រាជធានីភ្នំពេញ ៖ បុរសជាជនជាតិបរទេសម្នាក់កំពុងតែដេកលក់ក្នុងរថយន្ត ស្រាប់តែលេចមុខជនសង្ស័យម្នាក់ប៉ុនប៉ងធ្វើសកម្មភាពបើកទ្វារថយន្តលួចយកទ្រព្យសម្បត្តិ តែត្រូវម្ចាស់ភ្ញាក់ដឹងខ្លួនទាន់ចាប់បានប្រគល់ឱ្យសមត្ថកិច្ច ។
ហេតុការណ៍ខាងលើនេះ បានកើតឡើងកាលពីវេលាម៉ោង៥ទៀបភ្លឺថ្ងៃទី៦ ខែមីនា ឆ្នាំ២០១៩ តាមបណ្តោយផ្លូវ១៣ នៅចំណុចក្រោយវត្តឧណ្ណាលោម ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
ជនរងគ្រោះជាជនជាតិបរទេសម្នាក់ខាងលើមិនស្គាល់អត្តសញ្ញាណ មានវ័យជិត៥០ឆ្នាំ ចំណែកជនសង្ស័យឈ្មោះចាន់ រស្មី ភេទប្រុស អាយុ២២ឆ្នាំ មុខរបរនឹងស្នាក់នៅមិនពិតប្រាកដ ត្រូវសមត្ថកិច្ចចាប់ឃាត់ខ្លួន ។
តាមប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុ បុរសជាជនជាតិបរទេសខាងលើមិនដឹងថាគាត់មកពីណានោះទេបានជាបើករថយន្តម៉ាកហ្ស៊ីប ស៊េរីចាស់មួយគ្រឿងទៅឈប់ដេកនៅចិញ្ចើមផ្លូវ១៧៨ រហូតដល់វេលាកើតហេតុខាងលើនេះក៏ស្រាប់តែលេចមុខជនសង្ស័យម្នាក់បានដើរជុំវិញរថយន្តរបស់បុរសជាជនជាតិបរទេសនោះ២ទៅ៣ជុំ រួចបំរុងនឹងបើកទ្វាររថយន្តប៉ុនប៉ងលួចទ្រព្យសម្បត្តិរបស់ជនជាតិបរទេសនោះ តែត្រូវបុរសជាជនបរទេសនោះដឹងខ្លួនទាន់ក៏ស្ទុះទៅចាប់បាននៅចំណុចកើតហេតុខាងលើនេះរួចប្រគល់ទៅអោយសមត្ថកិច្ចចាត់ការតាមផ្លូវច្បាប់ ។
ក្រោយពេលឃាត់ខ្លួន ជនសង្ស័យម្នាក់ខាងលើនេះបានសារភាពប្រាប់សមត្ថកិច្ចថា កន្លងមកខ្លួនធ្លាប់លួចគេចំនួន៣ដងមកហើយ និងធ្លាប់ជាប់ក្នុងមណ្ឌលកែប្រែចំនួន២ទៅ៣ដងផងដែរ ។
ក្រោយពេលកើតហេតុ ដោយសារបុរសជាជនជាតិបរទេសមិនមានបាត់បង់សម្ភារៈអ្វីនោះ ក៏ព្រមអោយជនសង្ស័យធ្វើកិច្ចសន្យាអប់រំ ហើយដោះលែងវិញ ៕
ចែករំលែកព័តមាននេះ