រាជធានីភ្នំពេញ ៖ យោងតាមមន្ត្រីនៃមជ្ឈមណ្ឌលជាតិសន្តិភាព បានឲ្យដឹងនាព្រឹកថ្ងៃទី៩ មីនា នេះថា ក្រោយបញ្ជូនកងកម្លាំងមួកខៀវកម្ពុជា ទៅបំពេញក្នុងបេសកកម្មអង្គការសហប្រជាជាតិ ហើយបានស្នើសុំទៅតំណាងក្រសួងការពារជាតិរុស្ស៊ី ជួយធ្វើការបណ្តុះបណ្តាលលើជំនាញបោសសម្អាតមីន និងកម្ទេចគ្រាប់មិនទាន់ផ្ទុះដល់កងកម្លាំងមួកខៀវកម្ពុជា ដើម្បីពង្រឹងសមត្ថភាពបន្ថែម មុនចូលរួមបំពេញបេសកកម្ម ។
លោកនាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីន និងជាអគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាមបានស្នើសុំដូច្នេះ ស្របពេលដែលលោកដឹកនាំប្រតិភូទស្សនកិច្ចជាផ្លូវការនៅទីក្រុងម៉ូស្គូ ក្នុងរយៈពេល១សប្តាហ៍ កាលពីពីថ្ងៃទី៣ ដល់ថ្ងៃទី៩ មីនា តាមការអញ្ជើញពីក្រសួងការពារជាតិរុស្ស៊ី។
លោកបញ្ជាក់ថា «ការដែលស្នើសុំឱ្យជួយបណ្តុះជំនាញខាងលើនេះ ដោយសារខាងភាគីរុស្ស៊ី គេមានបទពិសោធន៍ខ្ពស់ជាងកម្ពុជា និងមានបច្ចេកទេសទំនើបៗផងដែរ ណាមួយ ក្នុងបេសកកម្មអង្គការសហប្រជាជាតិបច្ចុប្បន្ន កម្លាំងឧទ្ទាមមានការកែច្នៃគ្រាប់នូវបច្ចេកទេសខ្ពស់ ដែលលំបាកក្នុងការកម្ទេចគ្រាប់ និងគ្រាប់មីនផងដែរ”។
ចែករំលែកព័តមាននេះ