ខេត្តបាត់ដំបង ៖ សេចក្តីរាយការណ៍ឱ្យដឹងថា ស្ត្រីម្នាក់ដែលប្រកាច់បែកពពុះមាត់ បង្កភ្ញាក់ផ្អើលពេញភូមិដោយសង្ស័យថា បណ្ដាលមកពីឆ្កែឆ្គួតខាំនោះ ពេលនេះជំងឺរបស់គាត់បានធូរស្រាលហើយ ហើយពេលនេះបាននិងកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តនៅឡើយ ។ នេះបើតាមការផ្ដល់ព័ត៌មានពីខាស្វាមីរបស់ស្ត្រីរងគ្រោះ នៅវេលាម៉ោង១២ថ្ងៃត្រង់ថ្ងៃទី០៦ មីនា នេះ ក៏ប៉ុន្តែប្រធានមន្ទីរសុខាភិបាល និងបុគ្គលិកពេទ្យជំនាញមួយចំនួនបានព្យាយាមបដិសេធ និងបិទបាំងទៅវិញ ។
បុរសម្នាក់បាននិយាយនៅក្នុងមន្ទីរពេទ្យបង្អែកខេត្ត «គាត់ជាស្វាមីស្ត្រីរងគ្រោះ ដោយសារឆ្កែខាំនោះ ។ ប្រពន្ធគាត់បានធូរស្រាលគ្រាន់បើហើយ រហូតមកទល់ពេលនេះ» ។ គាត់និយាយថា «អ្នកភូមិគ្រប់ៗគ្នា រួមទាំងសមតត្ថកិច្ចនិងអាជ្ញាធរមូលដ្ឋានផង ដែលបានឃើញអាការៈភរិយាគាត់ពីដំបូង នរណាក៏និយាយថា ប្រពន្ធខ្ញុំបានឆ្កួតដោយសារកូនឆ្កែខាំដែរ ។ ប្រពន្ធខ្ញុំបានប្រកាច់បែកពពុះមាត់ និងពេលខ្លះ មានអាការៈដ៏កាចសាហាវបំផុត រកខាំដៃខ្លួនឯង សូម្បីអ្នកជួយចាប់ក៏រកខាំគេដែរ មើលទៅសកម្មភាព ដូចឆ្កែឆ្គួតអញ្ចឹងដែរ»។
បុរសនេះបានបញ្ជាក់ថា «ប្រពន្ធគាត់ត្រូវកូនឆ្កែមួយខាំចុងម្រាមដៃមុតត្រង់ក្រចក កាលពីថ្ងៃទី១៩ កុម្ភៈកន្លងទៅ ហើយកូនឆ្កែមួយក្បាលនោះ គ្មានប្រវត្តិច្បាស់លាស់ទេ ។ វាបានដើរចូលមកផ្ទះគាត់ ហើយពេលនោះ ក៏មិនមែនខាំតែប្រពន្ធគាត់ដែរ គឺវាបានខាំមនុស្ស២នាក់ផ្សេងទៀត ដែលចាប់វាលេងនៅផ្ទះរបស់
គាត់។ គាត់បន្ថែមថា ក្រោយត្រូវកូនឆ្កែខាំ អ្នកភូមិ២នាក់នោះបានទៅឲ្យគ្រូពេទ្យចាក់វ៉ាក់សាំងការពារ លើកលេងតែប្រពន្ធទេ ដែលមិនបានចាក់ថ្នាំ ។
លុះនៅយប់ថ្ងៃទី០៤ មីនា ស្រាប់តែប្រពន្ធគាត់ប្រកាច់បែកពពុះមាត់ និងមានអាការៈកាចសាហាវខាំដៃខ្លួនឯង ។ ឃើញបែបនេះ គាត់ក៏រាយការណ៍ទៅអាជ្ញាធរឱ្យជួយអន្តរាគមន៍ រហូតនាំគ្នាចាប់ប្រពន្ធគាត់ចងដៃជាប់គ្រែ ដើម្បីកុំឲ្យខាំដៃ ហើយត្រូវអាជ្ញាធរឃុំជួយដឹកទៅកាន់មន្ទីរពេទ្យបង្អែកទាំងយប់តែម្ដង។
ប៉ុន្តែជុំវិញករណីស្ត្រីរងគ្រោះ ដែលមហាជនកំពុងភ្ញាក់ផ្អើលថា ត្រូវឆ្កែឆ្កួតខាំនេះ បែរជាគ្រូពេទ្យជំនាញមួយចំនួនបា នព្យាយាមលាក់បាំងទៅវិញ កាលពីថ្ងៃទី០៥ មីនា ខណៈអ្នកសារព័ត៌មានបានព្យាយាមសួរ
នាំគ្រូពេទ្យប្រចាំ «អគារមជ្ឍមណ្ឌលបង្ការជំងឺឆ្កែឆ្គួត និងអគារពិគ្រោះពិនិត្យជំងឺ»នៃមន្ទីរពេទ្យខេត្តនេះ តែក្រុមគ្រូពេទ្យទាំងនោះ សុទ្ធបានតែបដិសេធដូចៗគ្នាថា «គ្មានអ្នកជំងឺឆ្កែឆ្កួត ឬឆ្កែខាំ ត្រូវបានបញ្ជូនមកសង្គ្រោះនៅក្នុងមន្ទីរពេទ្យខេត្តនេះទេ» ។
ដោយឡែក លោកវឿង ប៊ុនរ៉េត ប្រធានមន្ទីរសុខាភិបាលខេត្ត ក៏បានបដិសេធដែរថា មិនបានដឹងរឿងនេះដែរ ដោយលោកបាននិយាយដូច្នេះថា «រឿងនេះ ខ្ញុំមិនបានដឹងទេ មកសួរខ្ញុំ ធ្វើម៉េចខ្ញុំដឹង ទាល់តែសួរខាងមន្ទីរពេទ្យ ទើបគេដឹង» ។
បើទោះជាមានការបដិសេធពីគ្រូពេទ្យបែបនេះក្ដី បើតាមលោកកើត ចិន្តា មេឃុំបួរ ស្រុកភ្នំព្រឹក បានប្រាប់កោះសន្តិភាពតាមទូរស័ព្ទថា ស្ត្រីរងគ្រោះឈ្មោះពួន យឿម អាយុ៣៧ឆ្នាំ ដែលត្រូវឆ្កែខាំនោះ គឺបានសម្រាកព្យាបាលនៅមន្ទីរពេទ្យខេត្ត ព្រោះលោកជាអ្នកបញ្ជូនស្ត្រីរូបនេះ ទៅកាន់មន្ទីរពេទ្យនោះផ្ទាល់ ។ លោកមេឃុំបញ្ជាក់ទៀតថា ក្រោយលោកបានបញ្ជូនទៅពេទ្យមួយថ្ងៃ លោកក៏បានទៅសួរសុខទុក្ខអ្នកជំងឺនេះដែរ តែហាក់បានធូរស្រាលហើយ ។ តែគ្រូពេទ្យមិនបានបញ្ជាក់ថា ស្ត្រីរូបនេះ មានជំងឺអ្វីទេ ដោយគ្រាន់តែប្រាប់ថា «អ្នកជំងឺនេះ មិនមានជំងឺឆ្កែឆ្កួតខាំទេ» ។
ព័ត៌មានលម្អឹតនឹងមានផ្សាយជូនបន្ត ។
ចែករំលែកព័តមាននេះ