រាជធានីភ្នំពេញ ៖ កិច្ចប្រជុំកំពូលរវាងថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិបានបន្តនៅថ្ងៃទី២របស់ខ្លួន គឺថ្ងៃទី១៧ កញ្ញា ម្សិលមិញដើម្បីរកការរួបរួមគ្នា និងឯកភាពគ្នាដែលបក្សទាំង២បានអះអាងថា ដោះស្រាយបញ្ហាជាតិនៅវិមានរដ្ឋសភាជាង៣ម៉ោង តែមិនទាន់បានទទួលលទ្ធផលជាផ្លែផ្កានៅឡើយទេ ។
ប៉ុន្តែថ្នាក់ដឹកនាំគណបក្សទាំងពីរស្នើឱ្យទៅពិភាក្សាផ្ទៃក្នុងសិន មុននឹងជួបគ្នាបន្តទៀត ដើម្បីរកដំណោះស្រាយចុងក្រោយណាមួយដែលអាចទទួលយកបានទាំងសងខាង។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានបញ្ជាក់ថា គណបក្សទាំងពីរកំពុងស្វែងរកលទ្ធភាពត្រួសត្រាយផ្លូវដើម្បីធ្វើយ៉ាងណាឱ្យគម្លាតនៃភាពខុសគ្នាកាន់តែតូចទៅៗ ហើយកាន់តែខិតជិតគ្នា ។ ប៉ុន្តែយើងត្រូវការពេលវេលាបន្ថែមទៀត ព្រោះបញ្ហាក៏មានច្រើន ស្ថាប័ននានាក៏មានលក្ខណៈសំខាន់ច្រើនក្នុងការកែទម្រង់ប្រទេសជាតិរបស់យើង ។ ដូច្នេះយើងទាមទារពេលវេលាដើម្បីធ្វើការជជែកគ្នាសាជាថ្មី តាមក្រុមការងារនីមួយៗ ដើម្បីរកចំណុចរួមមួយ ឱ្យបានក្នុងពេលឆាប់ៗខាងមុខមុនថ្ងៃទី២៣ កញ្ញា ។
លោកប្រាក់ សុខុន មានប្រសាសន៍ថា កិច្ចប្រជុំថ្ងៃនេះគឺបន្តស្មារតីកិច្ចប្រជុំកាលពីថ្ងៃទី១៦ កញ្ញា គណបក្សទាំងពីរនឹងបន្តពិភាក្សាគ្នាដើម្បីឈានទៅរកដំណោះស្រាយបញ្ហាប្រទេសជាតិរបស់យើង ។ ថ្ងៃនេះគណបក្សទាំងពីរបានពិភាក្សាគ្នាយ៉ាងច្រើនណាស់លើប្រធានបទទាក់ទងនឹងបញ្ហាការរៀបចំតទៅមុខរបស់ប្រទេសជាតិ ។ ថ្វីដ្បិតតែមិនទាន់បានស្រុះស្រួលគ្នា១០០% ប៉ុន្តែក៏មានការឯកភាពទៅលើចំណុចមួយចំនួន ។ ទោះបីជាមិនបានចេញសេចក្តីថ្លែងការណ៍ជាផ្លូវការ ក៏ប៉ុន្តែយើងបានទទួលជាដុំកំភួន ដែលបានដោះស្រាយហើយដែរ ។ លោក យឹម សុវណ្ណ បានថ្លែងបន្តថា កាលពីថ្ងៃទី១៦ កញ្ញា យើងបានជជែកគ្នារួចហើយការកែទម្រង់ គ .ជ.ប ។ ប៉ុន្តែនៅការពិភាក្សាបណ្តាស្ថាប័នសំខាន់ៗដទៃទៀត ដែលត្រូវជជែកគ្នាបន្ត ។ យើងបានជជែកគ្នាប្រកបទៅដោយការយោគយល់គ្នា គោរពគ្នាទៅវិញទៅមក ថ្លឹងថ្លែងពីផលប្រយោជន៍ជាតិ ជាពិសេស គឺយើងបានជួបគ្នារយៈពេលថ្ងៃនេះធ្វើឱ្យមានការកាន់តែខិតជិតគ្នាហើយ ។
