រាជធានីភ្នំពេញ ៖ រថយន្តបែនដឹកដីមួយគ្រឿងម៉ាកហុីណូបើកបរក្នុងល្បឿនលឿន បានបុករុញរថយន្តកំពុងឈប់នៅភ្លើងស្តុបជាបន្តបន្ទាប់ចំនួន៧គ្រឿង បណ្តាលឲ្យរថយន្តចំនួន៥គ្រឿង រងការខូចខាតខ្ទេចមុខខ្ទេចក្រោយ ឯ២គ្រឿងទៀតខូចខាតស្រាល ។ ចំណែករថយន្តបង្កខ្ទេចមួយកំណាត់ខាងមុខដែរ ព្រោះកម្លាំងបុកពេញទំហឹង…
រាជធានីភ្នំពេញ ៖ រថយន្តបែនដឹកដីមួយគ្រឿងម៉ាកហុីណូបើកបរក្នុងល្បឿនលឿន បានបុករុញរថយន្តកំពុងឈប់នៅភ្លើងស្តុបជាបន្តបន្ទាប់ចំនួន៧គ្រឿង បណ្តាលឲ្យរថយន្តចំនួន៥គ្រឿង រងការខូចខាតខ្ទេចមុខខ្ទេចក្រោយ ឯ២គ្រឿងទៀតខូចខាតស្រាល ។ ចំណែករថយន្តបង្កខ្ទេចមួយកំណាត់ខាងមុខដែរ ព្រោះកម្លាំងបុកពេញទំហឹង ។
គ្រោះថ្នាក់នេះ កើតឡើងកាលពីវេលាម៉ោង៩និង៣០នាទីព្រឹកថ្ងៃទី៨ ខែមីនា នៅតាមមហាវិថីឈ្នះ ឈ្នះ ចំណុចកែងជាមួយផ្លូវភ្នំពេញ-ហាណូយ ស្ថិតក្នុងភូមិត្រពាំងរាំងចាស់ សង្កាត់ឃ្មួញ ខណ្ឌសែនសុខ ។
រថយន្តបែនដឹកដីម៉ាកហុីណូនោះ ពណ៌ត្រួយចេក ពាក់ផ្លាកលេខ ភ្នំពេញ ៣A-៤៨២៨ អ្នកបើកបរត្រូវបានម្ចាស់រថយន្តរងគ្រោះនាំគ្នាឃាត់ខ្លួនប្រគល់ឲ្យនគរបាលប៉ុស្តិ៍ តែក្រោយមកស្រាប់តែរត់គេចខ្លួនបាត់ ។
ចំណែករថយន្តដែលខូចខាតធ្ងន់ចំនួន៥គ្រឿងមាន ៖
១-ម៉ាកKIA ពណ៌ទឹកប្រាក់ អត់ផ្លាកលេខ
២-ម៉ាកព្រូស ពណ៌ទឹកប្រាក់ ពាក់ផ្លាកលេខ ភ្នំពេញ ២AM-៩៦៣១
៣-ម៉ាកហ៊ីយ៉ាន់ដាយទ្រុង ពាក់ផ្លាកលេខ ភ្នំពេញ ៣A -០៩០៦
៤-ម៉ាកនីស្សាន់ ពណ៌ស ពាក់ផ្លាកលេខ ភ្នំពេញ ២AL-៥៣០១ និង
៥-រថយន្តបែនដឹកដី ម៉ាកហុីណូ ពណ៌ប្រផេះ ពាក់ផ្លាកលេខភ្នំពេញ ៣A-៦៦២៩ ។
ចំណែករថយន្ត២គ្រឿងទៀតដែលខូចខាតស្រាល មួយគ្រឿងម៉ាកព្រូស ពណ៌ទឹកសមុទ្រនិងមួយគ្រឿងទៀតជាប្រភេទរថយន្តបែន បានបន្តដំណើរទៅបាត់ ។ តាមអ្នកឃើញហេតុការណ៍និយាយថា រថយន្តដែលរងគ្រោះទាំងអស់បើកបរតាមមហាវិ ថីឈ្នះ ឈ្នះ ពីខាងលិចទៅខាងកើត ។ លុះទៅដល់ចំណុចខាងលើ ក៏ឈប់នៅភ្លើងស្តុបជាបន្តបន្ទាប់គ្នា ។
