ខេត្តក្រចេះ ៖ យុវជនចំនួន៣ប្រទេសនៅតំបន់ជាប់ព្រំដែនបានរំពឹងថា ក្រោយពីវេទិកាយុវជនតំបន់ត្រីកោណនេះបញ្ចប់ ប្រទេសទាំងបីជាពិសេសនៅតាមតំបន់ជាប់ព្រំដែន គឺមានការអភិវឌ្ឍន៍ឈានមួយកម្រិតទៀត ដើម្បីអាចឱ្យយុវជនយើងប្រើប្រាស់នូវវឌ្ឍនភាពខាងផ្នែកបច្ចេកវិទ្យា ដើម្បីដោះស្រាយបញ្ហាផ្សេងៗ និងការរកទីផ្សារសម្រាប់កសិករតាមតំបន់ព្រំដែន ។ វេទិការយុវជនតំបន់ត្រីកោណអភិវឌ្ឍន៍ រួមមាន កម្ពុជា ឡាវ និងវៀតណាម ហៅកាត់ថា(CLV) លើកទី៨ បានបើកកិច្ចប្រជុំចំនួនពីរថ្ងៃជាប់ៗគ្នាពីថ្ងៃទី៥-៦ មីនា ដែលខេត្តក្រចេះធ្វើជាម្ចាស់ផ្ទះនៃកិច្ចប្រជុំនេះ ។
អភិបាលខេត្តក្រចេះ លោក វ៉ា ថន បានមានប្រសាសន៍ថា វត្តមានគណៈប្រតិភូនៅទីនេះ គឺពិតជាមាន
សារសំខាន់ ក្នុងការបន្តពង្រឹង និងពង្រីកកិច្ចសហប្រតិបត្តិការរវាងយុវជន និងកីឡាទាំង៣ប្រទេសឱ្យកាន់តែរឹងមាំ និងបន្តការបេ្តជ្ញាចិត្តរួមគ្នា ក្នុងការចែករំលែកផ្លាស់ប្ដូរបទពិសោធន៍ការងារក្នុងការអភិវឌ្ឍសេដ្ឋកិច្ច រួមចំណែកលើកកម្ពស់ស្ដង់ដា ជីវភាពរស់នៅក្នុងតំបន់ត្រីកោណអភិវឌ្ឍទាំងមូល ។ ហើយយុវជន គឺជាគន្លឹះនិងមានតំម្លៃបំផុត សំរាប់ការអភិវឌ្ឍន៏សេដ្ឋកិច្ច វប្បធម៏ បរិស្ថាន និងការរក្សាសន្ដិភាពក្នុងពេលបច្ចប្បន្ន និងអនាគត ។
រដ្ឋមន្ត្រីក្រសួងអបរំយុវជននិងកីឡា បណ្ឌិតសភាចារ្យ ហង់ ជួនណារ៉ុន ដែលបានអញ្ជើញជាធិបតីក្នុងវេទិកាមានរយៈពេល២ថ្ងៃនេះ ក៏បានមានប្រសាសន៍បញ្ជាក់ថា ប្រទេសនៅជាប់ព្រំដែនចំនួន៣ គឺបានសហការគ្នា លើគ្រប់វិស័យតាំងតែពីអតីតកាលមកម្ល៉េះ ។ ប្រទេសយើងទាំង៣ បានសម្រេចរៀបចំឱ្យមានកិច្ចជំនួបកំពូលរវាងនាយករដ្ឋមន្ត្រីនៃប្រទេសទាំង៣ ដើម្បីបង្កើតជាតំបន់ត្រីកោណអភិវឌ្ឍន៍កម្ពុជា ឡាវ វៀតណាម ក្នុងគោលដៅពង្រឹងខេត្តដែលជាប់ព្រំដែនទាំង៣ ដែលជាខេត្តមានលក្ខខណៈមិនសូវអំណោយផលខាងផ្នែកអភិវឌ្ឍន៍សេដ្ឋកិច្ច ឱ្យមានលក្ខណៈល្អប្រសើរផ្នែកសេដ្ឋកិច្ចរវាងប្រទេសទាំងបី នៅតាមតំបន់ជាប់ព្រំដែន។
ចែករំលែកព័តមាននេះ