ខេត្តកំពង់ស្ពឺ ៖ ស្ទើររៀងរាល់យប់ឡានដឹកឈើមកពីពោធិសាត់ និងឱរ៉ាល់បានដឹកឈើចូលដេប៉ូមួយកន្លែង ដែលដេប៉ូនោះត្រូវបានជំនាញប្រាប់ថា មានច្បាប់ត្រឹមត្រូវតែឈើឯណោះវិញទេ ដែលមិនមានច្បាប់ព្រោះជាឈើលោតឆ័ត្រមកពីពោធិសាត់ និងច្រកអូរត្រាវ និងជាំស្រុកឱរ៉ាល់ ។…
ខេត្តកំពង់ស្ពឺ ៖ ស្ទើររៀងរាល់យប់ឡានដឹកឈើមកពីពោធិសាត់ និងឱរ៉ាល់បានដឹកឈើចូលដេប៉ូមួយកន្លែង ដែលដេប៉ូនោះត្រូវបានជំនាញប្រាប់ថា មានច្បាប់ត្រឹមត្រូវតែឈើឯណោះវិញទេ ដែលមិនមានច្បាប់ព្រោះជាឈើលោតឆ័ត្រមកពីពោធិសាត់ និងច្រកអូរត្រាវ និងជាំស្រុកឱរ៉ាល់ ។
ដេប៉ូឈើនោះស្ថិតនៅភូមិគោកឃុំសង្កែសាទបស្រុកឱរ៉ាល់ ខេត្តកំពង់ស្ពឺ ម្ចាស់ដេប៉ូនេះត្រូវបានស្គាល់ គឺឈ្មោះ ឆើត ហៅឌី ជាមេឈ្មួញឈើដ៏ធំប្រចាំស្រុកឱរ៉ាល់ ដែលសមត្ថកិច្ចល្មមៗមិនហា៑នសូម្បីតែទៅក្បែរ ។ ប្រភពពីសមត្ថកិច្ចមូលដ្ឋានបានបង្ហើបថា ថ្វីត្បិតតែដេប៉ូនេះមានច្បាប់ក៏ពិតមែនតែឈើដែលដឹកចូល គឺមិនមានច្បាប់នោះទេ សុទ្ធសឹងជាឈើលោតឆ័ត្រមកពីពោធិសាត់ និងច្រកអូរត្រាវ ។
ក្នុងការដឹកឈើរបស់ឈ្មួញឈើនេះ គឺគេបានទំនាក់ទំនងជាមួយស្ថាប័នពាក់ព័ន្ធរួចអស់ទៅហើយទើបដំណើរការរហូតមក ។ ហើយបើសិនជាឈើច្បាប់ក៏គេដឹកលើសច្បាប់ដែរ ព្រោះថាបើមិនដឹកលើស គឺមិនចំណេញ លើសពីនេះទៅទៀត បើទោះជាឈើមាន ឬគ្មានច្បាប់ក៏គេធ្វើឡើងនៅពេលយប់មិនដែលទំលាក់ឈើនៅពេលថ្ងៃឡើយ ជាងនេះទៅទៀតរាល់ការទំលាក់ឈើ គឺមិនដែលមានមន្ត្រីពាក់ព័ន្ធចុះពិនិត្យឡើយ ។ ភាពខុសប្រក្រតីនេះហើយ ដែលធ្វើអោយមជ្ឈដ្ឋានមហាជនលើកឡើងថា ទាំងឈ្មួញ និងស្ថាប័នពាក់ព័ន្ធទាំងអស់សុទ្ធសឹងជាមនុស្សតែមួយទើបអាចដំណើរការបាន បើសិនជាគ្មានការត្រូវរ៉ូវគ្នាទេ ឈ្មួញប្រាកដណាស់ថាគឺមិនអាចដឹកឈើចូលដេប៉ូរបស់ខ្លួនបានឡើយ ។
ដោយឡែកបើតាមប្រភពក្រៅផ្លូវការបានបង្ហើបថា ឈើដែលដឹកមកក្នុង១ឡាន៤០ម៉ែត្រគូប គឺមានច្បាប់តែ១០ម៉ែត្រគូបប៉ុណ្ណោះ ក្រៅពីនោះ គឺមិនមានច្បាប់នោះទេ ។ ក្នុងការដឹកឈើនេះទៀតសោតឈ្មួញត្រូវបង់ទៅអោយស្ថាប័នពាក់ព័ន្ធចាប់ពី១០០០០០រៀលទៅ១០០០០០០រៀលតាមកន្លែងតូចធំ ។
