ខេត្តបាត់ដំបង ៖ អំណោយគ្រឿងបរិក្ខាពេទ្យដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រគល់ជូនមន្ទីរពេទ្យយោធភូមិភាគទី៥ ស្នងការដ្ឋាននគរបាលខេត្តបាត់ដំបង និងស្នងការដ្ឋាននគរបាលខេត្តបន្ទាយមានជ័យ នៅព្រឹកថ្ងៃទី៩ ខែមីនា ឆ្នាំ២០១៩ ក្នុងបរិវេណស្នងការដ្ឋាននគរបាលខេត្តបាត់ដំបង ។
ដោយបានការអនុញ្ញាតពីលោកឧត្តមសេនីយ៍ឯក ហ៊ុន ម៉ាណែត មេបញ្ជាការរងនៃកងយោធពលខេមរភូមិន្ទ និងជាមេបញ្ជាការបញ្ជាការដ្ឋានកងទ័ពជើងគោកព្រមទាំងលោក ស សុខា រដ្ឋលេខាធិការក្រសួងអប់រំយុវជន និងកីឡា និងជាអនុប្រធានសហភាពសហព័ន្ធយុវជនកម្ពុជា បានចាត់តាំងលោកណុប ដារ៉ា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន ជាតំណាងនាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈលោកតំណាងទាំងពីរមកប្រគល់ជូនមន្ទីរពេទ្យយោធភូមិភាគទី៥ (ពេទ្យព២) ស្នងការដ្ឋាននគរបាលខេត្តបាត់ដំបង និងស្នងការដ្ឋាននគរបាលខេត្តបន្ទាយមានជ័យ ។
អំណោយដ៏ថ្លៃថ្លារបស់សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជានាពេលនេះមានសម្ភារៈបរិក្ខាពេទ្យចំនួន០១កុងតឺន័រ (Container )ដែលមានតម្លៃស្មើប្រមាណជា៤៤ម៉ឺនដុល្លារសហរដ្ឋអាមេរិក ។ វត្តមានក្នុងពិធីនេះមានលោក សឿម សារិទ្ធ ស្នងការរងនៃស្នងការដ្ឋាននគរបាលខេត្តបាត់ដំបងទទួលបន្ទុកការងារសុខាភិបាលនៃស្នងការដ្ឋាននគរបាលខេត្តបាត់ដំបង តំណាងលោកឧត្តមសេនីយទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ឯកឧត្តម អស់លោកឧត្តមសេនីយ៍ វរសេនីយ៍ តំណាងមេបញ្ជាការយោធភូមិភាគទី៥ និងមន្ទីរពេទ្យយោធភូមិភាគទី៥ (ពេទ្យព២) បានទទួលនូវសម្ភារៈបរិក្ខាពេទ្យទាំងនេះ ។
ថ្លែងនៅក្នុងពិធីប្រគល់ទទួលសម្ភារៈបរិក្ខាពេទ្យនាពេលនេះ លោកណុប ដារ៉ា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន ជាតំណាងបានជម្រាបជូនថា ដោយមើលឃើញនូវការខ្វះខាតចំពោះតម្រូវការចាំបាច់ក្នុងការប្រើប្រាស់សម្ភារៈបរិក្ខាក្នុងវិស័យសុខាភិបាល ពិសេសក្នុងកិច្ចការសង្គ្រោះបឋមលើជនរងគ្រោះដោយឧប្បត្តិហេតុផ្សេងៗទើបក្រុមការងាររបស់លោកឧត្តមសេនីយឯក ហ៊ុន ម៉ាណែត , លោក ស សុខា និងថ្នាក់ដឹកនាំដ៏ទៃទៀតបានស្វះស្វែងរកនូវសម្ភារៈបរិក្ខាទាំងនេះមកផ្គត់ផ្គង់ជូនដល់អង្គភាព មន្ទីរពេទ្យយោធភូមិភាគទី៥ និងស្នងការដ្ឋាននគរបាលខេត្តបាត់ដំបង ខេត្តបន្ទាយមានជ័យ ហើយកុងតឺន័រ(Container )លើកនេះមិនមែនជាលើកទី ០១នោះទេ ប៉ុន្តែជាលើកទី០៦ហើយ ដែលសប្បុរសជននៅសហរដ្ឋអាមេរិកបានចូលរួមផ្តល់ជូននាពេលកន្លងទៅ ៕
ចែករំលែកព័តមាននេះ