រាជធានីភ្នំពេញ ៖ លោក មូន ជេអុីន ប្រធានាធិបតីនៃសាធារណរដ្ឋកូរ៉េ នឹងដឹកនាំគណៈប្រតិភូមកបំពេញទស្សនកិច្ច៣ថ្ងៃនៅព្រះរាជាណាចក្រកម្ពុជា គឺចាប់ពីថ្ងៃទី១៤ដល់ទី១៦ ខែមីនា ។ យោងតាមសេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិចេញផ្សាយកាលពីល្ងាចថ្ងៃទី៤ ខែមីនា ឆ្នាំ២០១៩ បញ្ជាក់ថា ក្នុងពេលបំពេញទស្សនកិច្ចនេះ ភាគីទាំង២ កម្ពុជា-កូរ៉េ នឹងចុះហត្ថលេខា
លើកិច្ចព្រមព្រៀងមួយចំនួនដូចជា ការពង្រឹងកិច្ចសហប្រតិបត្តិការលើវិស័យសេដ្ឋកិច្ច និងពាណិជ្ជកម្មជាដើម ។
តបតាមការអញ្ជើញរបស់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា លោក មូន ជេអុីន ប្រធានាធិបតីនៃសាធារណរដ្ឋកូរ៉េ នឹងអញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា ពីថ្ងៃទី១៤ដល់ថ្ងៃទី១៦ ខែមីនា ឆ្នាំ២០១៩ ។ ក្នុងអំឡុងពេលទស្សនកិច្ចនេះ លោក មូន ជេអុីន នឹងចូលគាល់ព្រះករុណាព្រះមហាក្សត្រនៅព្រះបរមរាជវាំង ហើយនឹងជួបជាមួយសម្តេចតេជោនាយករដ្ឋមន្ត្រី ហ៊ុន សែន ។ លោកប្រធានាធិបតី មូន ជេអុីន និង សម្តេច
តេជោនាយករដ្ឋមន្ត្រី ហ៊ុន សែន នឹងពិភាក្សាអំពីការជំរុញទំនាក់ទំនងទ្វេភាគី និងការពង្រីកកិច្ចសហប្រតិបត្តិការលើវិស័យនានាបន្ថែមទៀត។
ជាមួយនេះ ក៏ផ្លាស់ប្តូរយោបល់គ្នាផងដែរលើបញ្ហាតំបន់និងអន្តរជាតិ ដែលជាកង្វល់និងផលប្រយោជន៍រួម។បន្ទាប់ពីបញ្ចប់ជំនួប ថ្នាក់ដឹកនាំទាំងពីរនឹងអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងមួយចំនួន និងធ្វើសេចកី្តប្រកាសព័ត៌មានរួមគ្នា ។ លោកប្រធានាធិបតី មូន ជេអុីន និងសម្តេចតេជោនាយករដ្ឋមន្ត្រី ហ៊ុន សែន ក៏រំពឹងថានឹងអញ្ជើញថ្លែងសុន្ទរកថាក្នុងវេទិកាធុរកិច្ចកម្ពុជា-សាធារណរដ្ឋកូរ៉េ ដើម្បីលើកទឹកចិត្តឲ្យមានការវិនិយោគ ការផ្លាស់ប្តូរសេដ្ឋកិច្ច និងពាណិជ្ជកម្មកាន់តែច្រើនឡើងរវាងប្រទេសទាំងពីរ ។
ដំណើរទស្សនកិច្ចលើកដំបូងមកកាន់កម្ពុជារបស់លោកប្រធានាធិបតី មូន ជេអុីន គឺជាព្រឹតិ្តការណ៍ដ៏សំខាន់ក្នុងទំនាក់ទំនងកម្ពុជា-សាធា ណរដ្ឋកូរ៉េ ដែលនឹងពង្រឹងមិត្តភាព ហើយនឹងធ្វើឲ្យកិច្ចសហប្រតិបត្តិការរវាងប្រទេសទាំងពីរ កាន់តែមានវិសាលភាពទូលំទូលាយ និងស៊ីជម្រៅ ។ គួរបញ្ជាក់ថា កាលពីខែមករាកន្លងទៅ លោក សុខ ទូច ប្រធានរាជបណ្ឌិត្យសភាកម្ពុជា បានថ្លែងថា ប្រធានាធិបតីនៃប្រទេសកូរ៉េខាងត្បូងលោក មូន ជេអុីន(Moon Jae-in) នឹងដឹកនាំគណៈប្រតិភូមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ក្នុងខែមីនាខាងមុខ ។
ក្នុងដំណើរទស្សនកិច្ចនេះ នឹងមានការចុះហត្ថលេខរវាងថ្នាក់ដឹកនាំនៃប្រទេសទាំងពីរកម្ពុជា-កូរ៉េ ក្នុងការបើកកិច្ចសហប្រតិបត្តិការស្រាវជ្រាវផ្នែកវប្បធម៌រួមគ្នាជាមួយរាជបណ្ឌិត្យសភាកម្ពុជានិងក្រុមប្រឹក្សាស្រាវជ្រាវកូរ៉េ ដែលមានវិទ្យាស្ថាន២៦នៅកូរ៉េ ។ យោងតាមឯកសារបានឲ្យដឹងថា លោក មូនជេេអុីន កើតនៅថ្ងៃទី២៤ ខែមករា ឆ្នាំ១៩៥៣ ក្លាយជាសមាជិកសភាកូរ៉េខាងត្បូងអាណត្តិទី១៩ជាប្រធានាធិបតីនៃសាធារណរដ្ឋកូរ៉េ ចាប់តាំងពីឆ្នាំ២០១៧ ។ លោកត្រូវបានបោះឆ្នោតជ្រើស រើសជាប្រធានាធិបតី បន្ទាប់ពីលោកជំទាវប្រធានា ធិបតី ប៉ាក គុនហេ(Park Geun-hye) ត្រូវបានចោទប្រកាន់ពីបទក្បត់ជាតិ ។ លោកជាសមាជិកគណបក្សប្រជាធិបតេយ្យ (បន្ទាប់មកជាគណបក្សសម្ព័ន្ធប្រជាធិបតេយ្យថ្មី) ។
លោក មូន ជេអុីន ធ្លាប់ជាសេនាធិការរបស់លោកប្រធានាធិបតី រ៉ូមូ យុន (Ro Moo-Hyun) ។ លោកបានក្លាយទៅជាប្រធានគណបក្សប្រជាធិបតេយ្យពីឆ្នាំ២០១២ដល់ឆ្នាំ២០១៦និងជាសមាជិកសភាអាណត្តិទី១៩(២០១២-២០១៦) ។ លោកជាអតីតបេក្ខភាពប្រធានាធិបតីមកពីគណបក្សសម្ព័ន្ធប្រជាធិបតេយ្យ តែបានចាញ់សំឡេងឆ្នោតរបស់លោកជំទាវ ប៉ាក គុនហេ ក្នុងការបោះឆ្នោតប្រធានាធិបតីឆ្នាំ២០១២ ។ ក្នុងតួនាទីប្រធានាធិបតី លោក មូន ជេអុីន បានជួបជាមួយលោក គីម ជុងអ៊ុន ប្រធានាធិបតីកូរ៉េខាងជើង កាលពីខែមេសានិងខែឧសភា ឆ្នាំ២០១៨ ក្នុងជំនួបកំពូលកូរ៉េ ៕
ចែករំលែកព័តមាននេះ