ខេត្តស្វាយរៀង ៖ កាលពីថ្ងៃ៥ ខែមីនា ឆ្នាំ២០១៩នេះ សម្ដេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដំណើរដោយលោកម៉ែន វិបុល អភិបាលខេត្តស្វាយរៀង បានអញ្ជើញចុះសាកសួរសុខទុក្ខនាយទាហាន នាយទាហានរង ពលទាហាន និងសមត្ថកិច្ចដែលកំពុងឈរជើងនៅតាមខ្សែបន្ទាត់ ព្រំដែននិងពិនិត្យបង្គោលព្រំដែនលេខ១៥៨ ច្រកទ្វារតំបន់ព្រំដែនព្រៃតាអី ស្រុកស្វាយទាប និងច្រកទ្វារតំបន់ព្រំដែនដូង ស្រុករមាសហែក ខេត្តស្វាយរៀង។
ក្នុងឱកាសនោះផងដែរនេះក៏មានលោករដ្ឋលេខាធិការ អនុរដ្ឋលេខាធិការ អគ្គនាយកមេបញ្ជាការកងរាជអាវុធហត្ថលើ ផ្ទៃប្រទេសនិងប្រតិភូក្រសួងកាពារជាតិលោកអភិបាលរងខេត្ត លោកមេបញ្ជាការតំបន់ប្រតិបត្តិការសឹករងស្វាយរៀង លោកមេបញ្ជាការកងរាជអាវុធហត្ថខេត្តលោកស្នងការរងនគរបាលខេត្តលោកអភិបាលស្រុកពាក់ព័ន្ធនិងមេបញ្ជាការវរសេនាតូចនគរបាលនិងយោធាការពារព្រំដែនព្រមទាំងកងកម្លាំងជាច្រើនទៀត។
សម្ដេចពិជ័យសេនា ទៀ បាញ់ បានមានប្រសាសន៍ពាំនាំនូវការផ្ដាំផ្ញើរសាកសួរសុខទុក្ខពីសំណាក់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត
ប៊ុន រ៉ានី ហ៊ុន សែន ដែលសម្តេចទាំងពីរបានយកចិត្តទុកដាក់ចំពោះសុខនិងទុក្ខរបស់កងកម្លាំងដែលឈរជើងនៅជួរមុខ។
ឆ្លៀតក្នុងឱកាសនោះដែរ សម្ដេចពិជ័យសេនាក៏បានថ្លែងនូវការកោតសរសើរចំពោះគំរូវីរភាពរបស់កង កម្លាំងទាំងអស់ ជាពិសេសអាជ្ញាធរភូមិ ឃុំ ស្រុក ខេត្តដែលបានខិតខំបំពេញកាតព្វកិច្ចបម្រើជាតិមាតុភូមិប្រកបដោយទំនួលខុសត្រូវខ្ពស់ ចំពោះការការពារបូរណភាពទឹកដីនៅតាមបន្ទាត់ព្រំដែនជាប់នឹងប្រទេសជិតខាង។
សម្ដេចពិជ័យសេនាក៏បានសំណូមពរដល់សមត្ថកិច្ចដែលកំពុងឈរជើងនៅតាមបន្ទាត់ព្រំដែនទាំងអស់ ត្រូវតែបន្តបង្កើនកិច្ចសហប្រតិបត្តិការល្អលើគ្រប់វិស័យនិងសាមគ្គីភាពល្អជាមួយបណ្ដាសមត្ថកិច្ចប្រទេសជិតខាងដើម្បីឲ្យព្រំដែនយើងទាំងអស់ក្លាយជាព្រំដែនសន្តិភាពក្រោមគោលនយោបាយឈ្នះ ឈ្នះ ក្រោមការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រីដែលបានដឹកនាំប្រទេសកម្ពុជាឲ្យមានការរីកចម្រើនលើគ្រប់វិស័យ។
ក្នុងនោះដែរសម្តេចពិជ័យសេនាទៀ បាញ់ ក៏បានផ្ដាំផ្ញើដល់កងកម្លាំងទាំងអស់ ត្រូវអនុវត្តឲ្យបានម៉ឺងម៉ាត់ និងមានប្រសិទ្ធភាពខ្ពស់បំផុតនូវអនុសាសន៍១០ចំណុចរបស់សម្តេចតេជោដែលបានថ្លែងក្នុងពិធីអបអរសាទរខួប២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៅថ្ងៃទី២៤ ខែមករា ឆ្នាំ២០១៩កន្លងមក។
សម្ដេចក៏បានក្រើនរំឭកដល់នាយនិងពលកងកម្លាំងទាំងអស់ថា បើទោះបីជាមានក្រុម ឬពួកណាកេណ្ឌ កងទ័ពប្រមូលផ្តុំឬក៏ចង់ធ្វើបដិវត្តន៍នោះ ក្នុងនាមយើងជាកងកម្លាំងក៏ត្រូវការពាររដ្ឋធម្មនុញ្ញស្របច្បាប់ ដោយមិនឲ្យក្រុមឬក៏ជនណាមកបំផ្លាញនូវសុខសន្តិភាពនោះបានឡើយ ព្រោះសុខសន្តិភាពដែលមានបានមកសព្វថ្ងៃនេះគឺមានតម្លៃមហាសាលធំធេងណាស់ដោយមិនអាចនឹងកាត់ថ្លៃបាននោះឡើយ។
ចុងបញ្ចប់នៃពិធីសំណេះសំណាលសម្តេចពិជ័យសេនាបានឧបត្ថម្ភដល់កងកម្លាំងទាំងបីក្នុងមួយអង្គភាព ទទួលបានថវិកាមួយលានរៀលព្រមទាំងបានផ្ដល់ជូនម៉ូតូហុងដាឌ្រីមសង់ចំនួន៦គ្រឿងដល់កម្លាំងយោធាសម្រាប់ប្រើប្រាស់ក្នុងកិច្ចការល្បាតការពារព្រំដែន ។ បន្ទាប់មកសម្តេចពិជ័យសេនាបានចុះពិនិត្យការឈុសឆាយដីសាងសង់ផ្លូវក្រវាត់ព្រំដែនបត់ត្រាស់ ឃុំដូង ស្រុករមាសហែកផងដែរ៕
ចែករំលែកព័តមាននេះ