រាជធានីភ្នំពេញ ៖ បណ្តាប្រទេសជាច្រើន ដូចជា ជប៉ុន អូស្ត្រាលី និងតៃវ៉ាន់ជាដើម ថ្មីៗនេះបានហ៊ាមមិនឲ្យមានការនាំចូលសាច់ជ្រូកវៀតណាម ក្រោយពីជំងឺប៉េស្តជ្រូកអាហ្វ្រិក កំពុងកើតមានឡើងនៅប្រទេសវៀតណាម…
រាជធានីភ្នំពេញ ៖ បណ្តាប្រទេសជាច្រើន ដូចជា ជប៉ុន អូស្ត្រាលី និងតៃវ៉ាន់ជាដើម ថ្មីៗនេះបានហ៊ាមមិនឲ្យមានការនាំចូលសាច់ជ្រូកវៀតណាម ក្រោយពីជំងឺប៉េស្តជ្រូកអាហ្វ្រិក កំពុងកើតមានឡើងនៅប្រទេសវៀតណាម រហូតមានការពិន័យជាប្រាក់យ៉ាងច្រើនសន្ធឹកសន្ធាប់និងមានប្រទេសខ្លះឈានដល់ទោសជាប់ពន្ធនគារចំពោះបំពាននូវបម្រាមនោះ ។
ចំណែកនៅទីផ្សារកម្ពុជាវិញ អាជីវករលក់សាច់ជ្រូកនៅទីផ្សារមួយចំនួននៅក្រុងភ្នំពេញបានត្អូញត្អែរថា ដោយសារតែជំងឺប៉េស្តជ្រូកអាហ្វ្រិកបានធ្វើឲ្យប៉ះពាល់ធ្ងន់ធ្ងរដល់ពួកគាត់ ដោយសារតែអតិថិជនបង្វែរពីការជាវសាច់ជ្រូក ទៅជាវត្រី និងសាច់គោជំនួសវិញ ព្រោះតែពួកគាត់ភ័យខ្លាចជំងឺប៉េស្តជ្រូកអាហ្វ្រិក ។
អាជីវករលក់សាច់ជ្រូកនៅផ្សារកាប់គោបានពោលថា «ពីមុនគឺខ្ញុំអាចលក់បាន ២០០ គីឡូក្រាមក្នុងមួយថ្ងៃ តែក្រោយពីការរកឃើញថាជ្រូកវៀតណាមកើតមានជំងឺសជ្រូកអាហ្វ្រិក មក មិនថាសាច់ជ្រូកយើងជាសាច់ជ្រូកចិញ្ចឹមក្នុងស្រុកទេ គឺអតិថិជនលែងទិញតែម្តង ។ អញ្ចឹងប្រមាណពីរសប្តាហ៍នេះ គឺការលក់ធ្លាក់ចុះខ្លាំងមកត្រឹមតែ ៤០ ទៅ ៥០ គីឡូក្រាមក្នុងមួយថ្ងៃ» ។
អាជីវករខាងលើបានបន្តទៀតថា អ្នកស្រីទទួលស្គាល់ថាសាច់ជ្រូកលក់នៅទីផ្សារនានាក្នុងក្រុងភ្នំពេញជាជ្រូកនាំចូលពីវៀតណាមផង និងសាច់ជ្រូកចិញ្ចឹមក្នុងស្រុកផង តែអ្នកដើរផ្សារ មិនបានបែងចែកដូច្នេះទេ គឺគេបង្វែរពីការទិញសាច់ជ្រូកយកទៅបរិភោគ ទៅទិញត្រីនិងសាច់គោ ជំនួសវិញ ។ ចំណែកម្ចាស់ទីសត្តឃាត នៅក្រុងភ្នំពេញក៏បញ្ជាក់ថាពួកគាត់ត្រូវកាត់បន្ថយការកាប់ជ្រូកសម្រាប់លក់នៅស្រុកខ្មែរប្រមាណជាង ៥០% ឯណោះ ។ យ៉ាងណាមិញ ក្នុងពេលជំងឺប៉េស្តអាហ្វ្រិកឬជំងឺផ្ដាសាយជ្រូកបាននិងកំពុងរាលដាលនៅភាគខាងជើងប្រទេសវៀតណាម បណ្ដាប្រទេសមួយចំនួនបានបិទមិនអោយឈ្មួញនាំចូលសាច់ជ្រូកពីប្រទេសវៀតណាមជាដាច់ខាត ហើយកម្ពុជាដែលមានព្រំប្រទល់នឹងប្រទេសវៀតណាម បានបង្វែអោយឈ្មួញនាំចូលពីប្រទេសថៃ មកបំពេញតម្រូវការទីផ្សារវិញ ហើយក្រសួងក៏បានពង្រាយកម្លាំងបន្ថែមនៅតាមព្រំដែនវៀតណាម ដើម្បីទប់ស្កាត់ការនាំចូល ។
បើតាមលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វនៃក្រសួងកសិកម្មរុក្ខាប្រមាញ់និងនេសាទ បានមានប្រសាសន៍តាមទូរសព្ទអោយដឹងថា ចាប់តាំងពីប្រទេសវៀតណាម ផ្ទុះជំងឺប៉េស្តអាហ្វ្រិកលើសត្វជ្រូក ពីប៉ុន្មានខែមុន ក្រសួងពាក់ព័ន្ធនានា បានចេញសេចក្តីប្រកាសអោយទប់ស្កាត់ពីការនាំចូលជ្រូកពីប្រទេសវៀតណាម មកផ្គត់ផ្គង់លើទីផ្សារក្នុងប្រទេសកម្ពុជា ហើយអោយឈ្មួញបង្វែការនាំចូលពីប្រទេសថៃមកផ្គត់ផ្គង់វិញ ។ លោកបន្តថា ពេលនេះលោកបានបញ្ជូនមន្ត្រី នៅនាយកដ្ឋានទាំងពីរ គឺនាយកដ្ឋាន សុខភាពសត្វ និង ផលិតកម្មសត្វ ទៅកាន់ព្រំដែន ដើម្បីត្រួតពិនិត្យមើលពីការនាំចូលពីប្រទេសវៀតណាម និងត្រូវធានាថា ជ្រូកដែលនាំចូលពីវៀតណាមជាជ្រូកដែលល្អ មិនមានផ្ទុកជំងឺ តែយ៉ាងណានាយកដ្ឋាននឹងជំរុញអោយឈ្មួញ ងាកទៅនាំចូលពីប្រទេសថៃវិញ ដើម្បីធានាបានថាជ្រូកខ្មែរ នឹងមិនឆ្លងជំងឺនេះ។
លោក តាន់ ផាន់ណារ៉ា មានប្រសាសន៍បន្ថែមទៀតថា៖« យើងបានអោយឈ្មួញនាំពីថៃយូរមកហើយ ព្រោះនៅប្រទេសថៃមិនទាន់មានជំងឺប៉េស្តអាហ្វ្រិក រឺផ្ដាសាយជ្រូកនោះទេ ដោយព្យាយាមទប់ស្កាត់ទាំងស្រុងពីប្រទេសវៀតណាម ក្នុងពេលប្រទេសនេះ កំពុងជួបបញ្ហាជំងឺសាហាវមួយនេះ » ។ លោកបន្តថា លោកលើកទឹកចិត្តអោយពលរដ្ឋរាយការណ៍មកកាន់នាយកដ្ឋានតាមរយៈបណ្ដាញសង្គម ឬវិធីណាដែលងាយស្រួល បើសិនជាមានករណី លួចនាំចូលជ្រូកពីវៀតណាមតាមច្រកណាមួយមកកាន់ទឹកដីកម្ពុជា ហើយបើសិនជាមន្ត្រីជំនាញរកឃើញថាជ្រូកនោះ មានផ្ទុកជំងឺនឹងត្រូវដុតបំផ្លាញចោល ។ ចំពោះឈ្មួញនាំចូលវិញ អាចនឹងទោសទៅច្បាប់ ក្នុងនោះនឹងរងពិន័យជាទឹកប្រាក់ពី ១០លានទៅ១៥លានរៀលព្រមទាំងជាប់ក្នុងបទល្មើសផងដែរ ។
