សហរដ្ឋអាមេរិក ៖ លោក Mark Zuckerberg បាននិយាយថា ហ្វេសប៊ុកនឹងចាប់ផ្តើមផ្តោតសំខាន់លើសេវាកម្មផ្ញើសារដែលការពារសិទ្ធិឯកជនថ្មី ។ សហស្ថាបនិក និងនាយកប្រតិបត្តិរបស់ហ្វេសប៊ុកខាងលើបានសន្យាថា នឹងកែទម្រង់សេវាកម្មដែលធ្លាប់តែប្រមូលព័ត៌មានផ្ទាល់ខ្លួនរបស់អ្នកប្រើប្រាស់ ។
លោកបាននិយាយថា ទៅមុខទៀតសេវានេះនឹងផ្តោតសំខាន់លើការផ្តល់វិធីកាន់តែច្រើនដល់អ្នកប្រើប្រាស់ក្នុងការប្រាស្រ័យទាក់ទងដោយមានភាពឯកជន ។ យ៉ាងណាក្តី អ្នករិះគន់នៅមិនទាន់ជឿជាក់ថាលោក Zuckerberg ពិតជាប្តេជ្ញាថាកែតម្រង់ពិតប្រាកដទេ ។
Jen King ដែលជាប្រធានផ្នែកភាពឯកជនរបស់អតិថិជននៅមជ្ឈមណ្ឌលអ៊ីនធើណែតនិងសង្គមក្រោម Standford Law School បាននិយាយថា «វាមិនអាចដោះស្រាយបញ្ហាដាក់គោលដៅសម្រាប់ការផ្សាយពាណិជ្ជកម្ម និងការប្រមូលពត៌មានពីបុគ្គលទេ» ។
លោក Zuckerberg បានចែករំលែកទស្សនៈវិស័យនេះកាលពីថ្ងៃពុធ បន្ទាប់ពីខិតខំឆ្លងកាត់ការរិះគន់អស់ប្រមាណ ២ឆ្នាំមកនេះទាក់ទិននឹងការគ្រប់គ្រងព័ត៌មានឯកជនរបស់អ្នកប្រើប្រាស់ ។ ក្នុងនោះរួមមានការចែករំលែកពត៌មានផ្ទាល់ខ្លួនរបស់អ្នកប្រើប្រាស់ប្រមាណ៨៧លាននាក់ ជាមួយនឹងក្រុមហ៊ុនប្រមូលទិន្នន័យដែលធ្វើការលើយុទ្ធនាការបោះឆ្នោតឲ្យលោកប្រធានាធិបតីដូណាល់ត្រាំ (Donald Trump) ផងដែរ ។
តាំងពីការបោះឆ្នោតនៅឆ្នាំ២០១៦ មក ហ្វេសប៊ុកក៏ត្រូវបានទទួលរងការរិះគន់ថាអនុញ្ញាតឲ្យភ្នាក់ងាររុស្ស៊ីប្រើសេវាកម្មរបស់ខ្លួនដើម្បីផ្ញើសារជំរុញឲ្យមានការខ្វែងគំនិតគ្នាទៅកាន់អ្នកបោះឆ្នោតអាមេរិក និងចែករំលែកពត៌មាននយោបាយមិនពិតទៀតផង ។
ដើម្បីឆ្លើយតបនឹងកំហុសឆ្គង លោក Zuckerberg មានគម្រោងកែទម្រង់កម្មវិធី Messenger, WhatsApp និង Instagram ដើម្បីទប់ស្កាត់មិនឲ្យមាននរណាម្នាក់ក្រៅពីអ្នកផ្ញើ និងអ្នកទទួលសារប៉ុណ្ណោះដែលដឹងពីខ្លឹមសារ ៕
ចែករំលែកព័តមាននេះ