ខេត្តព្រៃវែង ៖ ដើម្បីការពារសត្វរបស់បងប្អូនប្រជាពលរដ្ឋនៅខេត្តព្រៃវែងកុំអោយផ្ទុះកើតជម្ងឺនិងឆ្លងរាលដាលនៅព្រឹកថ្ងៃទី០៥ មីនាម្សិលមិញនេះមន្ត្រីបសុពេទ្យខេត្តដុងថាប់ប្រទេសវៀតណាមបាននាំយកវ៉ាក់សាំងប៉ិចកូសាយ ចំនួន៨៥៥ដុំស្មើ និង១៧១០លីត្រ ដែលជាថ្នាំបាញ់សម្លាប់មេរោគមកប្រគល់ជូនមន្ត្រីបសុពេទ្យខេត្តព្រៃវែងទុកសម្រាប់បាញ់ទៅលើទ្រុងសត្វ និងមធ្យោបាយដឹកជញ្ជូនសត្វដែលធ្វើចរាចរណ៍នៅតាមដងផ្លូវ ។
លោកចិន វិសាល ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តព្រៃវែងបានមានប្រសាសន៍ថា មន្ត្រីបសុពេទ្យខេត្តព្រៃវែង និងមន្ត្រីបសុពេទ្យខេត្តដុងថាប់តែងតែមានកិច្ចសហការគ្នាជាប់ជាប្រចាំ និងផ្លាស់ប្តូរព័ត៌មានគ្នាទៅវិញទៅមកជាប់ជានិច្ច បើសិនជាសត្វមាន់ទាគោក្របី ពិសេសជ្រូករបស់អ្នកស្រុកនៅក្នុងខេត្តព្រៃវែងផ្ទុះកើតជំងឺ យើងនិងផ្តល់ព័ត៌មាននេះទៅមន្ត្រីពេទ្យសត្វខេត្តដុងថាប់ភ្លាម ហើយបើផ្ទុះកើតនៅខេត្តដុងថាប់គេក៏ផ្តល់ព័ត៌មាននេះមកខាងព្រៃវែងយើងភ្លាមដែរ ។ ការធ្វើបែបនេះ គឺដើម្បីការពារសត្វកុំអោយឆ្លងរាលដាលជម្ងឺពីខ្មែរទៅវៀតណាម ឬពីវៀតណាមមកខ្មែរ ព្រោះជម្ងឺសត្វវាមិនស្គាល់ព្រំដែនប្រទេសនោះទេ ។
លោកចិន វិសាលបានបន្តទៀតថា តាមរយៈការសហការ និងផ្តល់ព័ត៌មានអោយគ្នាទៅវិញទៅមកបានទាន់ពេលវេលាធ្វើអោយខេត្តទាំង២ព្រៃវែង និងដុងថាប់ បានគេចផុតពីការផ្ទុះកើតជម្ងឺផ្សេងៗជាក់ស្តែងពីមុនប្រទេសវៀតណាមបានផ្ទុះកើតជម្ងឺជ្រូកត្រចៀកខៀវ នៅតាមបណ្តាខេត្តមួយចំនួន ប៉ុន្តែខេត្តដុងថាប់មិនមានកើតទេ ហើយខេត្តព្រៃវែងក៏គេចផុតពីជម្ងឺនេះដែរ ។ សព្វថ្ងៃនេះខេត្តបីរបស់វៀតណាមកំពុងផ្ទុះកើតជម្ងឺប៉េស្តិ៍ជ្រូកអាហ្វ្រិច ក៏ប៉ុន្តែខេត្តដុងថាប់ មិនមានកើតជម្ងឺនេះទេ ដូច្នេះហើយទើបជម្ងឺនេះមិនអាចឆ្លងរាលដាលមកដល់ខេត្តព្រៃវែងបាន៕
ចែករំលែកព័តមាននេះ