ក្រុមអ្នកវិទ្យាសាស្ត្រឱ្យដឹងថា ភ្នំភ្លើងដ៏ធំបំផុតនៅលើពិភពលោក ដែលគ្មានថាមពលប្រទះឃើញនៅបាតមហាសមុទ្រប៉ាស៊ីហ្វិក ។ ឯកសារ Nature Geoscience បង្ហាញថា ផ្ទៃក្រឡារបស់ភ្នំភ្លើង Tamu Massif មានទំហំប្រហែល៣១០.០០០គីឡូម៉ែត្រក្រឡា ឬធំប្រហាក់ប្រហែលនឹងភ្នំភ្លើងអូឡាំប៉ាស ម៉ុង នៅភពព្រះអង្គារ ជាភ្នំភ្លើងមានទំហំធំបំផុតក្នុងប្រព័ន្ធសុរិយចក្កវាឡ ។
ភ្នំភ្លើង Tamu Massif មានរាងក្រឡូម ចំណុចដែលខ្ពស់បំផុត ស្ថិតនៅក្នុងកម្រិតជម្រៅប្រហែល២គីឡូម៉ែត្រ ឯផ្ទៃក្រឡាទាំងមូលស្ថិតក្នុងកម្រិតជម្រៅប្រហែល៦,៤គីឡូម៉ែត្រ ក្នុងមហាសមុទ្រឆ្ងាយពីប្រទេសជប៉ុននៅភាគខាងកើតប្រហែល១.៦០០គីឡូម៉ែត្រ និងធំជាងភ្នំភ្លើង Mauna Loa ធ្លាប់ជាភ្នំភ្លើងដែលធំបំផុតនៅលើពិភពលោក ស្ថិតនៅក្នុងរដ្ឋហាវ៉ៃ សហរដ្ឋអាមេរិក មានក្រឡាផ្ទៃប្រហែល៥.២០០គីឡូម៉ែត្រក្រឡា និងនៅតែជាភ្នំភ្លើងនៅមានថាមពល ។
ភ្នំភ្លើងនៅបាតសមុទ្រនោះ កើតឡើងកាលពីជាង១៤៥លានឆ្នាំមុន និងទំហំបានរីករាលដាលកាន់តែធំដោយសារតែកាកសំណល់នៃការក្អែរ ខណៈពេលអ្នកវិទ្យាសាស្ត្រនៅមិនអាចឆ្លើយបានថា តើកំពូលភ្នំភ្លើងនឹងផុសឡើងនៅលើផ្ទៃទឹក ឬអាចផ្ទុះឡើងឬអត់ ទេ ៕
ចែករំលែកព័តមាននេះ