ខេត្តព្រៃវែង ៖ ស្របពេលដែលប្រជាកសិករប្រកបមុខរបរចិញ្ចឹមមាន់យកពងនៅស្រុកពារាំង ត្អូញត្អែររឿងតម្លៃពងមាន់ក្នុងស្រុកចុះថោកខ្លាំងដោយសារតែមានការនាំចូលពីប្រទេសជិតខាងនោះលោកអ៊ុក សំណាង ប្រធានមន្ទីរកសិកម្មខេត្តព្រៃវែងបានលើកឡើងថា នេះការជាបំភ្លើសព័ត៌មាន និងគ្មានការពិតនោះទេ ។ ជួបជាមួយក្រុមអ្នកសារព័ត៌មានលោកស្រីឡាំង…
ខេត្តព្រៃវែង ៖ ស្របពេលដែលប្រជាកសិករប្រកបមុខរបរចិញ្ចឹមមាន់យកពងនៅស្រុកពារាំង ត្អូញត្អែររឿងតម្លៃពងមាន់ក្នុងស្រុកចុះថោកខ្លាំងដោយសារតែមានការនាំចូលពីប្រទេសជិតខាងនោះលោកអ៊ុក សំណាង ប្រធានមន្ទីរកសិកម្មខេត្តព្រៃវែងបានលើកឡើងថា នេះការជាបំភ្លើសព័ត៌មាន និងគ្មានការពិតនោះទេ ។
ជួបជាមួយក្រុមអ្នកសារព័ត៌មានលោកស្រីឡាំង ស្រីម៉ុម ម្ចាស់កសិដ្ឋានចិញ្ចឹមមាន់យកពង នៅភូមិព្រៃស្នៀត ឃុំព្រៃស្នៀត ស្រុកពារាំង ខេត្តព្រៃវែងបានរៀបរាប់ទាំងទឹកមុខក្រៀមក្រំថា ប៉ុន្មានខែចុងក្រោយនេះអ្នកស្រីខាតបង់ច្រើនណាស់ដោយសារតែពងមាន់លក់បានថោក ហើយស្ទើតែគ្មានទីផ្សារ ។
ពីមុនពងមាន់១គ្រាប់គាត់លក់បានតម្លៃពី៣៤០រៀល ទៅ៤០០រៀល អ្នកទិញគេមកទិញដល់កន្លែង តែឥឡូវអត់ទេ១គ្រាប់លក់បានតែជាង២០០ទៅ៣០០រៀលប៉ុណ្ណោះ ហើយត្រូវដឹកយកទៅអោយអ្នកទិញដល់កន្លែង ហើយពេលខ្លះប៉ះម៉ូយសាញច្រើនលក់មិនអស់សល់ដឹកមកផ្ទះវិញក៏មានពិបាកណាស់ ។
លោកស្រី ឡាំង ស្រីម៉ុម បានបន្តថា ការបើកកសិដ្ឋានចិញ្ចឹមមាន់យកពងបែបនេះវាមិនងាយស្រួលទេត្រូវចំណាយដើមទុនច្រើនណាស់ទាំងលើថ្លៃចំណីមាន់ថ្នាំបាញ់សម្លាប់មេរោគបំបាត់ក្លិនស្អុយ និងថ្លៃចំណាយលើកម្មករ ហើយបើតម្លៃពងមាន់ចុះថោកខ្លាំងលក់មិនបានរួចថ្លៃចំណាយបែបនេះមិនយូរទេ ច្បាស់ជាត្រូវបិទកសិដ្ឋាន ហើយខណៈពេលនេះគាត់បានកាត់បន្ថយចំនួនមាន់ចិញ្ចឹមនៅត្រឹមតែ៥០០០ក្បាលប៉ុណ្ណោះ គឺបានលក់មេមាន់ចោលអស់៥០០០ក្បាលហើយយកលុយសងធានាគារ ។
ចំពោះមូលហេតុដែលធ្វើអោយតម្លៃពងមាន់ចុះថោកខ្លាំងនោះត្រូវបានលោកស្រីឡាំង ស្រីម៉ុម ក៏ដូចជា កសិករចិញ្ចឹមមាន់ផ្សេងៗទៀតនៅស្រុកពារាំងបានអះអាងដូចៗគ្នាថា គឺដោយសារតែមានការនាំចូលពង់មានពីប្រទេសជិតខាងច្រើន គឺមកពីវៀតណាមផង និងថៃផង ហើយពងដែលនាំចូលមកនោះគេលក់តម្លៃថោកទើបធ្វើអោយតម្លៃពងមាន់ក្នុងស្រុកត្រូវចុះថោកដែរ បើលក់ថ្លៃជាងគេ គឺលក់មិនដាច់គ្មានអ្នកទិញឡើយ ។
ទោះជាកសិករទាំងនេះអះអាងបែបនេះក្តី ប៉ុន្តែលោកអ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែងបានបដិសេធថា មិនមានការនាំចូលពងមាន់ពីប្រទេសជិតខាងនោះទេ ដោយលោកបានបញ្ជាក់យ៉ាងខ្លីប្រាប់ក្រុមអ្នកសារព័ត៌មានថា បើមានការនាំពងមាន់ចូលមែននោះលោកនឹងចាប់ស្ងោរស៊ីអោយអស់ ៕
ចែករំលែកព័តមាននេះ