រាជធានីភ្នំពេញ ៖ បុរសម្នាក់ជិះម៉ូតូចេញមកពីលក់ដូរនៅកោះពេជ្រក្នុងគោលបំណងត្រឡប់ទៅផ្ទះវិញ ខណៈជិះម៉ូតូបានពាក់កណ្តាលផ្លូវត្រូវរថយន្តមិនស្គាល់ម៉ាកបើកបុក និងកិនបណ្តាលអោយស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង១និង៣០នាទីរំលងអាធ្រាត្រឈានចូលថ្ងៃទី៦ ខែមីនា ឆ្នាំ២០១៩ តាមបណ្តោយផ្លូវជាតិលេខ៥ នៅចំណុចមុខខារ៉ាអូខេដាយមិនសោន ស្ថិតនៅក្នុងសង្កាត់ស្វាយប៉ាក ខណ្ឌឫស្សីកែវ ។
ជនរងគ្រោះដែលស្លាប់ឈ្មោះនឹម សុផល ភេទប្រុស អាយុ៤៤ឆ្នាំ មុខរបរលក់ដូរនៅកោះពេជ្រ ស្នាក់នៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ ជាអ្នកបើកបរម៉ូតូមួយគ្រឿងម៉ាកហ្សូមមើអិច ពណ៌ស ពាក់ស្លាកលេខ ភ្នំពេញ ១FW-៤៩១៥ ។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញជនរងគ្រោះខាងលើជិះមួយគ្រឿងបើកបរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង ក្នុងគោលបំណងជិះម៉ូតូត្រឡប់ទៅផ្ទះ លុះជិះបានពាក់កណ្តាលផ្លូវត្រង់ចំណុចកើតហេតុខាងលើ ក៏ស្រាប់តែមានរថយន្តចំនួន២គ្រឿង ក្នុងនោះមួយគ្រឿងម៉ាកហាយឡិចវីហ្គោមិនចាំពណ៌នឹងស្លាកលេខ រីឯរថយន្តមួយគ្រឿងទៀតជារថយន្តយីឌុប ហើយរថយន្តទាំង២គ្រឿងបើកក្បែរគ្នា ។
ប្រភពដដែលបានបន្តថា ពេលនោះគេមើលអត់ឃើញថារថយន្តមួយគ្រឿងណាជាអ្នកបុក ហើយរថយន្តមួយគ្រឿងណាកិននោះទេ តែគេសង្ស័យថារថយន្តយីឌុបបានបុក និងកិន ទើបបណ្តាលអោយជនរងគ្រោះស្លាប់ភ្លាមៗនៅនឹងកន្លែងកើតហេតុ ចំណែកម៉ូតូរបស់ជនរងគ្រោះខ្ទាតទៅចិញ្ចើមផ្លូវបែកក្បាំងតិចតួច
ភ្លាមៗនោះដែរ រថយន្តទាំង២គ្រឿងនោះបានបើកគេចសំដៅទៅព្រែកព្នៅបាត់ស្រមោល ។
ក្រោយពេលកើតហេតុ ម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកអោយនៅប៉ុស្តិ៍ស្វាយប៉ាក ចំណែកសពជនរងគ្រោះត្រូវបានកូនប្រុសមកទទួលយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