លោកបន្ថែមថា ទាំងនេះ គឺជាការយកចិត្តទុកចិត្តចំពោះសុខភាពរបស់ប្រជាពលរដ្ឋកម្ពុជា ដោយធានាថា ប្រជាពលរដ្ឋនឹងទទួលបានចំណីអាហារដែលមិនផ្ទុកជំងឺ កំពុងរាលដាលនៅក្រៅប្រទេស ព្រមទាំងការពារដល់ជ្រូកក្នុងស្រុកមិនអោយកើតជំងឺនេះផងដែរ ។ លោកស្រ៊ុន ពៅប្រធានសមាគមអ្នកចិញ្ចឹមសត្វកម្ពុជា បានមានប្រសាសន៍ផងដែរថា បើដូចអ្វីដែលក្រសួងបានមាននិយាយនោះ ក្នុងនាមជាអ្នកចិញ្ចឹមសត្វ ជាពិសេសសត្វជ្រូក ពិតជាត្រេកអរ ហើយនឹងចូលរួមជាមួយអាជ្ញាក្នុងការទប់ស្កាត់ ការនាំចូលជ្រូកពីប្រទេសវៀតណាម ។ លោកថា៖« យើងនឹងប្រាប់អោយពលរដ្ឋដែលជាសមាជិករបស់សមាគមអ្នកចិញ្ចឹមជ្រូកយើង អោយថតនូវសកម្មភាពខុសច្បាប់របស់ឈ្មួញ ដឹកជ្រូកពីវៀតណាមចូលទឹកដីកម្ពុជា ហើយរាយការណ៍ទៅកាន់នាយកដ្ឋាន ដើម្បីអោយនាយកដ្ឋានចាត់ការចំពោះឈ្មួញ ដែលនាំចូលជ្រូកមិនបានពិនិត្យត្រឹមត្រូវ » ។
លោកបន្តថា លោកមិនសង្ឃឹមថាទប់ស្កាត់ពីវៀតណាមបាន១០០ភាគរយនោះទេ តែយ៉ាងហោចណាស់ ក៏សង្ឃឹមថាអាចទប់ស្កាត់បានមួយចំណែក និងមិនអោយមានភាពអាណាធិបតេយ្យដូចមុនទៀត ។ យ៉ាងណាក៏ដោយជំងឺនេះ វាសាហាវណាស់ ទោះបីជាវាក្លាយជាសាច់ក្រកហើយក៏ដោយ ក៏វានៅតែអាចចម្លងទៅកាន់ជ្រូកដទៃទៀតបានផងដែរ ។ បញ្ហាជំងឺប៉េស្តជ្រូកអាហ្វ្រិកកើតនៅវៀត មិនត្រឹមបង្កការភ័យខ្លាចក្នុងចំណោមប្រជាជនកម្ពុជានោះទេ សូម្បីប្រទេសជាច្រើនក៏ហាមការនាំចូលសាច់ជ្រូកទៅកាន់ប្រទេសគេផងដែរ ។
ជាក់ស្តែងប្រទេសតៃវ៉ាន់ បានប្រកាសជាសាធារណៈថាប្រជាពលរដ្ឋវៀតណាមដែលធ្វើដំណើរទៅកាន់ប្រទេសតៃវ៉ាន់ ដោយនាំមកជាមួយនូវសាច់ជ្រូកពីប្រទេសវៀតណាមនឹងត្រូវពិន័យជាប្រាក់ប្រហែល ៦,៥០០ ដុល្លារអាមេរិក ។ នេះបើយោងតាមការផ្សាយរបស់ក្រសួងការបរទេសវៀតណាម ។ ធ្ងន់ជាងនេះទៅទៀត