រាជធានីភ្នំពេញ ៖ គិតមកដល់ម៉ោងនេះ កូនខ្មែរសញ្ជាតិអាមេរិក លោក ហ៊ុន ចាន់រាជ បានធ្វើឱ្យពិភពលោកស្គាល់ពីក្បាច់គុនរបស់ខ្មែរកាន់តែខ្លាំង តាមរយៈការបង្កើតក្លិបទទួលសិស្សឱ្យហ្វឹកហាត់ ហើយបញ្ជូនចេញប្រកួតនៅក្នុងព្រឹត្តិការណ៍គុនចម្រុះផ្សេងៗធ្វើឱ្យពិភពលោកដឹងថា កម្ពុជាក៏មានកីឡាករល្អៗនៅក្នុងព្រឹត្តិការណ៍ប្រដាល់ធំៗ ។
លោកគឺជាស្ថាបនិកក្រុម Cambodian Top Team (CTT) ដែលបានប្រកាសជារឿយៗថា ការបង្កើតក្រុមនេះព្រោះតែក្នុងគោលបំណងបង្កើតចលនាក្បាច់គុនចម្រុះនៅក្នុងប្រទេសកម្ពុជាសម្រាប់កីឡាករក្មេងៗឲ្យបានល្បីឈ្មោះ លើឆាកអន្តរជាតិតាមរយៈការផ្ដល់ឱកាសឱ្យបង្ហាញសមត្ថភាព ។
លោក ហ៊ុន ចាន់រាជ ធ្លាប់អះអាងថា លោកគឺជាអ្នកប្រដាល់ និងបានស្គាល់ច្បាស់ពីតម្លៃនៃក្បាច់គុននេះ ទើប៧ឆ្នាំក្រោយត្រឡប់មកកាន់ទឹកដីកម្ពុជា លោកបានខិតខំប្រឹងប្រែងក្នុងការកសាងទម្រង់មួយដែលជួយកីឡាករខ្មែរជំនាន់ក្រោយជាច្រើនឲ្យចាប់ផ្តើមរះឡើងក្នុងការប្រកួតប្រដាល់គុនចម្រុះ (MMA)។
ក្នុងនាមជាអ្នកដឹកនាំក្រុម CTT ដ៏ល្បីល្បាញ និងជាអគ្គលេខាធិការនៃសហព័ន្ធកីឡាយុទ្ធគុនចម្រុះដែលទើបសម្ពោធឡើងកាលពីពេលថ្មីៗនេះ លោកកាន់តែផ្សារភ្ជាប់ខ្លួនទៅក្នុងវិស័យក្បាច់គុនរបស់ខ្មែរដែលជាមូលដ្ឋានពោរពេញទៅដោយអ្នកមានសមត្ថភាព និងទេពកោសល្យ ដើម្បីបង្ហាញដល់អន្តរជាតិ ។
កូនសិស្សរបស់លោកជាច្រើនរូបដែលទទួលការហ្វឹកហាត់នៅក្នុងក្លិបរបស់លោក សុទ្ធសឹងតែមានកិច្ចសន្យាជាមួយស្ថាប័នប្រដាល់ពិភពលោក ONE Championship ហើយកីឡាករទាំងនោះមិនថាប្រុស ឬស្រី គឺសុទ្ធតែបានបញ្ជូនឱ្យចេញប្រកួតនៅក្នុងព្រឹត្តិការណ៍ធំៗលើសង្វៀនអន្តរជាតិក្រៅប្រទេស ។
ពួកគេត្រូវបានចូលរួមប្រកួតលើសង្វៀនជុំវិញពិភពលោក និងបាននាំយកជ័យជម្នះយ៉ាង ក្រាស់ក្រែលមកឲ្យកម្ពុជាវិញដែលធ្វើឱ្យពិភពលោកមានការចាប់អារម្មណ៍លើប្រទេសកម្ពុជាកាន់តែខ្លាំងឡើង ។
ស្ថាបនិក CTT រូបនេះរំលឹកពេលសាកល្បងនាំយកកីឡាប្រដាល់គុនចម្រុះដំបូងថា ៖«ពេលខ្ញុំមកទីនេះដំបូងពួកគេមិនស្គាល់ថា ប្រដាល់គុនចម្រុះ Mixed Martial Arts ជាអ្វីនោះទេ ។ ខ្ញុំពិតជាពិបាកណាស់ពេលព្យាយាមប្រាប់ពួកគេថាក្បាច់គុនចម្រុះគឺជាកីឡា ហើយវាមិនដូចការវៃ៉តប់គ្នាតាមដងផ្លូវនោះទេ ។ យើងខំពន្យល់ពួកគេ និងបានបង្រៀនពួកគេទាក់ទងនឹងគុនចម្រុះ MMA ថា តាមពិតវាមានសុវត្ថិភាពជាងកីឡាប្រដាល់ធម្មតា ឬការប្រដាល់គុនខ្មែរបស់យើងទៅទៀត ។ និយាយទៅទម្រាំពួកគាត់យល់ត្រូវចំណាយពេលយូរដែរ»។
បច្ចុប្បន្ន លោក ហ៊ុន ចាន់រាជ កាន់តែមើលឃើញអនាគតដ៏ត្រចះត្រចង់មួយសម្រាប់កីឡាករកម្ពុជាដែលមានឆន្ទៈ និងបានគិតថា កម្ពុជានឹងមានពេលវេលាដ៏អស្ចារ្យច្រើនទៀតដើម្បីបង្អួតភ្នែកមហាជន ជាពិសេសគឺពិភពលោក ។ ដោយសារតែវត្តមានរបស់លោកដែលចុះមកបង្ហាត់ និងទំនាក់ទំនងជាមួយស្ថាប័នអន្តរជាតិ ហើយបានបញ្ជូនកីឡាករក្មេងៗឱ្យទៅប្រកួតជាហូរហែជាមួយបរទេសនៅក្នុងព្រឹត្តិការណ៍អន្តរជាតិ ទើបក្នុងរយៈពេលមុនស្ថាប័ន One FC បានចុះមកបើកប្រកួតនៅក្នុងប្រទេសកម្ពុជា ហើយធ្វើឱ្យកម្ពុជាកាន់តែត្រូវទទួលស្គាល់ថាជាប្រទេសមួយដែលមានគ្រឹះកីឡាករល្អៗសម្រាប់ព្រឹត្តិការណ៍គុនចម្រុះដ៏ពេញនិយមនៅលើពិភពលោក ៕
ចែករំលែកព័តមាននេះ