ខណៈនោះ ស្រាប់តែរថយន្តបែនដឹកដីខាងលើ បើកបោះពួយក្នុងល្បឿនលឿនតាមទិសដៅស្របគ្នា បានមកបុករុុញរថយន្តដែលកំពុងឈប់ស្តុបម៉ាកKIA និងរថយន្តម៉ាកហ៊ីយ៉ាន់ដាយ ពេញកម្លាំងរុញឲ្យទៅបុកផ្ទប់ជាមួួួយរថយន្តនៅខាងមុខជាបន្តបន្ទាប់ ធ្វើឲ្យរថយន្ត៥គ្រឿងដែលនៅកណ្តាលរងការខូចខាតធ្ងន់ធ្ងរ ។
ចំណែក២គ្រឿងនៅខាងមុខរងការខូចខាតស្រាល ដោយឡែករថយន្តបែនដឹកដីដែលបង្កហេតុខ្ទេចស្រុញមុខ ។ បន្ទាប់ពីកើតមានគ្រោះថ្នាក់ រថយន្ត៦គ្រឿង ក្នុងនោះមានរថយន្តបង្កមួយគ្រឿងផងបានក្រពឹតជាប់គ្នា ខ្លះខ្ទាតចេញពីជួរបិទកំណាត់ផ្លូវទាំងមូលមួយចំហៀង បណ្តាលឲ្យកកស្ទះចរាចរណ៍ជាខ្លាំង ។
តាមម្ចាស់រថយន្តព្រូសនិយាយថា ភ្លាមៗអ្នកបើកបររថយន្តបង្ក ត្រូវបានរូបគាត់និងម្ចាស់រថយន្តនីស្សាន់នាំគ្នាឃាត់ខ្លួនប្រគល់ឲ្យនគរបាលដែលគេស្គាល់ថា ជាមន្ត្រីនគរបាលប៉ុស្តិ៍ ទុកចាត់ការតាមច្បាប់តែក្រោយមកស្រាប់តែអ្នកបើកបររថយន្តនោះរត់គេចខ្លួនបាត់ ដែលធ្វើឲ្យមានមន្ទិលយ៉ាងខ្លាំង ។
ចំពោះគ្រោះថ្នាក់នេះ ត្រូវបានអ្នកបើកបរអះអាងថា បណ្តាលមកពីជាន់ហ្វ្រាំងមិនស៊ី តែខ្លះថារថយន្តនោះបើកលឿនភ្លេចគិតថាគេឈប់នៅភ្លើងស្តុប ព្រោះមុនបុកគេឃើញរថយន្តនោះជាន់ហ្វ្រាំងអូសជាច្រើនម៉ែត្រ ។ ក្រោយកើតហេតុ សមត្ថកិច្ចបានទៅពិនិត្យវាស់វែង រួចប្រមូលយករថយន្តទាំង៦គ្រឿងទៅរក្សាទុក នៅការិយាល័យនគរបាលចរាចរណ៍ផ្លូវគោករាជធានីភ្នំពេញ រង់ចាំដោះស្រាយនៅពេលក្រោយ ។
សូមបញ្ជាក់ថា នៅតាមមហាវិថីឈ្នះ ឈ្នះ គេឃើញក្បួនរថយន្តដឹកដីបើកដង្ហែគ្នាដូចគេហែកឋិន ចេញពីរណ្តៅដីឧកញ៉ា ញ៉ឹក ផន ហៅកៅ ស្ថិតនៅបឹងតោមោក ក្នុងសង្កាត់គោករកា ខណ្ឌព្រែកព្នៅ និងបើកជែងគ្នាជ្រុះដីហុយទ្រលោមពេញផ្លូវ បង្កឲ្យមានគ្រោះថ្នាក់ជាបន្តបន្ទាប់ ដែលស្ទើរតែភ្ញៀវលែងហ៊ានទៅកម្សាន្ត ទៅទស្សនាវិមានឈ្នះ ឈ្នះទៅហើយ ។ដោយឡែក បើនិយាយពីរណ្តៅដីវិញគឺជីកដល់ក្បាលប្រេតទៅហើយ ដែលផ្ទុយពីការណែនាំរបស់សាលារាជធានីភ្នំពេញ ៕
ចែករំលែកព័តមាននេះ