មន្ត្រីនគរបាលមូលដ្ឋានបានបង្ហើបថា ឈ្មួញឈើខាងលើនេះតែងតែបញ្ចេញចរិតក្រអើតក្រទមដាក់សមត្ថកិចថ្នាក់ក្រោមតូចតាច ព្រោះគេសំអាងថា គេបានទាក់ទងជាមួយជំនាញពាក់ព័ន្ធអស់ហើយ ។ បើមានក្រុមបង្ក្រាបណាមួយចុះពីលើមក គឺតាមរយៈគ្នីគ្នារបស់គេដែលជាមន្ត្រីជំនាញនៅមូលដ្ឋាន គឺឈ្មួញឈើរូបនេះដឹងហើយផ្អាកសកម្មភាពភ្លាម ។ បើទោះជាឈ្មួញរូបនេះទិញទឹកចិត្តមន្ត្រីជំនាញបានយ៉ាងណាក្តីនៅមានពេលខ្លះភ្លាត់ស្នៀតត្រូវក្រុមបង្ក្រាបមកពីលើដេញស្ទាក់បង្ក្រាបធ្វើអោយឈ្មួញរូបនេះរត់ភីងម្តងម្តាលដែរ ។
ជាក់ស្តែង កាលពីពេលកន្លងទៅថ្មីៗនេះឈ្មួញឈើខាងលើត្រូវក្រុមបង្ក្រាបមកពីផ្ទៃប្រទេសដេញចាប់ម្តងដែរ តែឥឡូវនេះទំនងជាត្រូវរ៉ូវអស់ហើយ ។ បើតាមមន្ត្រីរដ្ឋបាលព្រៃឈើមួយរូបប្រចាំស្តុកឱរ៉ាល់ដែលមិនសូវបានសើមមាត់សើមកនឹងគេបង្ហើបក្នុងលក្ខខ័ណមិនបញ្ចេញឈ្មោះថា ឈ្មួញឈើខាងលើនេះមិនមែនដឹកត្រឹមឈើលេខ១ ដែលមិនមានច្បាប់នោះទេជួនកាលដឹកឈើដុលទាំងឡានៗចេញទៅលក់នៅវៀតណាមទៀតផង ។ កូនចៅតូចតាចមិនហា៑ននោះទេ កុំថាឡើយបង្ក្រាបសូម្បីទៅក្បែរក៏មិនហា៑នផង ។ មានការលើកឡើងទៀតថាឈ្មួញឈើម្នាក់នេះតែងតែយកឈ្មោះចៅហ្វាយខេត្តមកនិយាយគំរាមមន្ត្រីថ្នាក់ក្រោមជានិច្ចនៅពេលដែលគេដឹកឈើម្តងៗ ។
មជ្ឈដ្ឋានប្រជាពលរដ្ឋបានសំណូមពរដល់ថ្នាក់ដឹកនាំមន្ទីរ និងជំនាញពាក់ព័ន្ធសូមមេត្តាចាត់វិធានការបង្ក្រាបផង បើបណ្តែតបណ្តោយគ្មានការបង្ក្រាបទេ ប្រាកដណាស់ដូចការលើកឡើងថា អស់លោកពិតជាត្រូវរ៉ូវគ្នាជាមួយឈ្មួញជាក់ជាមិនខាន តែបើអស់លោកមិនមានពាក់ព័ន្ធគួរណាស់ចាត់វិធានការបង្ក្រាបអោយមហាជនបានឃើញផង ។ មានការលើកឡើងទៀតថាកាលពីមិនទាន់សុំច្បាប់បើកដេប៉ូឈើឈ្មួញរូបនេះដឹកឈើមិនញញើតច្បាប់ផង ? ចុះទម្រាំមានច្បាប់ដេប៉ូទៀត រឿងអីត្រូវញញើត ? ការដែលសុំច្បាប់ដេប៉ូនេះ គឺគ្រាន់តែជាលេស ដើម្បីបន្លំភ្នែកមហាជនតែប៉ុណ្ណោះ ឯឈើដែលដឹកចូលសុទ្ធសឹងតែមិនមានច្បាប់ទាំងអស់ ។
សូមរំលឹកថា ឈ្មួញឈើដ៏ល្បីប្រចាំស្រុកឱរ៉ាល់ខាងលើនេះហាក់មានយីអ៊ុនគេចផុតពីការចាប់ខ្លួនក្នុងរបរបំផ្លាញព្រៃឈើនេះជារឿយៗខណៈឈ្មួញមួយចំនួនមានដីកាចាប់ខ្លួនហើយមួយចំនួនទៀតក៏ជាប់ឃុំរឿងដឹកឈើខុសច្បាប់នេះដែរ ។ ពាក់ព័ន្ធនឹងសេចក្តីរាយការណ៍នេះដែរអ្នកយកព័ត៌មានកោះសន្តិភាពបានព្យាយាមទាក់ទងសុំការពន្យល់បកស្រាយពីលោកណុប ឌីហៅ ឆើតដែរ តែទូរស័ព្ទមិនអាចទាក់ទងបាន ៕
ចែករំលែកព័តមាននេះ