ខេត្តស្ទឹងត្រែង ៖ កម្លាំងកងរាជអាវុធហត្ថខេត្តស្ទឹងត្រែងដឹកនាំដោយលោកដួង វិចិត្រ មេ បញ្ជាការរងបានចុះប្រតិបត្តិការបង្ក្រាបករណីគ្រឿងញៀន និងឃាត់ខ្លួនជនជាតិឡាវម្នាក់កាលពីវេលាម៉ោង១៥និង៥៥នាទីថ្ងៃទី០៧មីនា ២០១៩ នៅផ្លូវបំបែកចូលទៅវើនខាមចំណុចស្ពានទី២ ស្ថិតក្នុងភូមិខាំផាន់ សង្កាត់សាមគ្គី ក្រុងស្ទឹងត្រែង ។
ជាជំហានដំបូងគេនៅមិនទាន់ប៉ាន់ប្រមាណថា វត្ថុតាងដែលរឹបអូសបាននោះមានកម្រិតប៉ុន្មានឡើយ ដោយមានការចូលរួមត្រួតពិនិត្យ និងហែកកញ្ចប់ថ្នាំញៀនដោយព្រះរាជអាជ្ញារងអមសាលាដំបូងខេត្តស្ទឹងត្រែងនារសៀលថ្ងៃដដែលនេះដែរ ។ មេបញ្ជាការរងកងរាជអាវុធហត្ថខេត្តស្ទឹងត្រែងលោក ដួង វិចិត្រ បានបញ្ជាក់ប្រាប់កោះសន្តិភាពថា ដោយប្រើវិធានញុះញង់អោយមានការទិញលក់ទើបឈានដល់ការទប់ស្កាត់ និងបង្ក្រាបចាប់ខ្លួនជនជាតិឡាវម្នាក់ក្នុងគ្រាដឹកនាំគ្រឿងញៀនចូលមកកាន់ប្រទេសកម្ពុជាតាមច្រករបៀងជាប់ព្រំប្រទល់កម្ពុជា- ឡាវ ។
លោកបន្តថា ក្រោមការញុះញង់ជនសង្ស័យជនជាតិឡាវចំនួន២នាក់ជិះម៉ូតូ១គ្រឿង នាំយកថ្នាំញៀនមកដល់ច្រករបៀង ដោយមានម្នាក់ជាអ្នកកាន់ថ្នាំញៀនឆ្លងដែន និងម្នាក់ទៀតរង់ចាំនៅទឹកដីឡាវ ដូច្នេះទើបកម្លាំងប្រតិបត្តិការបង្ក្រាបចាប់ខ្លួនបានម្នាក់ រួមវត្ថុតាងជាក់ស្តែងបញ្ជូនមកបញ្ជាការដ្ឋានកងរាជអាវុធហត្ថខេត្ត និងបន្តនីតិវិធី ។
ជនសង្ស័យ ប៊ុន ម៉ា ភេទប្រុស អាយុ៤៣ឆ្នាំ ជនជាតិមានស្រុកកំណើតនៅភូមិបានដន ស្រុក ផូនហ្លូង វៀងច័ន្ទ ប្រទេសឡាវ ជាបងធំមានឥទ្ធិពលម្នាក់ គ្រប់គ្រង៥ខេត្ត នៅប្រទេសឡាវ និងជាជនសង្ស័យនាំថ្នាំញៀនឆ្លងដែនដោយផ្ទាល់ នេះបើតាមការបញ្ជាក់ពីកម្លាំងកងរាជអាវុធហត្ថចុះបេសកម្មផ្ទាល់ ។
ជនសង្ស័យ ប៊ុន ម៉ា បានឆ្លើយដោយផ្ទាល់មាត់ប្រាប់ទៅសមត្ថកិច្ចថា ថ្នាំញៀនទាំងនេះខ្លួនយកពីគេបន្តនៅក្រុងវៀងច័ន្ទមកជួញដូរ ហើយការឆ្លងដែននេះ ទើបជាលើកដំបូងទេ ។ ជនសង្ស័យដដែលនេះបញ្ជាក់ប្រាប់ទៅព្រះរាជអាជ្ញារងលោក វង្ស សាវ៉ាត ថា ថ្នាំញៀនដែលខ្លួនកាន់មកនេះមានចំនួន៣៩កញ្ចប់ខៀវ ហើយក្នុងមួយកញ្ចប់ជាទូរទៅមាន២០០គ្រាប់ ឬអាចលើស និងខ្វះបូករួម និងមេចំនួន២គ្រាប់ក្នុងកញ្ចប់នីមួយៗ ។
ក្រោមសកម្មភាពជាក់ស្តែងមន្ត្រីជំនាញបានហែកកញ្ចប់ថ្នាំញៀននៅចំពោះមុខជនសង្ស័យក្រោមការសម្របសម្រួលពីព្រះរាជអាជ្ញារង និងដកសំណាកធ្វើតេស្តជាក់ស្តែងវត្ថុតាងដកហូតជាប្រភេទមេតំហ្វេតាមីន WY សរុបចំនួន៧.៦៨៣គ្រាប់ ។ បច្ចុប្បន្នជនសង្ស័យស្ថិតក្រោមការកសាងសំណុំរឿងបញ្ជូនទៅតុលាការតាមនីតិវិធី ៕
ចែករំលែកព័តមាននេះ