លោកប្រាក់ សុខុន មានប្រសាសន៍ ថា ក្នុងស្មារតីស្វែងរកដំណោះស្រាយសម្រាប់ជាតិទាំងមូលដូចគ្នា ដូច្នេះថ្នាក់ដឹកនាំគណបក្សទាំងពីរកាន់តែយល់គ្នា ការពិភាក្សាថ្ងៃនេះទៅលើចំណុចជាច្រើនដែលលទ្ធផលនៃការពិភាក្សានេះ ខ្ញុំមិនអាចទាន់ជម្រាបជូនបានទេ ។ នៅពេលណាបានលទ្ធផលហើយ ទើបអាចជម្រាបជូនបាន យើងនៅលើផ្លូវរកដំណោះស្រាយដូចគ្នាទេ ហើយនឹងជម្រាបជូននៅពេលសមស្រប ។ លោក យឹម សុវណ្ណ បន្តថា ប្រជាពលរដ្ឋតែងមានចម្ងល់ ក៏ប៉ុន្តែនៅពេលដែលបានចេញលទ្ធផលគួរជាទីគាប់ចិត្តនោះពួកគាត់អស់ចម្ងល់ហើយ ។ គណបក្សនីមួយៗមាននយោបាយសម្រាប់បកស្រាយជូនពួកគាត់ដើម្បីអស់ចម្ងល់។ គោលជំហរគណបក្សសង្គ្រោះជាតិគឺរកយុត្តិធម៌ជូនប្រជាពលរដ្ឋ គឺកែទម្រង់ គ.ជ.ប កែទម្រង់ប្រព័ន្ធបោះឆ្នោតមានទាំងសមាសភាព មានទាំងមូលដ្ឋានច្បាប់មួយចំនួន បញ្ជីចុះឈ្មោះបោះឆ្នោត រួមទាំងបច្ចេកវិជ្ជាជាដើម និងកែទម្រង់បណ្តាស្ថាប័ននានាមួយចំនួនសំខាន់ៗ សំខាន់បំផុតយុត្តិធម៌ ទោះជានៅក្នុងរូបភាពណាក៏ដោយ ។ យើងត្រូវការពេលវេលា៥ទៅ៦ថ្ងៃទៀតដើម្បីដោះស្រាយបញ្ហា ។
លោកប្រាក់ សុខុន បានបញ្ជាក់ថា យើងកំពុងស្ថិតនៅលើផ្លូវក្នុងការដោះស្រាយរួមគ្នា ហើយ ដូច្នេះសូមមេត្តាអត់ធ្មត់បន្តិចទុកពេលវេលាឱ្យគណបក្សទាំងពីរបន្តការពិភាក្សាគ្នាតទៅទៀត ។ ការពន្យារពេលប្រជុំលើកទី១ របស់រដ្ឋសភាមិនអាស្រ័យទៅលើគណបក្សណាទេ គឺអាស្រ័យទៅលើព្រះមហាក្សត្រ ។ ហើយការចូលរួមប្រជុំ ឬមិនចូលរួមប្រជុំគឺអាស្រ័យ លើគណបក្ស គោរពដង្ហែតាមព្រះមហាក្សត្រឬអត់? ពាក់ព័ន្ធនឹងបាតុកម្មថ្ងៃទី១៥ ,១៦ និង១៧ កញ្ញា លោកយឹម សុវណ្ណ បន្តថា យើងគោរពពាក្យសន្យា ហើយយើងសូមបញ្ឈប់បណ្តោះអាសន្ននៅថ្ងៃទី១៧ កញ្ញា នេះ ។ យើងចាំមើលស្ថានការណ៍ពីពេលនេះ ដែលវិវឌ្ឍន៍ទៅរយៈពេល៥ថ្ងៃទៅមុខ ។ ពាក់ព័ន្ធនឹងការកែទម្រង់ស្ថាប័នជាតិសំខាន់ៗមិនមែនតែទៅលើរដ្ឋសភាមួយទេ គឺមាន តាមការប៉ាន់ស្មានមិនលើសពី១០ទេ ដែលត្រូវធ្វើកំណែទម្រង់ ។
លោកប្រាក់ សុខុន បានគូសបញ្ជាក់ជាថ្មីថា លទ្ធផលមិនទាន់ប្រកាសបានទេ គឺនៅក្នុងការពិភាក្សាគ្នានៅឡើយ តែព័ត៌មានល្អសម្រាប់អ្នកកាសែត និងសាធារណជនគឺគណបក្សទាំង២កំពុងតែខិតជិតគ្នាហើយ ៕
ចែករំលែកព័តមាននេះ