ខេត្តកំពត ៖ អង្គការសង្គ្រោះសត្វព្រៃកម្ពុជា (SCW) ដែលមានការិយាល័យរបស់ខ្លួននៅខេត្តកំពត បានបង្ហាញរមណីយដ្ឋាន និងតំបន់ទេសចរណ៍ធម្មជាតិមួយ នៅព្រែកត្នោតដែលជាកន្លែងទើបតែបង្កើតថ្មី នៅឃុំព្រែកត្នោត ស្រុកទឹកឈូ ។ លោកឆឹង សុវីរីយ៉ា ប្រធានការិយាល័យអង្គការសង្គ្រោះសត្វព្រៃខេត្តកំពតបង្ហាញរមណីយដ្ឋាននេះក្នុងសិក្ខាសាលាផ្សព្វផ្សាយ និងឆ្លុះបញ្ចាំងលើលទ្ធផលការងារអនុវត្តគំរោងនៅមន្ទីរបរិស្ថានខេត្តកាលពីព្រឹកថ្ងៃទី២៣ សីហា ដោយមានលោកជួង ស៊ីវវុទ្ធ អភិបាលរងខេត្ត ជាអធិបតី និងមានការចូលរួមពីលោកប្រធានឧទ្យានជាតិព្រះមុនីវង្សបូកគោ មន្ត្រីមកពីមន្ទីរទេសចរណ៍ខេត្ត និងអង្គការចំនួន១៤ជាដៃគូ ព្រមទាំងប្រជាពលរដ្ឋមកពីសហគមន៍ព្រែកត្នោត ។
លោកឆឹង សុវីរីយ៉ា មានប្រសាសន៍ថា អង្គការសង្គ្រោះសត្វព្រៃហៅកាត់ SCW បានបើកការិយាល័យរបស់ខ្លួននៅខេត្តកំពតតាំងពីឆ្នាំ២០០៧មក ។ អង្គការសង្គ្រោះសត្វព្រៃបានប្រើយុទ្ធសាស្ត្រ២សំខាន់ៗ ទី១-ការអប់រំនៅក្នុងសហគមន៍ផ្នែកការគ្រប់គ្រងធនធានធម្មជាតិ និងទី២-លើកស្ទួយកំរិតជីវភាពរបស់សហគមន៍ដោយបានបង្កើតឡើងរមណីយដ្ឋានថ្មីមួយនៅឃុំព្រែកត្នោត ។ លោកប្រធានអង្គការបាននិយាយថា ពីមុនប្រជាពលរដ្ឋនៅឃុំព្រែកត្នោតមួយភាគធំមានរបរដើរដាក់អន្ទាក់សត្វព្រៃគ្រប់ប្រភេទនៅជើងភ្នំបូកគោ តែក្រោយមកអង្គការបង្កើតជាសហគមន៍ណែនាំមិនឱ្យប្រជាពលរដ្ឋទៅបាញ់សត្វក្នុងព្រៃ ឬដើរដាក់អន្ទាក់សត្វទៀតទេ ។ លោកឆឹង សុវីរីយ៉ា បានបង្ហាញពីជ្រោះមួយនៅជើងភ្នំបូកគោ ស្រដៀងនឹងទឹកឈូជាកន្លែងរមណីយដ្ឋានថ្មី ហើយបច្ចុប្បន្នអ្នកទេសចរជាតិ និងអន្តរជាតិតែងតែទៅកំសាន្តមិនដែលដាច់ ។ ជួនពេលខ្លះប្រជាសហគមន៍បានជូនភ្ញៀវជិះទូកទៅមើលហ្វូងត្រីផ្សោតកំសាន្តផងដែរ ។
លោកសេ ដាង អភិបាលរងស្រុកទឹកឈូ មានប្រសាសន៍ថា លោកគាំទ្ររាល់សកម្មភាពអង្គការសង្គ្រោះសត្វព្រៃដែលបានបង្កើតជាសហគមន៍របស់ខ្លួននៅឃុំព្រែកត្នោត ក្នុងទិសដៅការពារតំបន់ធម្មជាតិ ពិសេសបានរកឃើញរមណីយដ្ឋានថ្មីស្រដៀងនឹងទឹកឈូ ។ លោកជួង ស៊ីវវុទ្ធ អភិបាលរងខេត្តមានប្រសាសន៍ថា ផ្អែកលើរបាយការណ៍របស់ប្រធានអង្គការសង្គ្រោះសត្វព្រៃពិតជាគួរឱ្យរីករាយ ព្រោះនៅក្នុងសហគមន៍មានជំនឿដោយសារតែនៅក្នុងសហគមន៍អាចរកចំណូលបានក្នុងការនាំភ្ញៀវទៅកំសាន្តតាមជ្រោះផ្សេងៗ ឬក៏ទៅមើលហ្វូងត្រីផ្សោតសមុទ្រ ដែលនេះជាការផ្តល់តំលៃមិនអាចគណនាបានមួយផ្នែកនៃការអភិវឌ្ឍតំបន់ទេសចរណ៍ ក៏ដូចជារួមចំណែកកាត់បន្ថយភាពក្រីក្ររបស់ប្រជាពលរដ្ឋផងដែរ ៕
ចែករំលែកព័តមាននេះ