ខេត្តកំពង់ឆ្នាំង ៖ លោកស៊ុន សុវណ្ណារិទ្ធ អភិបាលរងខេត្តកំពង់ឆ្នាំង និងជាប្រធានលេខាធិការដ្ឋានបុណ្យនៃគណៈកម្មាធិការបុណ្យទន្លេខេត្តកំពង់ឆ្នាំង កាលពីរសៀលថ្ងៃទី០៦ ខែមីនា ឆ្នាំ ២០១៩ បានចុះដឹកនាំមន្ត្រីនគរបាលខេត្តកំពង់ឆ្នាំងធ្វើការបាញ់ទឹកលាងសំអាតសួនច្បារមាត់ទន្លេផ្សារក្រោម ដើម្បីត្រៀមបារព្ធពិធីបុណ្យទន្លេលើកទី៥ នៅក្នុងក្រុងកំពង់ឆ្នាំងអោយបានជោគជ័យ ។
លោកអភិបាលរងខេត្តបានមានប្រសាសន៍ឲ្យដឹងថា ក្នុងការអនុវត្តន៍តាមផែនការរបស់គណៈកម្មាធិការបុណ្យជាតិបុណ្យទន្លេខេត្តក៏ដូចជា ថ្នាក់ជាតិ អាជ្ញាធរខេត្តកំពង់ឆ្នាំងកំពុងរៀបចំរចនាសម្ព័ន្ធនានាជាច្រើនមានការធ្វើក្លោងទ្វារជាង៧០កន្លែង កាត់តាមទទឹងផ្លូវថ្នល់ តាំងលំអរភ្លើងពណ៌តាមផ្លូវថ្នល់ និងជួសជុលផ្លូវនានាមួយចំនួនផងដែរ ដើម្បីរៀបចំសោភ័ណភាពនៅក្នុងទីក្រុងកំពង់ឆ្នាំងឱ្យបានល្អប្រសើរ ។
ដោយឡែកថ្ងៃនេះលោកក៏បានចុះដឹកនាំកងកម្លាំងនគរបាលចំនួន២ក្រុម ប្រើប្រាស់រថយន្តបាញ់ទឹក២គ្រឿងរបស់ស្នងការដ្ឋាននគរបាលខេត្តកំពង់ឆ្នាំងចុះបាញ់ទឹកលាងសំអាតនៅសួនច្បារមាត់ទន្លេផ្សារក្រោម អោយបានស្អាត ។ ទន្ទឹមគ្នានេះដែរលោកក៏បានចុះទៅពិនិត្យមើលសួនច្បារផ្កាឈូករ័ត្ន នៅតាមច្រាំងទន្លេផ្សារក្រោមផងដែរ ដោយលោកបញ្ជាក់ថា ផ្កាឈូករ័ត្ននេះក្រុមការងារលោកស៊ុំ សុជាតិ ស្នងការរងនគរបាលខេត្តកំពង់ឆ្នាំងបានជួយដាំជាង១ម៉ឺនដើម នៅតាមច្រាំងទន្លេផ្នែកខាងលិច និងផ្នែកខាងកើតនៃមាត់ច្រាំងទន្លេផ្សារក្រោម ដើម្បីធ្វើអោយសោភ័ណភាពមាត់ទន្លេមានផ្កាស្រស់បំព្រងសម្រាប់ស្វាគមន៍ការធ្វើបុណ្យទន្លេរបស់ខេត្ត ។
ផ្កាឈូករ័ត្ន និងចេញផ្កាស្របគ្នាតែម្ដងមុនថ្ងៃធ្វើបុណ្យទន្លេ២ទៅ៣ថ្ងៃ ហើយផ្កានេះនឹងរីករយៈពេល២ខែ គឺរហូតដល់បុណ្យចូលឆ្នាំខ្មែរទើបវារុះរោយ ។ ជាមួយគ្នានេះលោកសូមអំពាវនាវ ដល់មន្ត្រីរាជការគ្រប់អង្គភាពប្រជាពលរដ្ឋនៅគ្រប់មូលដ្ឋាននៅក្នុងក្រុងកំពង់ឆ្នាំងមេត្តាចូលរួមទាំងអស់គ្នា ដោយដាក់តាំងភ្លើងពណ៌លំអរតាមគេហដ្ឋានលំអរតាមកន្លែងធ្វើការ និងកន្លែងធ្វើរអាជីវកម្មនានា ដើម្បីកែលំអរសោភ័ណភាពទីក្រុងកំពង់ឆ្នាំងឲ្យល្អឆើតឆាយស្វាគមន៍ពិធីបុណ្យទន្លេលើកទី៥ឲ្យបានជោគជ័យ ។
ព្រោះថានៅក្នុងពិធីនេះក៏មានការចូលរួមដ៏ខ្ពង់ខ្ពស់ពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែនផងដែរ ។
ប្រជាពលរដ្ឋខេត្តកំពង់ឆ្នាំងសង្ឃឹមថា ក្នុងពេលពិធីបុណ្យទន្លេនេះសម្តេចតេជោពិតជានឹងមានចំណងដៃអ្វីមួយចងដៃប្រជាពលរដ្ឋខេត្តកំពង់ឆ្នាំងជាមិនខានឡើយ ។ ហើយអ្វីដែលប្រជាពលរដ្ឋចង់បាននោះ គឺផ្លូវស្ពានទៅស្រុកកំពង់លែង មានប្រវែងជាង៤គីឡូម៉ែត្រ និងផ្លូវពីស្រុកកំពង់លែងទៅក្រុងស្ទឹងសែនខេត្តកំពង់ធំមានប្រវែងជាង៥៧គីឡូម៉ែត្រដែលស្ពាននឹងផ្លូវមួយខ្សែនេះជាសសរសៃឈាមគមនាគមន៍យ៉ាងសំខាន់សម្រាប់ការរីកចម្រើនសេដ្ឋកិច្ចជាតិ និងប្រជាពលរដ្ឋ ៕
ចែករំលែកព័តមាននេះ