រាជធានីភ្នំពេញ ៖ តាមសេចក្តីរាយការណ៍ព័ត៌មានបឋមឱ្យដឹងថា នៅវេលាម៉ោង៣និង២២នាទីរសៀលថ្ងៃទី៥ មីនា ឆ្នាំ២០១៩ កម្មករ-កម្មការិនីរោងចក្រ W&D ដែលមានទីតាំងស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ…
រាជធានីភ្នំពេញ ៖ តាមសេចក្តីរាយការណ៍ព័ត៌មានបឋមឱ្យដឹងថា នៅវេលាម៉ោង៣និង២២នាទីរសៀលថ្ងៃទី៥ មីនា ឆ្នាំ២០១៩ កម្មករ-កម្មការិនីរោងចក្រ W&D ដែលមានទីតាំងស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ សរុបទាំងអស់ជាង២០០នាក់បាននាំគ្នាហែក្បួនតាមបណ្តោយផ្លូវ៣៧១ មិនដឹងគោលបំណងហែទៅណានោះទេ ខណៈការហែក្បួនមកដល់ទល់មុខមជ្ឈមណ្ឌលមង្គលឧត្តម ត្រូវបានកម្លាំងចម្រុះ រួមមានប្រជាការពារ ដែលដឹកនាំកម្លាំងដោយលោកអភិបាលរងខណ្ឌ ឌី រ័ត្នខេមរុណ បានចុះបិទផ្លូវ មិនឱ្យក្បួននោះដង្ហែទៅមុខទៀត ។
សេចក្តីរាយការណ៍បានបន្តថា គោលដៅដង្ហែក្បួនរបស់កម្មករ-កម្មការិនីខាងលើគេមិនដឹងថាដង្ហែទៅណាឱ្យពិតប្រាកដនោះទេ ទើបកម្លាំងចម្រុះសម្រេចបិទផ្លូវត្រឹមចំណុចខាងលើ ខណៈលោកអភិបាលរងខណ្ឌ ឌី រ័ត្នខេមរុណ កំពុងធ្វើការសម្របសម្រួល ប៉ុន្តែជាក់ស្តែងពុំទទួលបានលទ្ធផលណាមួយនោះទេ គឺនៅតែបិទផ្លូវនៅដដែល ហើយផ្លូវ៣៧១ដែលត្រូវបានបិទទាំងស្រុងនោះ ក៏បណ្តាលឱ្យមានការកកស្ទះចរាចរណ៍ទាំងទៅទាំងមក ។
តាមសេចក្តីរាយការណ៍បានបន្តទៀតថា គិតមកដល់វេលាម៉ោង៣និង៣៥នាទីរសៀលថ្ងៃដដែល គឺផ្លូវ៣៧១បានបើកឱ្យធ្វើចរាចរណ៍ឡើងវិញ ដោយសារអាជ្ញាធរបានឱ្យកម្មករ-កម្មការិនីហែក្បួនទៅតាមសម្រួល ហើយគេមិនដឹងថាគោលដៅរបស់ពួកគាត់ទៅណាឱ្យប្រាកដនោះទេ គឺអាជ្ញាធរនៅអមដំណើរការហែក្បួននោះផងដែរ ។
សូមបញ្ជាក់ថា នាពេលកន្លងមក កម្មករ-កម្មការិនីរោងចក្រ W&D សរុបចំនួន១២០០នាក់ តែងតែមានការតវ៉ាជាច្រើនលើកច្រើនសារហូតមានការបិទផ្លូវជាបន្តបន្ទាប់ច្រើនលើកផងដែរ រហូតដល់មានការដង្ហែក្បួនទៅកាន់ក្រសួងការងារ ក៏ដូចជាស្ថាប័នពាក់ព័ន្ធដើម្បីសុំកិច្ចអន្តរាគមន៍លើដំណោះស្រាយបញ្ហាការងារមួយចំនួនដែលពួកគាត់ចង់បាន ។
ការតវ៉ានោះគឺមានរយៈពេលជិត៣ខែទៅហើយ តែមិនទទួលបានដំណោះស្រាយណាមួយឡើយ ខណៈអាជ្ញាធរព្យាយាមដោះស្រាយជូនដែរ តែពួកគាត់មិនទទួលយកដំណោះស្រាយរបស់អាជ្ញាធរពាក់ព័ន្ធឡើយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