ខេត្តកំពត ៖ ទីបំផុត នៅព្រឹកថ្ងៃទី៤ មីនា សំណង់អនាធិបតេយ្យក្នុងព្រែកអណ្តូងខ្មែរ ត្រូវបានអាជ្ញាធរចុះរុះរើ ។ នេះជាសំណង់រឹងមាំមានការចាក់សសរបេតុង ចុះទៅក្នុងទឹកព្រែកដែលកន្លងមក អាជ្ញាធរភូមិ សង្កាត់ និងក្រុងកំពត បានហាមឃាត់បញ្ជាឱ្យបញ្ឈប់ការសាងសង់ជាច្រើនលើកច្រើនសាហើយក្តី តែបុគ្គលមួយចំនួន ដែលមានដីនៅចំណុចមាត់ព្រែកនេះ ចេះតែលួចសាងសង់ជាបន្តបន្ទាប់លយចូលក្នុងព្រែកនាពេលកន្លងមក ។
ការប្រើកណ្តាប់ដៃដែកនេះ គឺបានឯកភាពក្នុងស្មារតីប្រជុំរបស់គណៈបញ្ជាការឯកភាពខេត្ត ដែលមានលោក ជាវ តាយ អភិបាលខេត្តជាប្រធាន បានដាក់ប្រធានបទ ស្តីពីការរៀបចំកែលម្អសោភ័ណភាព តំបន់ឆ្នេរព្រែកនិងទប់ស្កាត់ ការសង់សំណង់ អនាធិបតេយ្យក្នុងដៃព្រែកជាដើម ។ល។ ដើម្បីអនុវត្តឲ្យកាន់តែមានប្រសិទ្ធភាពតាមស្មារតីប្រជុំរបស់គណបញ្ជាការឯកភាពខេត្ត និងជាសារបង្ហាញឲ្យឃើញពីការអនុវត្តវិធានការលើសំណង់អនាធិបតេយ្យដែលអាជ្ញាធរគ្រប់ថ្នាក់នៅក្រុងកំពតបានហាមឃាត់មិនឲ្យសាងសង់ ហើយបុគ្គលមួយចំនួនដែលអាងបុណ្យសក្តិនិងអាងទឹកប្រាក់ នៅតែមានៈផ្គើនក្នុងការសាងសង់ ធ្វើឲ្យប៉ះពាល់ដល់សោភណ័ភាពតំបន់ឆ្នេរនៃព្រែកកំពត ដែលស្ថិតនៅភូមិអណ្តូងខ្មែរ សង្កាត់អណ្តូងខ្មែរក្រុងកំពត ។
ក្រុមការងាររបស់គណៈបញ្ជាការឯកភាពក្រុងកំពត ដឹកនាំដោយលោក លាង រឿនសុទ្ធី អភិបាលក្រុងកំពត និងមានការចូលរួមពីគ្រប់ស្ថាប័នពាក់ព័ន្ធក្នុងក្រុង និងមានការអញ្ជើញចូលរួមពីលោក ប៉ិល កុសល អភិបាលរងខេត្ត កងកម្លាំងនគរបាលប៉ុស្តិ៍និងក្រុង ដោយមានការសម្រួលនីតិវិធីពីលោក ខាន់ សុផល ព្រះរាជអាជ្ញារង អមសាលាដំបូងខេត្តកំពតផង បានយកគ្រឿងចក្រអេស្កាវ៉ាទ័រ ចុះរុះរើសំណង់ខុសច្បាប់ដែលសង់នៅក្នុងទឹកព្រែកនៅចំណុចភូមិសង្កាត់ខាងលើ ដោយកម្ទេចចោលទាំងស្រុងតែម្តង ។ លោក លាង រឿនសុទ្ធី អភិបាលក្រុងកំពត បានប្រាប់អ្នកយកព័ត៌មាននាពេលកំពុងរុះរើសំណង់ខុសច្បាប់ខាងលើថា ការដែលក្រុមការងារក្រុងរបស់លោក ចុះមកអនុវត្តការរុះរើសំណង់អនាធិបតេយ្យ ខុសច្បាប់នៅក្នុងព្រែកនាពេលនេះ ដោយសារអាជ្ញាធរហាមឃាត់រាល់ការសាងសង់សំណង់រឹងមាំ ដោយខុសច្បាប់នៅតាមមាត់ព្រែក ក្នុងដៃព្រែកទាំងអស់នៃក្រុងកំពត ជាពិសេសសំណង់ខុសច្បាប់នៅដៃព្រែកអណ្តូងខ្មែរនេះ ។
អ្នកស្រុកដែលមានលំនៅឋានក្បែរមាត់ព្រែកនេះ បានប្រាប់អ្នកយកព័ត៌មានយើងថា បើអាជ្ញាធរចុះមកណែនាំសុំឲ្យកំណត់ដីព្រំប្រទល់ដីឲ្យពួកគាត់ឲ្យបានច្បាស់លាស់ផង កំណត់ត្រឹមណាសាងសង់បាន ត្រឹមណាត្រូវហាមឃាត់ មិនឲ្យសាងសង់ ? ពីព្រោះពួកគាត់មករស់នៅចំណុចនេះ ដោយទិញពីអ្នកកាន់កាប់មុនៗជាច្រើនតំណរមកហើយ ហើយពេលនេះបើអាជ្ញាធរចុះមករុះរើសុំឲ្យរុះរើដូចៗគ្នា កុំរុះខ្លះទុកខ្លះគឺមិនយុត្តិធម៌ទេ ។ ចំពោះសំណូមពររបស់អ្នកស្រុកខាងលើ ត្រូវបានមន្ត្រីជំនាញនៅក្នុងក្រុមការងារឲ្យដឹងថា ដីនៅចំណុចដែលក្រុមការងារចុះរុះរើ និងហាមឃាត់មិនឲ្យសាងសង់សំណង់រឹងនេះគឺជាដីចំណីព្រែកប៉ះពាល់តំបន់ឆ្នេរ ។
កន្លងមកក៏គ្មានអាជ្ញាធរនិងស្ថាប័នពាក់ព័ន្ធណាហ៊ានចេញប្លង់កម្មសិទ្ធិជូនបងប្អូនដែរ ។ ប៉ុន្តែបងប្អូនចេះតែរស់នៅជាបណ្តោះអាសន្នលើដីចំណីព្រែក ដែលច្បាប់ហាមឃាត់នេះទៅ ហើយមានអ្នកខ្លះដែលដឹងថាដីចំណីព្រែកគេក៏លក់ឲ្យទៅអ្នកផ្សេង មកកាន់កាប់បន្តរហូតដល់មានបញ្ហានេះទៅ ។ លោកអភិបាលក្រុងបានឲ្យដឹងទៀតថា ការចុះរុះរើសំណង់អនាធិបតេយ្យមួយចំនួននៅចំណុចនេះ ជាសារមួយសំរាប់ឲ្យបងប្អូនដែលមានសំណង់ខុសច្បាប់នៅទីនេះ ត្រូវតែបន្តរុះរើដោយខ្លួនឯង និងហាមដាច់ខាតមិនឲ្យសាង់សង់រំលោភចូលក្នុងដីចំណីព្រែក ឬក្នុងទឹកព្រែកនេះតទៅទៀត ហើយសំណង់ដែលនៅសេសសល់ក៏ត្រូវរុះរើ
ជាបន្ទាន់ផងដែរ ។ លោកកថាបើមិនរុះរើទេនោះសាលាក្រុង និងចុះមានវិធានការរុះរើជាបន្តបន្ទាប់ទៀត ៕
ចែករំលែកព័តមាននេះ