គឺការពិន័យនឹងឡើងដល់កម្រិត ៣៣,០០០ ដុល្លារអាមេរិក ប្រសិនបើអ្នកបំពានត្រូវបានរកឃើញកំហុសជាលើកទី ២ ហើយអ្នកបំពាននឹងបម្រាមនាំសាច់ជ្រូកពីវៀតណាមចូលប្រទេសតៃវ៉ាន់ នឹងត្រូវបដិសេធមិនឲ្យចូលប្រទេសនេះបើមិនព្រមបង់ប្រាក់ពិន័យ ។ កាលពីថ្ងៃទី ២៧ ខែកុម្ភះ គឺមានករណីស្ត្រីជនជាតិវៀតណាមមួយរូបត្រូវបានពិន័យឲ្យបង់ជាប្រាក់ចំនួន ៦,៥០០ ដុល្លារអាមេរិក ពេលនាងនាំយកសាច់ជ្រូកចូលកាន់ព្រលានយន្តហោះ Taichung នៅកណ្តាលទីក្រុងតៃវ៉ាន់ ។
ជាមួយគ្នានោះផងដែរ ក្រុមហ៊ុនអាកាស ចរណ៍វៀតណាមបានព្រមានអ្នកដំណើរពីការដឹកជញ្ជូនសាច់ជ្រូកទៅកាន់ប្រទេសជប៉ុននិងអូស្ត្រាលី។ អ្នកដំណើរដែលដឹកម្ហូបអាហារឆៅឬសាច់កែច្នៃ ពីប្រទេសវៀតណាម ទៅប្រទេសជប៉ុន ត្រូវតែមានវិញ្ញាបណ្ណប័ត្របញ្ជាក់ពីសុវត្ថិភាព បើមិនដូច្នេះទេពួកគេត្រូវប្រឈមនឹងការជាប់ពន្ធនាគារចំនួន ៣ ឆ្នាំ ឬពិន័យជាប្រាក់ ១ លានយ៉េន ឬប្រមាណជាង ៨,៩០០ ដុល្លារអាមេរិក ។
នៅប្រទេសអូស្ត្រាលីវិញ អ្នកដំណើរត្រូវតែប្រកាសពីចំណីអាហារទាំងអស់ដែលផលិតពីគ្រឿងផ្សំរុក្ខជាតិ ឬគ្រឿងផ្សំពីសាច់សត្វ បើមិនដូច្នេះទេពួកគេប្រឈមនឹងការផាកពិន័យចំនួន ៤២០ ០០០ ដុល្លារអូស្ដ្រាលី (២៩៨ ០៣២ ដុល្លារអាមេរិក) ។ ចំណែក ឌូបៃអារ៉ាប់រួម និងសហរដ្ឋអាមេរិកក៏ហាមឃាត់ផលិតផលពីសាច់ជ្រូកពីវៀតណាមផងដែរ។ បន្ទាប់ពីប្រទេសចិននិងម៉ុងហ្គោលី វៀតណាមបានក្លាយទៅជាប្រទេសអាស៊ីទីបី ដែលទទួលរងនូវជំងឺគ្រុនជ្រូកអាហ្វ្រិកដែលមិនអាចព្យាបាលបានដែលត្រូវបានគេរកឃើញនៅក្នុងទីក្រុងហាណូយនិងហៃភុងនិងខេត្តចំនួន 4 គឺខេត្ត Thai Binh, Hung Yen, Ha Nam, Thanh Hoa និង Hai ដួង។ ជំងឺគ្រុនផ្តាសាយជាជំងឺរលាកដែលចម្លងដល់សត្វជ្រូកទាំងអស់តាមរយៈសារធាតុចិញ្ចឹមរាងកាយដូចជាឈាមនិងស្លស។ វាបណ្តាលឱ្យគ្រុនក្តៅដែលមានអត្រាស្លាប់ 100% ។ មនុស្សមិនត្រូវបានរងផលប៉ះពាល់ដោយជំងឺនេះទេ ៕
ចែករំលែកព័តមាននេះ