ខេត្តកោះកុង ៖ ចាប់តាំងពីឆ្នាំ២០០៧មកតំបន់ដាច់ស្រយាលជីផាតបានប្រែមុខមាត់ខ្លាំង ដោយអ្នកភូមិមានការងារធ្វើ ហើយជីវភាពកាន់តែប្រសើរ ពីការបង្កើតសហគមន៍ទេសចរណ៍ ។ ប្រជាពលរដ្ឋស្ទើរតែ១០០% លែងធ្វើចំណាកស្រុក ។…
ខេត្តកោះកុង ៖ ចាប់តាំងពីឆ្នាំ២០០៧មកតំបន់ដាច់ស្រយាលជីផាតបានប្រែមុខមាត់ខ្លាំង ដោយអ្នកភូមិមានការងារធ្វើ ហើយជីវភាពកាន់តែប្រសើរ ពីការបង្កើតសហគមន៍ទេសចរណ៍ ។ ប្រជាពលរដ្ឋស្ទើរតែ១០០% លែងធ្វើចំណាកស្រុក ។ អ្នកឃុំជីផាត ស្រុកថ្មបាំង ខេត្តកោះកុង បានប្រកបរបរដាំដំណាំ នាំភ្ញៀវទេសចរដើរកម្សាន្ត និងប្រកបរបរ ផ្សេងៗទៀត ដើម្បីបំពេញតម្រូវការភ្ញៀវទេសចរ ។
ថ្លែងប្រាប់អ្នកសារព័ត៌មានអំពីតំបន់ទេសចរ ណ៍កាលពីពេល ថ្មីៗកន្លងមកលោកសូ លីហៀង ប្រធានស្តីទីសហគមន៍អេកូទេសចរណ៍ជីផាត បញ្ជាក់ថា សម្រាប់បញ្ហាចំណាកស្រុក គឺកាត់បន្ថយបានសឹងតែ១០០ភាគរយក្រោយបង្កើតសហគមន៍អេកូទេសចរណ៍ជីផាត ។
អ្វីដែលកាន់តែពិសេសជាងនេះទៀតនោះ សហគមន៍អេកូទេសចរណ៍ជីផាត បានបែងចែកប្រាក់វិភាគទានសម្រាប់កសាងប្រព័ន្ធលូ ជួសជុលផ្លូវ និងបែងចែកដល់សមាជិកសហគន៍ ដែលបម្រើភ្ញៀវទេសចរនៅក្នុងសហគន៍ ។
ឃុំជីផាតមានប្រជាពលរដ្ឋជាង៦០០គ្រួសារ ហើយមានពលរដ្ឋ៣៦២គ្រួសារជាសមាជិករបស់សហគមន៍ ដូច្នេះពួកគាត់អាចទាញប្រយោជន៍ពីសហគន៍ដូចជា៖ ធ្វើជាចុងភៅភូមិ ចុងភៅព្រៃ មគ្គុទេ្ទសក៏នាំភ្ញៀវដើរទស្សនាកន្លែងកម្សាន្តនានានៅក្នុងតំបន់អេកូទេសចរណ៍ជីផាត ។
លោកសូ លីហៀង រំឭកថា នៅឆ្នាំ១៩៩៨ នៅជីផាត មានសកម្មភាពកាប់បំផ្លាញព្រៃឈើ ការទន្ទ្រានព្រៃយកដីធ្វើស្រែ និងបរបាញ់សត្វព្រៃយ៉ាងអនាធិបតេយ្យ ប៉ុន្តែដោយ មានការមើលឃើញ និងជួយជ្រោមជ្រែងពីអង្គការវ៉ាយឡែហ្វ ឡាយអ៊ិន បានកាត់បន្ថយ និងលុបបំបាត់សកម្មភាពបែបនោះជា បណ្ដើរៗ រហូតដល់មានការចងក្រងឯកសារមួយចំនួន ជាមួយអាជ្ញាធរដែនដី និងប្រជាពលរដ្ឋចំនួន ៤ភូមិនៅក្នុងឃុំជីផាតនេះ បង្កើតទៅជា សហគមន៍ឡើង ។
សហគមន៍អេកូទេសចរណ៍ជីផាត ត្រូវបានបង្កើតឡើងតាំងពីឆ្នាំ២០០៧ ក្នុងគោលបំណងចូលរួមថែរក្សាការពារបរិស្ថាន ធនធានធម្មជាតិ ព្រៃឈើ និងសត្វព្រៃជាដើម ។
ខេត្តកោះកុងមាន តំបន់រមណីយដ្ឋាន សំខាន់ៗ រំពឹងនឹងទទួលភ្ញៀវទេសចរបានច្រើននោះរួមមាន រមណីយដ្ឋានទឹកធ្លាក់តាចាត ទឹកធ្លាក់សិលាមានជ័យ ទឹកធ្លាក់កោះប៉ោ តំបន់អារ៉ែង តំបន់ពាមក្រសោប ព្រៃកោងកាង តំបន់ជីផាតជាដើម ៕
ចែករំលែកព័តមាននេះ