្ថែមថា ការផ្សព្វផ្សាយសីលធម៌សង្គម និងការអប់រំដល់ពលរដ្ឋបានទូលំទូលាយហើយឬនៅ ? សំនួរទាំងអស់ខាងលើនេះមិនទាន់អាចធ្វើបានផងនឹងចុះប្រញាប់អ្វីម្លេះក្នុងការបង្កើតទោសប្រហារជីវិតនេះហើយបើសិនជាមានទោសប្រហារជីវិតពិតមែននោះ គឺនឹងមានអ្នកស្លាប់ដោយសារតែការលាបពណ៌មិនខានឡើយ ៕
ចែករំលែកព័តមាននេះ