រាជធានីភ្នំពេញ ៖ អតីតមន្ត្រីជាន់ខ្ពស់គណបក្សសង្គ្រោះជាតិដែលត្រូវបានព្រះមហាក្សត្រព្រះរាជទានសិទ្ធិធ្វើនយោបាយឡើងវិញ មួយរូបបានស្នើសុំធ្វើជាមន្ត្រីបម្រើការងារនៅក្នុងក្រសួងកសិកម្ម រុក្ខាប្រម៉ាញ និងនេសាទ ។ នេះជាលើកដំបូងហើយដែលអតីតមន្ត្រីប្រឆាំងបានស្នើសុំឲ្យផ្ទាល់ទៅកាន់រាជរដ្ឋាភិបាល ដើម្បីបម្រើការងារក្នុងក្រសួងបែបនេះ ខណៈមន្ត្រីរបស់បក្សប្រឆាំងមួយចំនួនទៀតគ្មានសិទ្ធិធ្វើនយោបាយរយៈពេល៥ឆ្នាំ ។
លោកគង់ បូរ៉ា អតីតសមាជិកសភាគណបក្សសង្គ្រោះជាតិ និងជាកូនប្រុសលោកគង់ គាំ បានសរសេរលិខិតមួយច្បាប់ជូនលោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ និងនេសាទ ដើម្បីសុំចូលបម្រើការងារនៅក្នុងក្រសួងកសិកម្ម ។ លិខិតរបស់លោក គង់ បូរ៉ាបានតាមរយៈលោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកអគ្គនាយកនៃអគ្គនាយករដ្ឋានសុខភាពសត្វ និងផលិតកម្មសត្វ សូមលោករដ្ឋមន្ត្រីជ្រាប«ខ្ញុំបានបញ្ចប់តួនាទីជាអ្នកតំណាងរាស្ត្រមណ្ឌលព្រៃវែងចំនួន២នីតិកាល (នីតិកាលទី៤ និងទី៥) ហើយទើបរួចពីមម្រាបធ្វើនយោបាយ កាលពីខែមករា ឆ្នាំ២០១៩ ថ្មីៗ ដូចនេះខ្ញុំបានសូមគោរពស្នើសុំចូលបម្រើការងារជាមន្ត្រីរាជការនៃនាយករដ្ឋានសុខភាពសត្វ និងសុខភាពសាធារណៈបសុព្យាបាល ទៅតាមភាពអនុគ្រោះរបស់គោលនយោបាយរបស់រាជរដ្ឋាភិបាល សម្រាប់កាលៈទេសៈ ។
សូមជម្រាបថា ការសុំធ្វើជាមន្ត្រីរាជការរបស់អតីតមន្ត្រីជាន់ខ្ពស់បក្សប្រឆាំងនេះបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីបានប្រកាសជាសាធារណៈកាលពីពេលថ្មីកន្លងមកឲ្យអតីតអុ្នកនយោបាយគណបក្សសង្គ្រោះជាតិដែលត្រូវបានហាមឃាត់ក្នុងការធ្វើនយោបាយរយៈពេល៥ឆ្នាំប្រញាប់ដាក់ពាក្យសុំសិទ្ធិធ្វើនយោបាយឡើងវិញ បើមិនដូច្នេះទេទ្វារផ្តល់សិទ្ធិនយោបាយអាចនឹងត្រូវបញ្ចប់មុនចូលឆ្នាំខ្មែរ ឬក្រោយចូលឆ្នាំខ្មែរ ។
ចំណែកលោក សុខ ឥសាន អ្នកនាំពាក្យក៏បានអំពាវនាវដល់ក្រុមកឹម សុខា និងនិយមរួមទាំងកូនស្រីលោកកឹម សុខា គួប្រញាប់ដាក់ពាក្យសុំសិទ្ធិនយោបាយផងដែរ ។ គួរបញ្ជាក់អតីតមន្ត្រីគណបក្សសង្គ្រោះជាតិចំនួន៣នាក់ ត្រូវបានព្រះមហាក្សត្រព្រះរាជទានផ្តល់សិទ្ធិនយោបាយឡើងវិញក្នុងចំណោមអ្នក១១៨នាក់ ដែលត្រូវតុលាការកំពូលហាមឃាត់ធ្វើនយោបាយរយៈពេល៥ឆ្នាំ៕
ចែករំលែកព័តមាននេះ